Read Masana 1 YOHANA 5 Bible Online

1 YOHANA 5 - Masana bible

1 YOHANA 5

¹Gigekaw ma vi ala Yesu mi Kristu, vuɗum mi Lawna, gigekaw min nam ma vuɗumna min nam ma nam vuɗumna kaw.

²Hiɗi kayni nay wi ala nay min gurona vi Lawna: Hay li ma nay min Lawna, nay li kuɗ vun-ma-gatna valamu kaw.

³Nay min Lawna kayni hay li ma nay li kuɗ vun-ma-gatna valamu, vun-ma-gatna valamu may nekɗi,

⁴kay gigekaw ma vuɗum mi Lawna kol kay nagata, kayni donota ta kol kay nagata: Ti vida vaya.

⁵Nam ma kol kay nagata mi gige? May mi nam ma vi ala Yesu mi Goora vi Lawna ɗisu?

⁶Mi namu, Yesu Kristu ma ma'a hiɗi niyna hiɗi busuwna, may hiɗi niyna ɦawaɗi, hiɗi niyna hiɗi busuwna kaw; lo li di-goyta kayni Ŋusta, kay Ŋusta kayn ti gasita.

⁷Nisi sa li di-goyta ka ɦidi hay wuralawna: Bumna, Yoboyna hiɗi Ŋusta-Peldetta. Nisi ɦidi lakŋi nisi tapay kepe.

⁸Nisi sa li di-goyta gaa kay nagata ka ɦidi: Ŋusta, niyna hiɗi busuwna. Nisi ɦidi lakŋi vunsi ŋray kep.

⁹La nay vi di-goyta vi sumuna, di-goyta vi Lawna na' ŋol suwa; kay di-goyta vi Lawn kayn ala: Nam di goy kay Goora valamu.

¹⁰Sa ma vaawa hay Goora vi Lawna, di-goyta na'ta ka hayam nam kay tuwamu; sa ma vi hay Lawnɗina, nam muɗum goy sini, kay di-goyta ta Lawn la' hiɗi Goora valamu nam min vi haya'ɗi.

¹¹Di-goyta na'ta kayni: Lawna vulay irita vatɗitawa, irita na'ta ka hay Goora valamu.

¹²Sa ma vi hay Goora fi iritawa, sa ma vi hay Goora vi Lawnɗina irita tay hayamɗi.

¹³Slen kayni nan ɗoowa tigiya, kay nigi ma wi ala nigi fi irita vatɗitawa, nigi sa vi hay semda vi Goora vi Lawna.

¹⁴Nay wi goy gasi kayn ala: La nay job va'a kuɗ minda valamu, nam ma humaya.

¹⁵La nay wi ala nam humaya, la nay jobom kay mige kaw, nay wi ala va ma nay jobomna nay fumawa.

¹⁶La san wi ɓasulumna li suluk ma nar tam mittaɗi, nam siɗawa, Lawna ma vulum irita; kayni may mi suluk ma nar san tam mittaɗi. Kay sulukŋa ma nar san tap mitta ka'a. Nan digi ala nigi siɗaw kayn may kay suluk namnaɗi.[8]

¹⁷Lop ma bay-ɗigera kaf mi sulukŋa. Suluk mara'a ma nar san tam mittaɗi ka kaw.

¹⁸Nay wi ala sa ma Lawn vuɗumna li sulukɗi; may sa ma Lawn vuɗumna nam ŋomomu kay Ma-Joona ma jomɗi.

¹⁹Nay wi ala nay ir vi Lawna, may nagat kuɗulu ka hay gaŋeraŋa vi Ma-Joona.

²⁰May nay wi kaw ala Goora vi Lawna maawa, nam vulay yamda-widawa kay nay wi ma gasina, nay ka hay ma gasina kaw; hay Goora valamu Yesu Kristu. namu mi Lawna ma gasina hiɗi irita vatɗita.

²¹Gurona vanu, ŋomgi tuwgi kay lawayn ma waana.