Read Masana SA KA KITANA 11 Bible Online

SA KA KITANA 11 - Masana bible

SA KA KITANA 11

¹Hay Galaad sa ma juf ma wi duur ka kep yum Yefte, namu mi goora vi cata viyuwta; sa ma vuɗumna yum Galaad.

²Cata vi Galaad vuɗum guro sara'a kaw. Guro nisina hay li ma nisi muɗ ŋulo muɗna, nisi digiɗ Yefte goyo. Nisi dumu: Naŋ as yaw vocota vi buma'ɗi, kay naŋ mi goora vi cata ta may goy pul pa.

³Nala Yefte pir malam goy gine'e, nam hin guro-biyomna, tuɗ mus hay nagat Tob. Sum sa ɦay-ɦayna tok tuwsi talamu, nisi kal goy ŋuy liyn kuɗ tuwsiya.

⁴Mus bugolda neeɗa kayni, gurona vi Amon dur sa Israyella.

⁵Hay li ma gurona vi Amon ka li duura hiɗi sa Israyel ki kayn nala, sum sa ŋulona vi Galaad gi sunda tam Yefte hay nagata Tob.

⁶Nisi di tam Yefte: naŋaya, tunaŋ ŋol kuma'a, nay duray gurona vi Amon.

⁷Yefte hot dit tam sa ŋulona vi Galaad: Nigi lakŋi si sum sa kaan gawna ɗisu? Digiɗan goy hay ziyna vi bunu ɗisu? Wulini hay li ma sum-zlat figiyawa ni, nigi hot garan lo kay mige?

⁸Sum sa ŋulona vi Galaad di tam Yefte: Wulini numa hotiyawa kuɗaŋu, ŋaat naŋ tapaŋ hiɗi numa'a, naŋ ma dur gurona vi Amon, naŋ ma lin mi ŋolla vuma'a, ŋolla vi sum sa Galaad kaf kaw.

⁹Yefte hot di sum sa ŋulona vi Galaad: La nigi min ala nan tap hiɗi nigiya kay dur sum as Amonna, hay li ma Lawn vulsiyawa hay ɓanu ni, nan ma li mi mulla vigiya.

¹⁰Sum sa ŋulona vi Galaad di tam Yefte: Sle ma nay dumna lakŋi, Lawn ka humumu, la numa li kuɗumɗi, Lawn ma ka kitat kuma'a.

¹¹Yefte tap kuɗ sa ŋulona vi Galaad. Nisi tunum kulo ŋol kisi ki mulla visi nala, nisi tunum mi ŋolla vi vok-ma-duura visi kaw. Yefte yi va kalam kuɗ yoboyna ma nam dumna kaf vok Lawna hay Mispa.

¹²Yefte cuk sumun tam mulla vi sa Amonna, kay dum ala: Naŋ co dur nagata van kayni va ma ka jaran hiɗi naŋu mi mige?

¹³Mulla vi Amon hot disiya kay nisi ma tuɗ di Yefte ala: Nan min duraŋ kayn kay mige su, hay li ma sa Israyella kali goy hay nagata Egipte pa kayni, nisi sli nagata vanu, vuna'ay Arnon zaw ta-ta Yabok, ta-ta vun Yordan zaw, wulini naŋ hotan nagata van bay lawi.

¹⁴Lo Yefte cuk sum sa sunda sem mara lo tam mulla vi Amon,

¹⁵kay nisi ma tuɗ dum ala: Nan Yefte ka dumis ala: Sum sa Israyella may sli naga vi sa ma Mowabɗi, may sli naga vi gurona vi Amonɗi lay.

¹⁶Kay hay li ma sa Israyella kal ay goy hay Egipte pa kayni, nisi poy hay fulda, ta-ta vun niyn ma slawna, ta-ta nisi co hay Kades.

¹⁷Bugol kayni sa Israyella gi sunda tam mul ma Edomna kay dum ala nam hinsi jikis hay nagata valamu, may mul ma Edomna min hinsiɗi, Nisi gi sunda tam mul ma Mowabna, nam minɗi lay. Sum sa Israyella lak misi hay Kades nala.

¹⁸Bugol kayni nisi sli hagata ta fulda, ŋuy goy gal nagat Edom hiɗi nagat Mowab. Nisi co hay gal ma kuɗuwna vi nagat Mowab, nisi vi guɗukŋa visi goy bugol nagat Arnon, min tun tun sesi kulo hay nagat Mowabɗi, kay vun nagata vi Mowab dab kayn hay Arnon.

¹⁹Sa Israyella cuk sumun tam Sihon mulla vi sa Amoriyana, mulla vi Hesbon, nisi dum ala nam hinsi jik hay nagata valamu ta-ta nisi kal hay liyn ma nisi na hayamna.

²⁰May Sihon min vi dita visiɗi, nam tok sojena valamu, nisi tok tuwsi hay Yahat, nisi fok duura hiɗi sa Israyella.

