Read Masana SA KA KITANA 21 Bible Online

SA KA KITANA 21 - Masana bible

SA KA KITANA 21

¹Gurona vi Israyel yi va kisi hay Mispa, nisi di'e: Sa jaray as vul goot-ca valam ca'a mi jafna wi Benyamin loɗi.

²Nisi tuɗ hay Betel, Ɗawni nisi tok tuwsi vok Ma-Vatɗina ta-ta hay vulatita, nisi kaf mun tiyn digi-digi', zimiy ma kirsin jaŋ goy ŋolo.

³Nisi di'e: Hi! Ma-Vatɗina, Lawna vi sa Israyella, lawt ta li ala vaydi hay Israyel jaf mara kep may loɗi kayn ti law mige?

⁴Hay buurta ka'ta nisi yaw kulo graw culum culum, nisi in giwin-ma-ɗifinna hay liy namna, nisi li ɗifin ma ŋal-goyna hiɗi ɗifinna vi lop ma slugona.

⁵Gurona vi Israyel di'e: Jar jafna vi Israyel noŋ kaf tani, sa ma may tuɗis hay tokŋa vok ir Ma-Vatɗinɗin mi gige? Kay nisi yi va kisi ala jarsi kaf sa ma tuɗis vok Ma-Vatɗina hay Mispaɗina, nam ma fi mitta.

⁶Gurona vi Israyel tun caw yor tuwsiya kay sle ma nisi lum tam guro-biyosina sa hay jafna vi Benyaminna. Nisi di'e: Yaya! Vayd kayn jaf mara kaawa goy jar gurona vi Israyel de su?

⁷Wulin kayn nay ma lum mi yal mige a vul boy mi sa hin kuɗsi irina, kay nay kay tuway yi va vok Lawn ala nay as vul gurona vay kuɗsi boyɗi?

⁸Nala nisi di'e: Hay jafna vi Israyel kaf kayni, sa ma may tuɗis vok Ma-Vatɗina hay Mispaɗina ka su? Ɗuw na kayni, hay hoyok-ziyna vi Yabes hay Galaad noŋ kaf kayni, sa ma tuɗis hay tokŋa kep kaw may noŋɗi.

⁹Nisi ŋaɓ sumun goyo, sa ma hay jafna vi Galaad hay Yabes kep kaw may jarsi noŋɗi.

¹⁰Nala tokŋa cuk sojen katsi birim doogo yam ma', disi ala: Tuɗgiya, sumuna vi Yabes hay Galaad nigi ma calsi goy kafe hiɗi kew-gaferaŋa, boyn lay gurosgurayna lay.

¹¹Kayn mi va ma nigi ma lumna: Nigi ma ci sa jufayn goy kafe, boy sa buri tam jufayn vatiya kaw nigi ma cisi goy kafe.

¹²Jar sumuna vi Yabes, nisi fi guro-boyn kis-fiɗi sa bay bur tam sa juf tuwa, nisi marsi hay farana hay Silo, hay nagata vi sa Kanaaniyana.

¹³Tokŋa kaf cuk sumuni tam gurona vi Benyamin sa piri kulo kay hiɗiyta vi Rimmon, kay tuɗ disi ala nisi toyawa hiɗi nisiya.

¹⁴Sa fi Benyamin hotay vo gosoyo. Guro-boy sa nisi hinsi ay iriya hay Yabes hay Galaadna nisi vulsita. May guro-boyn may as kisi noŋɗi.

¹⁵Nisi tun caw yor tuwsi kay va ma nisi lum tam sa fi Benyaminna, kay Ma-Vatɗina hin baŋa ma ŋolawa hay jafna vi Israyel.

¹⁶Sa maariyana jar tokŋa hot di'e: Wulin a jufay sa hini ɦawan ma fi boy kayn nay ma lum mi yal mige? Kay boyna visi ay vati goy kafe?

¹⁷La nay min ala jaf mara hay Israyel vat goyɗi, ŋaat kayn nay ma gar kay nisi biya jafsi goyo,

¹⁸nay kay tuway asay a vulsi boy jar guro-boyna vayɗi, kay nay yi va kaya, nay di ala sa ma vul goota valamawa mi sa fi Benyaminna ni, nam ma fi be'da.

¹⁹Nisi hot di lo: Ɗuwgiya, hay busat kaf kayni, yuldeta ta la' tam Ma-Vatɗina ka hay Silo, Silo ka hay gal ma gaana vi Betel, hay gal ma kuɗuwna vi hagat ta fokay hay Betel kal hay Sikem, hay gal ma kayamna vi Lebona.

²⁰Bugolda nisi vul hagata tam sa fi Benyamin ala tuɗgiya, bargi goy kuɗ gu gulda-guldana,

²¹nigi ma sar irgi goyo, hay li ma irgi wi guro-boyna vi Silo cukiyawa goyo kay pir nulla, nigi ma cuki goy kuɗ gulda-guldan pa; jar guro-boyn nisina, gigekaw kuɗgi ma bow goot-ca dono kep kep, kay tuɗ la' ca'a. Nigi ma hotgi hay nagata vi Benyamin may.

²²Hay li ma sumaysiya lebo ɓosiyosina coyawa yi vunma'a, numa ɗawn ma disi ala nigi hinsi guro-boyn nisin hinge, kay hay li ma duur li kayni, numa as a yaw boy mi sa lakŋɗi, kay nigi kaw may vulsi kuɗ haygiɗi kayn law may tuni kigiɗi.

²³Sa fi Benyamin li ki kayn nala. Nisi ŋra boyn kisiya jar guro-boy nisina sa pir nulla sa nisi moksi donona, bugolda nisi hot vo hay vocota visiya, nisi hot in hoyok-ziyn kulo'o, lak hayam ziya.

²⁴Bugol kayni. Gurona vi Israyel gigekaw hot vo hay jafamu, hay ziyna valamu valamu, nisi hot vo hay vocota visiya.

²⁵Hay liy namna kayni, mul may hay Israyel noŋɗi, gigekaw lum kayn mi law ma kuɗ hayamna.