Read Masana SA KA KITANA 20 Bible Online

SA KA KITANA 20 - Masana bible

SA KA KITANA 20

¹Gurona vi Israyel cukay goy kafe, vunsi ay hay Dan ta-ta hay Bar-Seba dab', ay hay nagata vi Galaad pa, ki sa ma kepna ɦawa nala, sumun tok tuwsi vok Ma-Vatɗina hay Mispa.

²Sa ŋulona vi Israyel noŋ kafe, jafna visi noŋ kaf co hay tokŋa vi sumuna vi Lawna: Nisi ay sumun birim kis-fiɗi', sa wi yal duur ma hiɗi kew-gaferaŋa.

³Labara co tam gurona vi Benyamin ala sa Israyel kaf tuwsi ka toki hay Mispa. Gurona vi Israyel di'e: Vigi labar tige, law ma wir tuw namna nisi lum kayn lita litige?

⁴Sa ma Levitna, juf ca na'ta ta nisi ca' matta sli ditiya di'e: Nan co hiɗi cata van ta sunanta hay nagata vi Benyamin ta ya' Gibeyata kay bur haya.

⁵Sum sa hay Gibeyan yaw kulo katanu, ziy ma nan buri hayamna nisi ŋuyumu hay henjeta, nisi gar kay can goy mati. Cata van nisi taya' ta-ta cap ca' goy mati.

⁶Nan sli ca na'ta ka' sliwa' goy ne' ne', nan jokomis goy hay nagata vi Israyel kuɗ jafna visi hay vocota visi kaf; kay sum nisin lum hay nagata vi Israyel kayn mi law ma yawi, law ma wir tuw ŋolo.

⁷Wulin kayn nigi gurona vi Israyel kaf ka toki tani, jobgi jar-tuwgiya, digi law kep ma nigi as lumna.

⁸Sumun kaf fok kulo'o ki sa ma kepn nala, nisi ka di jar-tuwsiya: Sa kuɗay kep kaw as hot vo hay ziyna valam loɗi.

⁹Ɗuwgi va ma nay ma lum tam sum sa hay Gibeyana: jew a nay tuɗ dursiya, nay ma li ŋaɓta kuɗ ɦayta.

¹⁰Hay jafna vi Israyel kaf kayni, sum sa doogon nay ma vi sa kuɗsi kep, sum sa birim ɗawn nay ma yaw sum kuɗsi kis, sum sa birim doogon nay ma yaw sum kuɗsi birim ɗaw, a sum nisin tuɗ gar va ma tin ay mi sumuna, kay hay li ma nisi hotiyawana, sum sa Gibeyan nay ma job yay tisi kuɗ law ma wir tuw namna ma nisi lum tam gurona vi Israyel kayni.

¹¹Nala gurona vi Israyel jun vunsi kat hoyok-ziyn namna ki sa ma kepn ɦawa nala.

¹²Sum sa Israyella cuk sumun tam jafna vi Benyamin kay disi ala: Law ŋol ma wir tuw ki kayn nala li jargi kayn lita litige?

¹³Wulin kayni sum sa yisi ɓulakayna sa ka jargi hay Gibeya sa li law namna nigi vulsi ay goyo, numa min cisi goyo, kay pat joot ta ka jar sum sa Israyel goyo. May sa fi Benyaminna min hum del guro-biyosina sa gurona vi Israyel noŋɗi.

¹⁴Gurona vi Benyamin sa ay hay hoyok-ziyn hegena tok tuwsi hay Gibeya kay dur gurona vi Israyella.

¹⁵Hay na'ta gurona vi Benyamin sa ay goy hay hoyok-ziyn hegen pana ŋaɓta visi co kayni, sum sa wi duura hiɗi kew-gaferaŋa birim dok-ma' yam karkiya. Sum sa hay hoyok-ziyn Gibeya hiɗi sumuna visi sa wi duur kis-siɗiya may ŋaɓay hayɗi.

¹⁶Nisi tapay kaf kayni, sum sa wi duur kuɗsi ŋolla kis-siɗiya, sa ɓisi gulu, ɓisi ɓaraw ŋolo, la nisi min gi san kalam hiɗi tiwlekŋa kaw ɓisi may pi gaaɗi.

