Read Masana SA KA KITANA 2 Bible Online

SA KA KITANA 2 - Masana bible

SA KA KITANA 2

¹Sa ma sunda vi Ma-Vatɗina fokay hay Gilgal hay galla vi Bokim pa di'e: Nan yawgi ay goy hay nagat Egipte pa, nan margi hay nagat ta nan yi va kan ala nan min vula' mi sumaygiya. Nan digi jew ala bonota van ta nan juna' hiɗi nigita nan min ja' jara' goy noŋɗi,

²may nigiya, nan digi ala nigi ma vi bono hiɗi sum sa hay nagat na'ta tanɗi, nan digi ala giwin-ma-ɗifinna visiya nigi ma ɦom gaa'a, may nigi min human vunanɗi, nigi li nala kayn kay mige?

³Wulin kayn nan digiya: Nan as a digiɗ sum nisin goy vokgi loɗi; nisi ma lak kulo delgiya, lawayna visi ma lin ti jawta ta gani gaa vokgita.

⁴Hay li ma sa ma sunda vi Lawna di tam gurona vi Israyel dina, sumun kaf mun tiyn digi-digi',

⁵liyn namna nisi tunum selem ala Bokim, nisi li ɗifin mi Ma-Vatɗina hay liyn namna.

⁶Bugolda Yosuwa gi ir sumun vo'o, gurona vi Israyel gigekaw tun iram hay nagata ta vuli ir malamta, kay mus haya'a.

⁷Hay li ma Yosuwa hiɗi sum sa maariyana sa hin bugolomna sa wi lop ŋulo ma Lawna lum kirsin ka iri tuwana, sumun sun Lawn hay buurta kaf.

⁸May bugol kayni Yosuwa goora vi Nun, sa ma sunda vi Ma-Vatɗina mitawa, busata valam co kis hiɗi diram doogo.

⁹Nisi pum hay nagat ta ir ɓurawt vula' malamta, hay Timnat-Herez, kulo kay hiɗiyta vi Efrayim, hay gal ma gaana vi hiɗiyta Gaas.

¹⁰Bugol kayni sa wi Yosuwana, sa li lop hiɗi nam kuɗ tuwsin kaf tap kuɗ sumaysi sa hay zulla kaf. Jaf ma biya bugoldana may mi jaf ma wi Lawnɗi, ŋaata ta Lawn la' tam sumaysi sa Israyella nisi min wa'ɗi kaw.

¹¹Gurona vi Israyel li slen ma may kir Lawn ŋaaɗina. Nisi tun caw sun Baal*.

¹²Ma-Vatɗina Lawna vi sumaysiya, nam ma yawsiyay goy hay nagata Egipte pana nisi noyom goyo, lawayna vi sum sa ziysi ŋuyi tisina nisi tun caw sunumu, tun caw girifimu, nisi muɗ dik Ma-Vatɗin hiy katsiya.

¹³Nisi hin Ma-Vatɗin goyo, tun caw sun Baal* hiɗi Astarte*.

¹⁴Ma-Vatɗina muɗ hiy ŋolo katam sum sa Israyella, nam hinsi goy hay ɓam sa gawt kisina, hin sa gawta co'o kay tisi ɓuraŋi. Nam gussi goy hay ɓam sum sa ziysi ŋuyi tisina. Donota visi ta dur sa gawt kisina tay loɗi.

¹⁵Arigekaw ma nisi tuɗa, ɓam Ma-Vatɗina ka buri goy voksi waŋ' kay lisi joo'o, kayn ki Ma-Vatɗina di tisi nala, ki nam yi va kalam nala.[2] Lasta ta ŋolda irsi wa' noŋ wi'.

¹⁶Bugol kayni Lawna laksi sum sa ka kitan voksiya, sum sa ka kitan butsi goy hay ɓam sa tisi ɓuraŋŋa.

¹⁷May nisi min hum kuɗ sum sa tuni voksi kay ka kitan kisin noŋɗi, kay tuwsi muɗi viyuw kuɗ lawayn ma waana, girif gaa vok lawayn ma waana. Hagat ta sumaysi poy haya' jewta, ta hum kuɗ gatta vi Lawnta nisi hina' goyo, nisi min li ki sumaysi nala loɗi.

¹⁸Hay li ma Ma-Vatɗina tun sa ma ka kitanawa kisiya, nam kay tuwam tun vokomu, buur kaf ma sa ma ka kitan ka jarsiya, nam butsi goy hay ɓam sa gawt kisina, hay li ma nisi ka tiya kay las ma sumun lassina hiɗi curoɗ ma sumun curoɗsina ni, nisi muɗ kir Ma-Vatɗin haw de'.

¹⁹May hay li ma sa ma ka kitan mitawana, nisi tun caw muɗ tuwsi liwis lo suw sumaysiya, nisi tun caw girif lawayn ma waana. Nisi so tuwsi hay poyta joota na'ta hiɗi so'otta vi dikga.

²⁰Kuɗ kayni ɦiyda vi Ma-Vatɗin jor vok ŋolo tisiya, nam di'e: Wulin kayni sum nisina min hum kuɗ bonota ta nan juna'ays hiɗi sumaysitɗi, nisi min human vunanɗi,

²¹nala sum sa Yosuwa hinsi ays ziy tisina, sa nam as a digiɗsi goyɗin lakŋi, nan as a digiɗsi goy voksi loɗi lay.

²²Sum nisin kisi na lak', nan min wak Israyel hiɗi nisiya.

²³Sum sa Ma-Vatɗin digiɗsi ays goy hiɗi ɓam Yosuwaɗina, nam hinsi hay tun-sukka, nam gar kay digiɗsi goy gosoyɗi.