Read Masana 1 YOHANA 2 Bible Online

1 YOHANA 2 - Masana bible

1 YOHANA 2

¹Gurona vanu, nan ɗo van kayni tigiya, kay nigi ma li sulukɗi. La sa li sulukawa, sa ma kot lawt kayna ka kat bumna, kayni mi Yesu Kristu ma ɗigera.

²Namu mi ɦu ma poora kay sulukŋa vaya, may kay sulukŋa vay nay kepɗi, kay sum sa kay nagat kafe.

³Kuɗ kayni nay wi ala nay wumu, la nay hum kuɗ vun-ma-gatna valamu.

⁴La san di ala: Nam wumu may hum kuɗ vun-ma-gatna valamɗina, nam mi sa ma sinda, gasita tay hayamɗi.

⁵May sa ma hum kuɗ yoboyna valamu, minda vi Lawna asay goy hayam ŋaa'a ŋolo. Kayni mi va ma ɗek ala nay viy hayamuna:

⁶Sa ma li di-goyt ala nam ka hay namu, nam ma poy ki Bum-Sumuna poy nala kaw.

⁷Nigi sa hayan kigina, nan ɗo tigi kayni may mi vun-ma-gatna ma wuliɗi, may vun-ma-gatna ma busayna ma ay kigi jew ɓa-ɓana; vun-ma-gatna namna ma ɓa-ɓana kayni mi yoboyn ma nigi humumna.

⁸Nir na'ta kepe nan ɗom tigi kayni mi vun-ma-gatna ma wuliya; kayni ti gasita kalam namu, kigi nigi kaw, kay jufunda as capa, haraŋ ma gasina ka wile wulini.

⁹La san di ala nam ka hay haraŋa, may ka gawt tam ɓasulumna ni, nam ka hay jufunda tuwa.

¹⁰Sa ma min ɓasulumna mus hay haraŋa, nam as puk sa gaaɗi.

¹¹May sa ma ka gawt tam ɓasulumna nam ka hay jufunda, nam poy hay jufunda kaw, liyn ma nam tuɗ hayamna nam wumɗi, kay jufunda dukum iramawa.

¹²Nan ɗoowa tigiya gurona vanu, kay sulukŋa vigi cukawa goyo kuɗ semda valamu.

¹³Nan ɗoowa tigiya nigi sumayna, kay nam ma ay hay cawa'ta tunit pana nigi wumu. Nan ɗoowa tigiya nigi joriyona, kay mige nigi kolawa kay ma joona.

¹⁴Nan ɗoowa tigiya gurona vanu, kay mige nigi wi bumnawa. Nan ɗoowa tigiya nigi sumayna, kay nigi wi nam ma ay hay cawa'ta tunit pa. Nan ɗoowa tigiya nigi joriyona, kay donota vigi ka'a, yoboyna vi Lawna mus haygiya kaw, kay nigi kolawa kay ma joona.

¹⁵Mingi nagatɗi, slen ma hay nagatɗi kaw. La san min nagata, minda vi bumna may hayamɗi,

¹⁶kay sle ma ka hay nagat petna, darta vi sliw-tuwna, darta vi ira hiɗi subur-tuwta kay slena vi nagata, kayni may vi bumnaɗi, may vi nagata.

¹⁷Nagata ma vat goyo hiɗi darta va'a, may sa ma li minda vi Lawna, nam ma mus ta-ta hay vatɗita.[2]

¹⁸Gurona vanu, liyn ma cawna ka wulini, ki nigi hum ala anti-kristuwayna ka ma'a, wulini kaw anti-kristuwayn ŋolo ka yaway kulo'o:[3]

¹⁹Nisi cukay goy jaray pa, may nisiya si sa faynɗi, kay la nisi si sa fayna, nisi lak ɗawni hiɗi naya, may nisi kali goyo, kay van kayni ma li goy haraŋ ala nisi si sa fayn kafɗi.

²⁰May nigiya, nigi ka hiɗi mul ɦoki kigiya kuɗ nam ma peldetna, nigi ka hiɗi wida kay slen kaf.

²¹nan ɗoowa tigiya, may ala nigi wi gasitɗi naɗi, may kay nigi wi gasita, kay sinda may hay gasita noŋɗi.

²²Sa ma sinda mi gige? Mi sa ma puw vunam ala Yesu may mi Kristuɗina naɗi su? Kayni mi anti-kristu, ma puw vunam kay bumna hiɗi goora.

²³Gigekaw ma puw vunam kay goora, namu bumna may hayamɗi, sa ma di goy kay goora, bumna ka hayamu.

²⁴May nigiya, va ma nigi humumay hay tun cawta pana hinim mus haygiya, la va ma nigi humum hay jew pana mus haygiya, nigi ma lak hay Bumna, hay Goora kaw.

²⁵Kayni mi va ma nam deŋ taya: Irita vatɗita.

²⁶Slen kayni nan ɗomawa tigiya kay sum sa ɗutgi goyna.

²⁷May nigiya, hin mul ma nam ɦokom kigina mus kigiya, nigi may gar kay sa hatgi loɗi; kay mige mul ma nam ɦokom kigina hatgi kay slen pet, kayni ti gasita, may ti sindaɗi, lakgi hay namu ki nam hatgi nala.

²⁸Wulini, gurona vanu, lakgi hay namu, kay hay li ma nam ɗek tuwamawa goyo, nay ma vi gasi ala, hay mata valamu nay ma muɗ goy zulo'o vokomɗi.

²⁹La nigi wi ala nam ka ɗigere, nigi ma wi ala gigekaw ma li ɗigerta vuɗum mi namu.