Read Masana YAKUB 3 Bible Online

YAKUB 3 - Masana bible

YAKUB 3

¹Ɓosiyonna, hin sum sa hat sumuna li jargi ŋol dak-dakɗi, kay nigi wi ala nay sa hat sumuna, nay ma fi kitat ŋol suwa.

²Nay kaf ka sli zlaraŋgadaya hiɗi hagat tara'a tara'a, la san sli zlaraŋgaday hay dita valamɗi, nam mi sa ma asiya, nagay kay ŋom tuwamu kaw.

³Hay li ma nay cuk jamana hay vun kulumayna kay nam gat kuɗaya, tuwam kaf gat kuɗaya.

⁴Ɗuwgi tam lumayna lo tige, nam ŋulo'o, simeɗ ma ŋulona dolom vokomu, may sa ma gi lumna ɗigerem kuɗ minda valamu hiɗi prana ɦawa.

⁵Vunda kaw mi va ma goor ɦawa, may nir na'ta kepe na' di yoboyn ŋolo. Ɗuwgi kut kiɗaya, may na' ŋal jurun ŋolo natige!

⁶Vunda kaw ki kut nala, na'a ti sum joota, na' gooro hay tuwaya, may na' jok joota hay tuway pete, do kuta hay sem kekena vi irita, kuta na'ta may goy hay kuta tewɗita pa.

⁷Kay sle ma irina kaf gat kuɗ sana, muura hiɗi layayna kaw, guyna hiɗi sle ma goloŋ hay niyna kaf hat gatta, gat kuɗ sana;

⁸may vun ma dina as gat kuɗ san noŋɗi, nam joo'o, min gattaɗi, namu mi joo ma as gat kuɗ sanɗi, namu oyi hiɗi sinawna vi mitta.

⁹hiɗi namu nay subur Bum-Sumuna Buya, hiɗi namu nay beɗ sumuna sa Lawna kotsi ki nir tuwam nala.

¹⁰Bolda hiɗi be'da kali goy hay vun na'ta ta kepta. May ɓosiyonna, van ma li ki kayn naɗi.

¹¹Niyn ma ŋaana hiɗi ma galakŋa fi riŋay goy hay kaata ta kepta su?

¹²Ɓosiyonna, gu-gumna fi vuɗ gu-olive su? Lebo gu gulda-guldana fi vuɗ gu-gumna su? Niy ma huwlukŋa fi riŋ goy hay kaata ta niyna va' ŋaat su?

¹³sa ma jargi yali, ma wid ka kalamu kaw mi gige? (La ka'a) hinim ɗek kayni goy hiɗi poyta ŋaata valamu hiɗi zigin-zlata, hiɗi yalla.

¹⁴May la hunayta galakka hiɗi ci-wayta ka hay dikgiya, suburgi tuwgi kat gasitɗi, kaagi sin kata'ɗi kaw.

¹⁵Yalda na'ta may ti yalda ta may kulo patɗi, may na'a ti yalda ta gaa kay nagat tani, hay sliwna kaw, na' vi fuliyana kaw.

¹⁶Kay hay li ma hunayta hiɗi ci-wayta ka'a, gijum-gijumta hiɗi sle ma joona pet ka kaw.

¹⁷May yalla ma may kulo pana nam peldete, nam min sle'ta, nam ŋali, tap jaara, hobay hiɗi slugota hiɗi vuɗna ma ŋaana, bay poŋ-irta, bay mileta kaw.

¹⁸Kay vuɗna vi ɗigerta wasawa hay toyta kay nisi sa gar toyta.