Read Masana 1 PETER 5 Bible Online

1 PETER 5 - Masana bible

1 PETER 5

¹Wulini nan min vul gatta mi sa maariyana sa ka jargiya, kay nan kaw mi ma maara ki nisi nala, nanu sa ma wi lasta vi Kristu hiɗi iranu, nan ka'a hay gajijita ta min vul tuwa' goy haraŋ ɗawni kaw.

²Nigi ma ŋom fok-dimina vi Lawna ma ka hay ɓigina, may hiɗi trestaɗi, may kuɗ minda vi Lawna, may hiɗi varta kay fi va kuɗumɗi, may kuɗ minda ŋaata vi dikgiya;

³gargi kay ti mul kay sum sa gaa kuɗ gaŋeraŋa vigin ɦawaɗi, may nigi ma li si sum sa fok-dimin sli kuɗgiya.

⁴Kay hay li ma mul ŋol ma ŋomda vul tuwamawa goy haraŋi, nigi ma fi bogoray ma gajijita valam may vat goyɗina.

⁵Nala kaw nigi sa bay li busat ŋol tuwana, humgi kuɗ sa maariyana, nigi kaf cukgi ŋalda kigiya jar-tuwgiya, kay Lawna fok kulo'o kay sum sa subur tuwsina, may nam vul slugota valamu mi sa hot yisi gaana.

⁶Hotgi yigi gaa kuɗ gaŋeraŋa vi Lawna, kay nam ma vulgi ŋolda hay li ma liyn coowa.

⁷Cukgi yorta vi dikgi kaf kalamu, kay nam min ŋomgiya.

⁸Lakgi ŋali, lakgi jigere kaw! Matna ma gaw kigina ka cigeɗgi ki zlona ma ci gumu nala, nam ka gar gigekaw ma nam fi muta.

⁹Yawgi kulo kalamu, lakgi ɗeŋe hay vida, kay nigi wi ala lasta ta ki kayn nala, ɓosiyogi sa hay nagata na' tun kisi kaw.

¹⁰May hay li ma nigi fi lastawa ir liyn neeɗa fina, Lawna mul slugota, nam ma yigi ay tam gajijita valamu ta vatɗita hay Kristu, nam ma pigi segi gaa'a ma muɗgi ɗeŋe, ma muɗgi dono'o, ma muɗgi ge'ɗi kaw.

¹¹Tam namu gajijita hay vatɗita vatɗita, Amen!

¹²Ɗota na'ta ir goor neeɗa kayni, nan vulgitis hay ɓam Silvanus, ɓasuy ma gasina, hay tani nan ka gatgiya, ka ɗekgi goy kaw ala kayni ti slugota vi Lawna ma gasina, ta nigi jun tuwgi ta'ta.

¹³Na'a ta vilekay-goyta ta ka hay Babilon gigi deɓe.[9] Goora vanu Markus kaw gigi deɓe.

¹⁴Gigideɓ jar-tuwgiya hiɗi ŋaf-vunda ta minda. Toyta tigi nigi kaf sa ka hay Kristu.