Read Masana SA KA KITANA 19 Bible Online

SA KA KITANA 19 - Masana bible

SA KA KITANA 19

¹Hay li namna ma mul may hay Israyel tuwaɗin kayni, sa mara ma Levit kepe, ziyam goy hay vun hiɗiyta vi Efrayim ma vati goyna. Nam tuɗ hay Betlehem hay Yuda, sli cata ta sunumta ay kepe.

²Ca na'ta tun caw li tuwa' talam viyuwu, na' kal goyo, hot hay ziyna vi bu'a hay Betlehem hay Yuda. Na' mus ɗawni ta-ta til fiɗi.

³Jufa' foka, tun iram kuɗa'a kay ka kasla ma sleɗa' haya'na a na' ma hotay vo'o. Nam vi sa ma sunda valam kuɗumu, yaw kuro ma' may. (Hay cota valamu) cat kalam vo tam bu'a. Hay li ma bum goor na'ta wum na kayni, nam firiyim ŋolo.

⁴Kunomna bum goor na'ta telem talam ir buur ɦidi. Nisi ti'e, ci'e bur kaw.

⁵Co hay buurta fiɗit kayni, nisi yaw kulo hay graw culum, hay li ma nisi kot tuwsi kay tuɗa kayni, bum goor na'ta di tam kunomna: Naŋ ma ti fu ne' kay fi dono'o, bugolda nigi ma tu'ɗi su?

⁶Nisi lak gaa kuɗ tuwsi ma' kafe, ti'e ci'e. Bugolda bum goor na'ta di tam kunomna: La naŋ mina, naŋ as bur mara'a kay dikaŋ sleɗ sleɗe.

⁷Nam fok kulo'o kay tuɗa, may kunomna min hinimɗi, nala nam va' talamu bura.

⁸Hay buurta vaslta, nam fok kulo graw culum culum kay tuɗa. Bum goota di talamu: Nan siɗawaŋu, ŋaat kayn naŋ ma fi dono mara ne' lo, kigi na lak' ta-ta goy vulatiya. nisi lak kuɗ tuwsi ma' ti'e.

⁹Hay li ma nam fok kulo kay tuɗa, hiɗi cata valam ta sunumta hiɗi sa ma sunda valam kayni, kunomna bum goor na'ta di talamu: Saraŋ tige, fatta ka kal zaw, liyn kal kayn kaliya; ŋaat nigi ma bura, kay liyn zim ɗawn zimiya, buraŋ tani, kay dikaŋ sleɗ goy ŋaa'a sleɗe; girawt ɗawn nigi ma yawgi kulo culum culum kay tungi goy hay hagata, nala naŋ ma co vo vaŋu.

¹⁰Juf ca na'ta min a bur loɗi, nam fokay kulo'o kaliya, nam co ta-ta tam Yebus ta ya' Yerusalemta, kurona visi ganay gan' may, cat kuɗsi ta may.

¹¹Hay li ma nisi co goboy hiɗi Yebus kayni, fatta kali ŋol noŋo. Sa ma sunda di tam mulamna: ŋaat kayni, nay calay hay ziyna vi sa ma Yebusna tani kay buray haya ɗisu?

¹²Mulamna ka hotom dit ala sum sa may jafayɗi lay, sa ma Israyel may jarsiɗi lay kayn nay as tun sey kulo hay naga visiɗi, ŋaat nay tuɗay buray hay Gibeya.

¹³Nam hot di tam sa ma sunda valam lo: Jar Rama hiɗi Gibeya lakŋi, nay tuɗay goboy tam mara kep kay buray haya.

¹⁴Nisi so tuwsi tam tuɗna, hay li ma fatta ɗik kayni, nisi coowa goboy tam Gibeya ta fi sumuna vi Benyaminta.

¹⁵Nisi cal goyo kay tuɗ bur goy hay Gibeya. Sa ma Levitna kal kulo hay hoyok-ziyna. Sa kep kaw ma hay hoyok-ziyn ma disi ala nigiyay burgi vo tanu mayɗi.