¹⁷La sumuna vi Benyamin may hayɗi, ŋaɓta vi gurona vi Israyel co birim kis-fiɗi', kaf kayni si sum sa wi duura.

¹⁸Gurona vi Israyel yaw kulo'o, tun ɗirsi hay Betel, nisi job Ma-Vatɗina di'e: Jarma lakŋi jaf ma naŋ min ala nam ma tun vok jewe kay tuɗ dur gurona vi Benyamin mi jaf marige? Ma-Vatɗina hotsi dit ala jafna vi Yuda ma tuɗ vok jewe.

¹⁹Graw culum culum kayni gurona vi Israyel kal vun duura, nisi tun vokŋa visi goboy hiɗi Gibeya.

²⁰Jufayna sa wi duura vi Israyel tuɗ voksiya kay dur sa fi Benyaminna, nisi poŋ hayn goy vok Gibeya.

²¹Hay Gibeya pa gurona vi Benyamin cukay goyo, hay na'ta nisi ci sumun kuɗ gurona vi Israyel birim dok-ma' yam ma'.

²²Sumuna vi Israyel hot so ir tuwsi lo, nisi hot poŋ hayn hay liyn ma nisi duris hayam hay buurta jewt lo.

²³Gurona vi Israyel kaliya, nisi tiy vok Ma-Vatɗina ta-ta vulatita; nisi job tam Ma-Vatɗina di'e: Wulin kayn numa ma hot dur guro-biyomana sa gurona vi Benyamin lo su? Ma-Vatɗina hotsi dit ala tuɗgi dursiya.

²⁴Hay sem ma ma'n kayni, gurona vi Israyel ɦur kulo tam gurona vi Benyamin goboyo.

²⁵Hay buur na'ta kayni, sa fi Benyamin cukay goy hay Gibeya pa kay dursiya. Nisi hot ci kuɗ sojena vi Israyel sumun birim doogo yam glafandi lo, kaf si sum sa wi duur ŋaana.

²⁶Gurona vi Israyel hiɗi sumun noŋ kaf kaliya, nisi fi tuwsi hay Betel, nisi mun tiyna, tok tuwsi gaa vok Ma-Vatɗina, nisi li laat hay buur na'ta ta-ta hay vulatita, nisi li ɗifin ma ŋal-goyna, hiɗi ɗifinna vi lop ma slugona vok Ma-Vatɗina.

²⁷Gurona vi Israyel job Ma-Vatɗina, kay timgilla vi bonota ay jarsi hay na'ta ta'.

²⁸Hay buur namna sa ma coli vok Lawn kayn mi Fineyas goora vi Eliyazar, goor-ŋolona vi Aaron. Nisi di'e: Wulin kayn gurona vi Benyamin sa guro-biyomana numa tuɗ dursiya lebo tu'ɗi su? Ma-Vatɗina hotsi dit ala: Wulin kayn tuɗgi dursi yo, kay grawt ɗawni nan min vulsi hay ɓigiya.

²⁹Sum sa Israyella bar soje segen kulo goboy tam Gibeya.

³⁰Gurona vi Israyel mok gurona vi Benyamin sem ma ɦidin lo, nisi poŋ hayn goy vok Gibeya ki nisi li tisi jew nala.

³¹Gurona vi Benyamin cukay goyo kay dursiya, nisi hin sa Israyella nemsi goy gine hiɗi hoyok-ziyna, nisi tun caw ci sa Israyella ki nisi ka cisi jew nala, hay hagata kep jik hay Betel, kep jik hay Gibeya hay gal ma fulla, nisi ci sumun ir ki dok-ɦidi nala kuɗ sa Israyella.

³²Gurona vi Benyamin ka di'e: Nay vatsiyawa ki jew nala lo. May gurona vi Israyel ka di'e: Munay voksi jaŋi, nay nemsi ay goy hay hagana gine hiɗi hoyok-ziyna.

