Read Masana SA KA KITANA 10 Bible Online

SA KA KITANA 10 - Masana bible

SA KA KITANA 10

¹Bugol Abimelek, sa mara fok kulo'o lo yum Tola. Nam mi goora vi Puwa, goor-ŋolona vi Dodo. Namu hay jafna vi Isakar. Ziyna valam hay Samir, hay hiɗiyta Efrayim.

²Nam ka kitata kay sa Israyella ir busat dok-ma' yam ɦidi. Bugol kayni nam mita, nisi pum hay Samir.

³Sa mara fok kulo bugolom nam lo, yum Yayir, nam mi sa ma Galaadna. Nam ka kitata vi sa Israyella ir busat dok-ma' yam ma'.

⁴Gurona valam dok-ɦidi, kuro ma joriyona ma nisi ɓe kalamna dok-ɦidi lay, hoyok-ziyna valam ka dok-ɦidi lay. Ta-ta vaydi nisi ka yi hoyok-ziyn namna ala hoyok-ziyna vi Yayir ma ini hiɗi guɗukŋa. Nam ka hay nagat Galaad.

⁵Bugol kayni Yayir mita, nisi pum hay Kamon.

⁶Gurona vi Israyel hot li va ma kir Ma-Vatɗin ŋaaɗin lo, nisi tun caw girif Baal* hiɗi Astarte*, lawayna vi sa Siriyana, lawayna vi sa Sidonna, lawayna vi sa Mowabna, lawayna vi sa Amonna, lawayna vi sa Filistin kaw. Yisi jok Ma-Vatɗina, min girifim loɗi.

⁷Ma-Vatɗina dikam muɗ ɦiy ŋolo kat sa Israyella, nam gussi goy hay ɓam sa Filistina hiɗi gurona vi Amon.

⁸Gurona vi sa Israyella sa ay goy bugol niy-lumna Yordan hay nagata vi sa Amoriyana hiɗi Galaad nisi lisi las ŋolo, curoɗsi ŋolo. Nisi lassi ta-ta busat doogo yam glafandi.

⁹Gurona vi Amon haw niy-lumna kulo'o kay tuɗ dur gurona vi Yuda, gurona vi Benyamin hiɗi jafna vi Efrayim. Sum sa Israyella fi sum-zlata ŋolo.

¹⁰Nisi hot tiy tam Ma-Vatɗina, nisi di'e: Ma-Vatɗina, numa li sulukawa kataŋu, kay yuma jokaŋ goy joko, kay numa raw goy sun Baal*.

¹¹Ma-Vatɗina di tam gurona vi Israyel: Nanu mi ma butgi goy hay ɓam sa Egiptena, ɓam sum sa Amoriyana, ɓam gurona vi Amon, ɓam sa Filistina kaf kaw ɗisu?

¹²Sum sa Sidonna, hiɗi sa Amalekŋa hiɗi sa Mawonitna kaf ay lasgi ŋolo, nigi tiy tanu, bugolda nan butgi goy hay ɓisiɗi su?

¹³May nigiya, yigi jokan goyo, nigi sunum mi lawayn ma waana, wulin kayn nan as butgi goy loɗi.

¹⁴Tuɗgi tiygi tam lawayn ma waana ma nigi vilekemna, nam ma coy suɗgi goy ɓam sum-zlata vigiya.

¹⁵Nala gurona vi Israyel hot di tam Ma-Vatɗina: Awa Ma-Vatɗina, numa li sulukawa, naŋ ma li tuma'a ki naŋ min nala, may numa siɗawaŋ suw pet kayn ala fatta vaydit zawni naŋ butma maŋ goy butu.

¹⁶Lawayna vi sum segena ma ka jarsina nisi cukum goyo, hot girif Ma-Vatɗina lo, Ma-Vatɗina tuwam tun caw wirimu kay lasta ta nisi ka ca'ta.

¹⁷Gurona vi Amon tok tuwsiya, tun vokŋa visi hay Mispa.

¹⁸Sum sa ŋulona vi Galaad di tuwsi jar-tuwsi ala, la sa jaray tunawa voko kay dur sum sa Amonna ni, nam ma lin mi ma ŋolla vi sum sa hay Galaadna. Sa ma ka'a mi gige?