¹⁶Ɗuw na kayni, sa ma busayna ay goy hay sinena kay li lopna; nam mi sa ma ziyam ay kay hiɗiyt Efrayim pa, nam lum jar sumuna vi Benyamin hay Gibeya damni mi ziy ɦawa.

¹⁷Nam poŋ iram kulo na kayni, sumun lakay goy fara lak'. Sa ma busayn ka disiya: Nigi may arige pa? Nigi na arige?

¹⁸Sa ma Levitna hotom dita: Numa may hay Betlehem hay Yuda pa, numa min kal kulo kay vun-hiɗiyta vi Efrayim ma vati goyna, kay nan mi sa ma ay ɗawni, nan ay rogoy hay Betlehem, nan mi sa ma li lop hay ziyna vi Ma-Vatɗina, may sa ma min van vo talam mayɗi.

¹⁹Numa ka hiɗi hatna ma kuron tumna kuma'a, tina vuma hiɗi vin ma jibetna ka kuma lay; fan nanna ka lay, fi cat ka lay, fi goor ma joriyon damni ka lay, slena vuma ka kuma kaf.

²⁰Sa ma wulam vatina di talamu: Nan vigiyawa, va ma suwgina nan min vulgiya, nigi as a bur goy hay faran tanɗi.

²¹Nam yawsi kuɗum vo'o, nam vul hat mi kurona, nisi muz sesi goyo, nisi ti'e ci'e kaw.

²²Hay li ma nisi lak ka kasla kayni, ɗuw na kayni sum sa yisi hiwirin ŋuy ziyn cusl', tun caw ci vun-ziyn dil-dil', di tam sa ma wulam vatina ma bum ziyn ala: Sa ma kalis vo vaŋ ɗawni, naŋ guma'tay goyo kay numa min garamu.

²³Bum-ziyn kali goy tisiya ka disi ala: A'a, ɓosiyonna, ligi va ma joon kaynɗige, nan siɗawgiya, kay san kayni kali vo vanu, law ma liwis ki kayn nala nigi lumɗige.

²⁴Humgiya, goot-cata van ta bay tam sa tuwata ka kep zaw, sa namna kaw cat ta sunumta ka kuɗum kep lay, nan min narsis goy jiy tigiya; nigi lisi las migiya; nigi as li tisiya va ma nigi mina, may san damni nigi ligi law ma liwis talam migiɗige.

²⁵May sum nisin min humum noŋɗi. Nala sa ma Levitna vi cata valam ta sunumta, gisit ira' goy jiya, nisi tun caw bura'a, nisi taya' ta-ta goy ŋarpita. Hay li ma liyn tun caw cal goyo, nisi hina'a.

²⁶Hay graw culumta ca na'ta tuɗ nig goy gaa hay vun-ziyna vi sa ma jufa' buri vo valamna, na' bur ka' na waŋ ta-ta fatta day kulo'o.

²⁷Hay graw culumta jufa' fok kulo'o, mal vun galan goyo, kali goyo kay tuɗa. May nam sar na kayni, cata valam ta sunumta ka buri gaa tam vun-galan waŋ, ɓa' cuki talam ca may.

²⁸Nam di ta'a: Fokag kulo'o, nay kaliya. Na' may hotom dit noŋɗi. Nala nam wata' kulo kay kurona, kal vo hiɗi na'a.

²⁹Hay li ma nam co vo valamu, nam sli kewta, vi ca na'ta, ka' sliwa' goy ne' ne' ir doogo yam ma', nam jokom kuɗ nagata vi gurona vi Israyel kafe.

³⁰Sum sa irsi wi lawt kayn kaf di'e: Hih! Tuw ma gurona vi Israyel kali goy hay nagata Egipte pa ta-ta vaydi, law ma ki kayn nala bay li jarsi sem kep tuwa. Saraygi law na'ta, jobaygi tuwaya, daygi va kep.