³³Sumuna vi Israyel kaf hin liyn ma vokŋa visi poŋi hayamna ay goyo, nisi hot poŋ hayn goy vok Baal-Tamar; soje sa nisi barsi kulo goboy tam hoyok-ziyna kal ay goyo, hay liyn ma nisi ay baray hayamna hay Maare-Gibeya pa.

³⁴Sojen birim doogo sa vileki jar gurona vi Israyel kafna co ɗiger vok Gibeya. Duur li ku ŋolo, nala sumuna vi Benyamin wi ala kayni gawt ma fisiya yo.

³⁵Ma-Vatɗina mun sumuna vi Benyamin vok sa Israyella. Hay buur na'ta nisi ci sum sa wi duura kuɗ sumuna vi Benyamin birim dok-ma' yam vasl hiɗi diram kis.

³⁶Gurona vi Benyamin var ala donota vi segen suwsiyawa yo. May sa Israyella mun voksi jaŋ lo, dolay kayn hiɗi yalda ta ala soje sa baray tam Gibeyan ka'a.

³⁷Soje sa ay barayna li tuwsi koloyo, nisi mok Gibeya kil', nisi cuk kulo hay hoyok-ziyna, sum sa hayamna nisi calsi goy noŋ kaf hiɗi kew-gaferaŋa.

³⁸Sum sa Israyella vunsi ay ŋiray hiɗi sa hini hay Gibeyan ala nisi pat nukŋ kulo hay hoyok-ziyna.

³⁹Sumuna vi Israyel muɗ ŋorsiya, sumuna vi Benyamin ci sumun kuɗsi dok-ɦidi. Sa fi Benyamin di'e: Nay vatsiyawa ki nay vatsi jew nala lo.

⁴⁰Wum pa kayni, nuk ma ŋolla ka pat kulo hay hoyok-ziyna; sumuna vi Benyamin ɗuw bugolsi na kayni, hoyok-ziyn noŋ kaf cori slaw keŋ', kut ka pat kulo dukalawna.

⁴¹Sumuna vi Israyel muɗ ŋorsiya, sumuna vi Benyamin muɗawa nar ŋolo hay li ma nisi wiyawa ala ɓulak-goyta coowa kisiya.

⁴²Nisi muɗ ŋorsi mi sa Israyella, mun jaŋ hay hagata ta hay fulda. May sa Israyella min hinsiɗi, sum sa muni goy jaŋi hay hoyok-ziyn pana nisi vatsi goy kirap'.

⁴³Nisi ŋuy sumuna vi Benyamin cusl', digiɗsiya, taysi gaa kuɗ gaysiya, nisi min hinsi tun-sukka noŋɗi ta-ta kulo vun Gibeya hay gal ma kuɗuwn goŋ'.

⁴⁴Nisi ci kuɗ sumuna vi Benyamin sa wi duur birim doogo yam glafandi lo.

⁴⁵Segen sa muɗ ŋorsiya kay pir hay gal ma fulla hay hiɗiyta vi Rimmon, sa Israyella ci sumun kuɗsi birim vasl hay hagata; nisi jaŋ kuɗsi ta-ta hay Gideyom, nisi ci sum sara kuɗsi ir birim ma' lo.

⁴⁶Sumuna vi Benyamin sa nisi cisi hay buur namna noŋ kaf kayni, ŋaɓta visi co ir sumun birim dok-ma' yam vasl, kaf kayn si sum sa dono sa wi duur hiɗi kew-gaferaŋa.

⁴⁷Sumun kis-karkiya sa muɗ ŋorsi mi duura, sa pir goy hay fulda jik kay hiɗiyta vi sa Rimmonna, nisi lak ɗawni ta-ta ir til fiɗi.

⁴⁸Sum sa Israyella hoti bugolsi gar gurona vi Benyamin sa hinin lo; nisi ŋuy hoyok-ziyna visi kaf, nisi cal sumun goy hiɗi kew-gaferaŋ kaf, farayn lay, sle ma nisi fum kafna nisi ɓulakam goyo. hoyok-ziyn ma hin kulon kaf nisi ŋalam goyo.