Read Masana YAKUB 1 Bible Online

YAKUB 1 - Masana bible

YAKUB 1

¹Yakub sa ma sunda vi Lawna, vi Bum-Sumuna Yesu Kristu kaw, tam jafna sa doogo yam ma'na sa meray goyna, gigi deɓe.

²Ɓosiyonna, wakka tara'a tara'a ta nigi min ŋaf hiɗi na'ta nigi ma ziya' hiɗi firita,

³Kay nigi wi ala wakka vi vida vigiya vuɗ so-tuwta,

⁴May la nanigekaw so-tuwta hob vun lop ma pasiyakŋa, kay nigi ma muɗ goy pasiyaki, va ma makgi mayɗi.

⁵May la sa jargiya yalla valam may asɗina, hinim job yalla tam Lawna ma vul hiɗi firita bay lawta, yalla ma vulis talamu kaw.

⁶May nam ma siɗaw kayni hiɗi vida, bay giriŋi, kay sa ma giriŋa, nam ŋray ca ki billa vi niyn ŋolla ma simeɗn digiɗim vokomu, ɦiwirim kulo'o kaw nala.

⁷Kay sa ma ki kayn nana ma var ala nam ma fi va hay ɓam Lawnaɗi.

⁸Kayni mi sa ma dikam ma' ma'na, mi sa ma tulur hay hagata valamu kaw.

⁹May hin ɓasuki ma hawna subur tuwamu kay ŋolda valamu,

¹⁰hin sa ma mayanda subur tuwamu hay hawta valamu kaw, kay nam ma ba ki ɓona vi usna nala.

¹¹Kay fatta day kulo'o hiɗi vidikŋa va'a, na' so usna goyo, ɓona valamu yak goyo, jifiyta valamu vat goyo kaw, sa ma farayna ma hiɗi lopna valam ma nam lumna kaf ma vat goy ɗawn ki kayn nala.

¹²Sle'ta ka kay sa ma col dono'o hay nemda, kay hay li ma wakka valamu vatawa, nam ma fi bogorayna vi irita ma Lawna ŋaɓam tam nisi sa minimna.

¹³La hay li ma san ka hay nemda, nam ma di ala Lawn nemanuɗi, kay joota fi nem Lawnɗi, Lawna kay tuwamu nem saɗi kaw.

¹⁴May nemda vi san gigekaw, hay li ma darta vi tuwamu naram goyo hiɗi nilamda.

¹⁵Kay na'ta, hay li ma darta sli hayawa, na' vuɗ sulukŋa, hay li ma sulukŋa wulawa, nam vuɗ mitta.

¹⁶Ɗutgi tuwgi goyɗi, ɓosiyon sa hayan kigina,

¹⁷vulda jifiyta ta ŋaata hiɗi vulda ɦawata ta pasiyakka may kulo wuralawn pa; nam may kulo vi Lawna ma bum haraŋa, Lawn ma mu'ɗina, haraŋa valamu may mu'ɗi kaw.

¹⁸Kuɗ minda valamu nam vuɗayawa hiɗi yoboyn ma gasina, kay nay ma muɗ goy vun-jaf ma niy jewna jar sle ma nam lumna.

¹⁹Nigi ɓosiyon sa hayan kigina, nigi ma wi ala, san gigekaw ma jak humamu kay hum gosoyo, may di gosoyɗi, muɗ ɦiy gosoyɗi kaw.

²⁰Kay ɦiyda vi sana li va ma ɗigere vok ir Lawnɗi.

²¹Kay na'ta sle ma ges sana hiɗi lop ma joona kaf nigi ma cukum goyo. Yoboyn ma Lawn pum hay dikgina nigi ma vum hiɗi hot yamda gaata, kay nam as suɗgi goyo.

²²May ligi kuɗ yoboyna, nigi ma humum ɦawa'a kay ɗut tuwgi goyɗi.

²³Kay la san hum yoboyna, may li kuɗumɗi, nam ŋray ca ki sa ma ɗuw ir tuwamu hay kotoromna,[1]

²⁴hay li ma nam ɗuw ir tuwamawa, nam kal goy kayni, wulini wulini yalam jok ala nam ay ir nanige.

²⁵May nam ma cuk iramawa hay vun-ma-gatna ma pasiyakŋa, vun-ma-gatna vi butta-goyta, la nam so tuwamu, may kay humum a yalam jok kayn goyɗi, la nam ŋomomu, san kayni ma fi sle'ta hay lopna valam noŋ kafe.

²⁶La san var ala nam vi kuɗ Lawna, may ŋom sinamɗi, may ɗut tuwamu ni, vida valamu kuɗ Lawna muɗi sur waa'a kaw.

²⁷Vida gasita bay gese vok Lawna Bumna kayn ala: Sar guro sa kuyuna hiɗi boy sa duhulla hay lasta visiya, ŋom tuwaŋu kay liwisna vi nagata kaw.