²¹May Ma-Vatɗina Lawna vi sa Israyella vul Sihon hiɗi sumuna valam kaf hay ɓam sa Israyella; sa Israyella kol kisiya, sa Amoriyana sa lakay ziy hay liy namna kaf, sa Israyella sli nagat kisiya.

²²Nisi yaw nagata vi sum sa Amoriyan noŋ kaf, tunis hay Arnon pa ta-ta hay Yabok, hay fultis pa ta-ta hay Yordan dab'.

²³Wulin kayni vulma nagata vi sum sa Amoriyan kayni mi Ma-Vatɗina Lawna vi Israyel, may naŋu naŋ var ala naŋ as sla' kuma'a su?

²⁴Nagat ta lawna vaŋ Kemos vulaŋgita may asaŋɗi su? Lebo naŋ var ala nagat ta Lawna vuma' vulmat mumata numa ma hina' goy hin su?

²⁵Lebo naŋu, Balak goora vi Sippor mul ma Mowabna naŋ suwum su? Nam gar lawt hiɗi sum sa Israyel gar su? Lebo nam dur hiɗi nisi dur su?

²⁶Wulin kayn busat liy kis-hiɗi Israyel ka li ziy hay Hesbon hiɗi naga guray ma gala'na, hay Arower hiɗi naga guray ma gala'na, hiɗi hoyok-ziyn ma ŋulona ma ka goboy kel Arnon, hay li namna pa nigi min sli naga namnaɗi kay mige?

²⁷Nanu, nan may min gar law hiɗi naŋɗi, may naŋu, naŋ ka lan joota, li duur hiɗi nanu kaw. Vaydi kayni gurona vi Israyel hiɗi gurona vi Amon Ma-Vatɗina ma ka kitata ta jarsita.

²⁸Sunda ta Yefte ga' tam mulla vi Amon nam min huma' noŋɗi.

²⁹Ŋusta vi Ma-Vatɗina cuk kay Yefte, nam jikis hay Galaad hay galla vi Manase pa, cap hay Mispe vi Galaad, hay Mispe vi Galaad zaw, nam cap kay gar liy gurona vi Amon.

³⁰Yefte yi va kalamu vok Ma-Vatɗina di'e: Ma-Vatɗina, la naŋ vulan gurona vi Amonawa hay ɓanu ni,

³¹hay li ma nan hotay vun duura pa hiɗi dikan sleɗayn ɗawni, sa ma kaliyawa goy kiran jewe hay ziyna van pana, nan ma lum goy taŋ ɗifini hiɗi ɗifin ma ŋal-goyna.

³²Yefte tuɗ mok gurona vi Amon, Ma-Vatɗina vulsi hay ɓalamu,

³³nam kol kisi dono ŋolo, tun cawis hay Arower pa ta-ta hay gal Minit, jar liyn ma hoyok-ziyn ma ŋulo dok-ma' ka hayna, ta-ta hay Abel-Keramim, Gurona vi Amon muɗi las ŋolo vok gurona vi Israyel.

³⁴Hay li ma Yefte hotay vo hay ziyna valam hay Mispa kayni, goota valam kal ay goy kiramu hiɗi darayna hiɗi nulla. Na' kep kayn ti goota valam ta', goor valam ma juf mara mayɗi, ta ca tara tayɗi kaw.

³⁵Hay li ma Yefte iram wa' na kayni, nam jet sligar ma talamna goyo ka di'e: Yaya! Goota vanu, nak ton sutiyan nala kay mige? Nak kaw jar sum sa makanna lay. Wulin kayni, nan yi va kan vok Ma-Vatɗina, nan as hot goy bugolanɗi.

³⁶Na' di tam bu'a: Bunu, la naŋ yi va kaŋ vok Ma-Vatɗina ni, naŋ ma li tanu ki va ma kali goy hay vunaŋ pa nala. Kuɗ kayni Ma-Vatɗina vulaŋ donota kay kol kay gurona vi Amon sa gaw kaŋŋa.

³⁷Na' hot di tam bu' lo: May bunu, nan min ala naŋ hinan goy butiya ir til ma', nan min yaw nuriyonna kuɗanu tuɗ kulo kay hiɗiyta, tiy wayata-pasiyakka vanu.[7]

³⁸Nam hota' dita: Tuɗagu. Nam hina' goy butiya ir til ma', na' tap nuriyo'n kuɗa'a, tuɗ kulo kay hiɗiyta, tiy wayata-pasiyakka va'a.

³⁹Hay li ma til ma ma'n vatawana, na' hotay tam bu'a, nam li ɗifin hiɗi na'a ki vunam ma di goyn nala. Na' may buri tam sa noŋɗi. Hay na'ta pa lawt kayni hin jar sa Israyella ala:

⁴⁰Busat kaf kayni gurona vi Israyel fi tuwsi kulo kay hiɗiyta ir buur fiɗi kay tiy goota vi Yefte ma Galaadna.