Read Masana SA KA KITANA 12 Bible Online

SA KA KITANA 12 - Masana bible

SA KA KITANA 12

¹Sumuna vi Efrayim tok tuwsiya, nisi kali hay gal ma gaana, nisi di tam Yefte: Hay li ma naŋ tuɗ dur gurona vi Amon, naŋ min yuma kuɗaŋɗin kay mige? Wulin kayn numa min do kut kuɗ ziyna vaŋu, ŋalaŋ kalaf lay.

²Yefte hotsi dita: Nan hiɗi sumuna vanu ci-wayt fok jarma ŋolo hiɗi gurona vi Amon, hay li ma nan yigiya, nigi may co butan goy hay ɓisiɗi.

³Hay li ma numa wi ala nigi a co gut kuɗmaɗi, numa tun mitma gaa ta', numa mok duura hiɗi gurona vi Amon kil', may Ma-Vatɗina vulsi hay ɓuma'a, wulin kayn nigi min yaway goy vaydi lo kay durma'a kayn kay mige?

⁴Yefte tok sum sa Galaadna kaf talamu, fok duura hiɗi sumuna vi Efrayim. Sumuna vi Galaad ci sumuna vi Efrayim ŋolo, kay sumuna vi Efrayim di'e: Nigi Galaad yawn si sumuna vi Efrayim hiɗi sumuna vi Manase sa piri goyna.

⁵Sum sa Galaadna sli giɗer niy-lumna vi Yordan ma sa Efrayimna as jik hayamna; hay li ma sana vi Efrayim coowa hay liy namna, min ɦaw kulo'o ni, sa fi Galaadna jobomu: Naŋ mi sa vi Efrayim su? La nam di ala a'a,

⁶nisi dumu: Daŋ ala Cibbolet. Nam di ala Sibbolet. Kay vunsi asay a yum goy hay liyamɗi. Nala nisi vumu, kalam goy hay giɗer niy-lumna, ŋatam goy de'. Hay li namna nisi ci sumun birim dok-fiɗi yam ma' jar sumuna vi Efrayim.

⁷Yefte ma Galaadna ka kitata vi sum sa Israyella ir busat karkiya, bugol kayni nam mita, nisi pum hay hoyok-ziyna vi Galaad mara kepe.

⁸Bugol Yefte, Ibsan ma Betlehemna ka kitata vi sum sa Israyella.

⁹Nam vuɗ guro sa jufayn dok-hidi, vuɗ sa boyn dok-hidi lay. Sa boyn nam vulsi goy kuɗ sum sara'a, jar sum sa goyna nam yaw guro-boyn dok-ɦidi mi gurona valamu.

¹⁰Nam ka kitata vi sa Israyella ir busat siɗiya. Bugol kayni Ibsan mita, nisi pum hay Betlehem.

¹¹Bugol Ibsan, Elon ma hay jafna vi Zabulon ka kitata vi sa Israyella. Nam ka kitata visi ir busat doogo.

¹²Bugol kayni nam mita. Nisi pum hay Ayalon, hay nagata vi Zabulon.

¹³Bugolom namu, Abdon goora vi Hilel ma Piratonna, ka kitata vi sa Israyella.

¹⁴Nam vuɗ guron dok-fiɗi, guro-ŋolona valam dok-ɦidi. Kuro ma joriyo ma nisi ɓe kalamna dok-siɗiya. Nam ka kitata vi sa Israyella ir busat glafandi.

¹⁵Bugol kayni nam mita, nisi pum hay Piraton, hay nagata vi Efrayim, kulo kay hiɗiyta vi sa Amalekŋa.