Read Masana 2 PETER 1 Bible Online

2 PETER 1 - Masana bible

2 PETER 1

¹Simon Peter, sa ma sunda hiɗi Apostolla vi Yesu Kristu, tam nisi sa, kuɗ lop ma ɗigera vi Lawna vaya hiɗi sa ma su'da Yesu Kristu, hiɗi ɓurawta hay vida ki nay fi nala kaw.

²Slugota hiɗi toyta li tigi ŋolo hay wida vi Lawna hiɗi Yesu Bum-Sumuna vaya.

³Donota vi Lawna vulay slen pet ma as gutay kay lak hay irita hiɗi poyta ŋaata, kay nam muɗay a wi nam ma yayawa kuɗ gajijita valamu hiɗi ŋaata valamu.

⁴Hay kayni deŋga ta ŋaata hiɗi deŋga ma ŋulona ma vuli taya, kay hiɗi kayni nigi ma muɗ si sum sa sli tuw Lawna, hay li ma nigi pir kay buwta ta ka hay nagata hiɗi darta vi sliwna.

⁵Kay na'ta kayni, nigi ma gar hiɗi vida vigi dono'o kay tap ŋaata tam vida vigiya, tam vida vigiya nigi ma tap wida,

⁶tam wida vigiya nigi ma tap tel-tuwna, tam tel-tuwna nigi ma tap so-tuwta, tam so-tuwta nigi ma tap poyta ŋaata,

⁷tam poyta ŋaata nigi ma tap minda kay ɓosiyogina, tam minda kay ɓosiyogina nigi ma tap ti-kamda.

⁸Kay na'ta, la slen kayni ka haygiya, la nam ka biya'a kaw, nam as hingi lak bay li lopnaɗi, as hingi bay vuɗnaɗi kaw, kay nigi ma wi Bum-Sumuna vaya Yesu Kristu.

⁹May sa ma slen kayni may kalamɗina nam dukiya, wi sle ma goboyn ɦawa, kay yalam jok poora vi sulukŋa valam ma jewnawa.

¹⁰Kay na'ta ɓosiyonna, sogi tuwgi dono'o kay yita vigiya hiɗi vilekka vigiya ma muɗ dono'o, la nigi li slen kayni, nigi ma sli zlaraŋgaɗay noŋɗi.

¹¹Nala vun-ziyn ma mal goy kigi vidiŋ' kay cuk kalafi hay mulda vatɗita vi Bum-Sumuna vaya hiɗi sa ma su'da vaya Yesu Kristu.

¹²Kay na'ta nan min gigi humgi dok-dok kay slen kayni, nigi kay tuwgi kaw wi slen namna, nigi lakay dono'o kaw hay gasita ta nigi ka haya' wulinta.

¹³Kayni ɗuw kiran ŋaa'a, hay li ma nan ka hay guɗukŋa[1] zawni tuwa, a nigi ma lak zliyi kulo'o hiɗi gi-humda van tigiya.

¹⁴Kay nan wi'e, ki Bum-Sumuna vaya Yesu Kristu ɗekan nala, a tu'da goyta vanu hay guɗukŋ zawni ka goboyo.

¹⁵May nan ma li a bugol kalta vanu, humgi ma gigi dok-dok kay slen kayni.

¹⁶May, numa ɗekgi kay donota vi mata vi Bum-Sumuna vaya Yesu Kristu, kayni hiɗi law ma ɗetna vi saɗi,[2] may kay mige numa wi ŋolda valamu hiɗi irma'a;

¹⁷Kay ŋolda hiɗi gajijita nam fa'ay vi Lawna Bumna pa, hay li ma gajijita hobay hiɗi ŋolda ka di del talam ala: Zawni mi goora vanu ma hayan kalamna, ma kiran ŋaa ŋolo.

¹⁸Numa hum del namna may kulo hay wuralawn pa, hay li ma numa ay hiɗi namu kay hiɗiyta ta peldetta.

¹⁹Numa lakay dono suwa kay yoboyn jobta-Lawna ma nigi li ŋaa'a kay hum kuɗumu, ki fitilla ma li haraŋi hay li ma jufunna nala, ta-ta liyn fo goyo, mislek ma fo liyna day kulo'o hay dikgiya kaw.

²⁰Jew kaf, wigi ala yoboyn jobta-Lawna ma ka hay ɗota sa as dum cawam goy valam kepɗi,

²¹Kay yoboyn jobta-Lawna diy goy kayn may kuɗ minda vi saɗi, may sumun di dita vi Lawn goy kayni, zutsi ti Ŋusta-Peldetta.[3]