Read Masana 1 PETER 1 Bible Online

1 PETER 1 - Masana bible

1 PETER 1

¹Peter, apostolla vi Yesu Kristu, tam sa vilekay-goyna, sa meray goy pulu hay Pontus, hay Galatiya, hay Kapadokiya, hay Asiya, hay Bitiniya kaw,

²nisi sa vilekay goyo kuɗ wida vokomta vi Lawna Bumna, kuɗ lita-peldetta vi Ŋusta, tam hum-vunda kuɗ Kristu Yesu, kuɗ busuwna valamu ma porayawa. Slugota hiɗi toyta li tigi ŋol lige.

³gi-deɓta tam Lawna bum Bum-Sumuna vaya, Yesu Kristu, nam ma kuɗ lamanda valam ta ŋolda vuɗaya wuli lo, hay dayta-kulota vi Yesu Kristu jar sa mitina pa, kuɗ cubta-sle'ta ta mus iriya,

⁴tam vocota ta as buw goyɗi, ta as saŋ goyɗi, ta as yak goyɗi kaw, ta ka ŋayay kulo kigiya hay wuralawna.

⁵Tigi nigi sa donota vi Lawna ka ŋomgiya, kuɗ vida, tam su'da ta ka goboy kay vul tuwa' goy haraŋi hay liyn ma cawna.

⁶Ligi firi hay dikgiya, la wulini nigi fi zumalda ir liyn neeɗa kaw. Kay la linigekaw nigi ma fi wakka kuɗ jafa' mara'a mara'a.

⁷Kay vida vigiya ta waki wak, na' ŋaa suw or ma fi ɓulaka may waki wak hay kuta. A na' ma muɗ goy suburta, gajijita hiɗi sli-yamda kulota, hay li ma Bum-Sumuna vaya Yesu Kristu ma vul tuwam goy haraŋi.

⁸Nam ma nigi bay wumu, may nir na'ta kep nigi minimu. Nigi bay wum hiɗi irgiya tuwa. May nigi ka viy hayamu, nigi ka firi hayam ŋolo hay firita ŋolda ta suw asta hiɗi gajijita.

⁹Hay li ma nigi fi wurakŋa vi vida vigiya, kayni su'da vi ciwta vigiya.

¹⁰Sa jobta-Lawna sa di voksiya kay slugota ta nigi ka haya' wulinta, nisi gar caw su'da na'ta, nisi feka' cawa'a kaw.

¹¹Nisi gar hiɗi diksi kaf kay fek caw buura hiɗi liyna, ma Ŋusta vi Kristu ta ay haysiya ɗeksi goy kalam jewe, liyn ma na' ɗeksi ala Kristu ma ci lasta, bugolda nam ma fi gajijita kaw.

¹²Dit ɗeki goy tisi ala, nisi di slen namna kayni may kisi nisi kay tuwsiɗi, may tigi nigiya, wulini labar namna diy tigiya hay vun nisi sa kus labar ma firin tigiya hiɗi Ŋusta-Peldetta, ta ga'ay kulo hay Wuralawn pa, Sunda-Wuralawn kaw gar a fek caw slen kayni.

¹³Kay na'ta muɗgi varta vigi dono'o, lakgi hay ŋalda, lakgi cub slugota ta nigi min fa'a, hay li ma Bum-Sumuna vaya Yesu Kristu min vul tuwam goy haraŋi.

¹⁴Ki guro sa hum gatta ŋaa'a nala, nigi ma tap kuɗ darta vigi ta jewta ki hay li ma nigi ay hay bay-wida naɗi,

¹⁵May ki nam ma yigiyawa ka peldete, nala nigi kaw ma muɗ peldete hay poyta vigi kafe.

¹⁶Kay ɗot di ala: Nigi ma lak peldete kay nam ka peldete.[1]

¹⁷Nam ma ka ir saɗina, ma ka kitat kay gige gigekaw kuɗ lopna valamu valamuna, la nigi yum ala Bugiya, nala nigi ma poy hiɗi narta hay li ma nigi ka gaa kay nagat tani.

¹⁸Kay nigi wi ala nigi buti goy kay poyta vigi ta joota, ta nigi fa'ay kuɗ sumaygi vocot kayni, may hiɗi sle ma vat goynɗi, hiɗi doorotɗi hiɗi orɗi kaw,

¹⁹may hiɗi busuw ma gus lop ŋolla vi Kristu, busuwna vi goor ɦu-dimina ma va ma ges may talamɗi, moy may talamɗi kaw.

²⁰Nam ma ay ŋaɓay goy jewe, jew cawa'ta tunita vi nagati pa, may wulini hay dabaŋ-gu'ta vi liyna, nam vul tuwamawa goy haraŋi kigi nigiya.

²¹Kuɗum namu nigi vaawa hay Lawna ma dayamawa kulo'o jar sa mitina pa, ma vulum gajijitawa, kay vida vigiya hiɗi cubta-sle'ta vigiya ma lak hay Lawna.

²²Hay li ma nigi li ciwta vigi goy peldete hay hum-vunda kuɗ gasita tam minda vi ɓosiyom-tuwgina jar tuwgi lina, mingi tuwgi jar-tuwgi hiɗi dikgi kafe,

²³Nigi sa vuɗi wuliya, hiɗi jafna ma buw goynaɗi, may hiɗi jafna ma buw goyɗina, kuɗ yoboyn ma irina ma vat goyɗina vi Lawna;

²⁴kay Sliwna pet ki usna nala, gajijita valamu pet ki ɓona vi usna nala, usna so goyo, ɓona valam yak goyo,

²⁵May yoboyna vi Bum-Sumuna mus ta-ta hay Vatɗita.[2] Kayni mi yoboyn ma kusi tigiya hay labara ma firina.