Read Masana SA KA KITANA 4 Bible Online

SA KA KITANA 4 - Masana bible

SA KA KITANA 4

¹Bugol mitta vi Ehud, gurona vi Israyel hot li va ma firi dik Lawnɗi lo.

²Nala Ma-Vatɗina gussi goy ɓam Yabin, mul ma Kanaaniyana. Nam ti mulda valamu hay Hatsor. Sa ma ŋolla vi sojena valam yum Sisera.[4] Nam musi hay Haroset-Goyim.

³Gurona vi Israyella tiy tam Ma-Vatɗina, kay Yabin kayni keke-ma-duura valam kis-zleeŋe. Nam las gurona vi Israyel hiɗi dono ŋolo ta-ta busat dok-ma'.

⁴Hay liy namna kayni, Debora, cata jobta-Lawna, cata vi Lapidot, na' ay ti ta ka kitata vi Israyella hay na'ta.

⁵Na' musi gaa kuɗ gomota ta ya' ala Gomota vi Debora, jar Rama hiɗi Betel, kulo kay hiɗiyta vi Efrayim. Gurona vi Israyel co kay na' ma kaasi kitata visi kayn hay liy namna.

⁶Na' gi sun kay gar Barak goora vi Abinowam, ma ka hay Kedes hay nagat Neftalina. Na' dumu: Humaŋu, Barak, Lawna vi Israyella vul dit kayn taŋu: Tuɗaŋ vokaŋ ɗiger kulo kay hiɗiyt Tabor, gar sumun kuɗaŋ birim doogo jar gurona vi Neftali hiɗi gurona vi Zabulon.

⁷Sisera ma ŋolla vi sojena vi Yabin nam min gum iram ay taŋu, hiɗi keke-ma-duura valamu, hay li ma niy-ma-riŋŋa vi Kison, nan min vulum hay ɓaŋu.

⁸Barak hota' dita: La nak tuɗis hiɗi nanu, nan tuɗa, may la nak tuɗis hiɗi nanɗi, nan tu'ɗi.

⁹Na' hotom dita: Nan as tuɗis hiɗi naŋu, may seŋ naŋ as kay tiyɗi, kay Sisera Lawn vulum ɗawn hay ɓam ca'a. Bugol kayni Debora fok kulo'o, tun ira' hiɗi Barak hay Kedes.

¹⁰Barak yi jafna vi Zabulon hiɗi jafna vi Neftali talamu hay Kedes. Sumun tap kuɗum birim doogo, Debora tap hiɗi nam lay.

¹¹Hay na'ta Heber ma Keniyena ka musi goboy hiɗi Kedes, kay nam ay ɓuraway goy jewe hiɗi sa Keniyena segena sa hay jafna vi Hobab kuno Mususna. Nam in ziyna valam goboy tam gu-ma'asna ma ka hay Saananim.

¹²Labara co tam Sisera ala Barak goora vi Abinowam ka jik kulo'o kay hiɗiyta Tabor.

¹³Nala Sisera tok keke-ma-duura valam kaf, keke-ma-duura ma ini hiɗi kawayna kis-zleeŋe. Nam tok sum sa kuɗumna kaf kaw, toksi ay hay Haroset-Goyim pa marsi hay niy-ma-riŋ goyna vi Kison.

¹⁴Debora di tam Barak: Fokaŋ kulo'o, kay buur ma Lawn min vul Sisera hay baŋu coowa vaydi, awa, Ma-Vatɗina ɗaw tuni vokaŋŋi. Barak jikay gaa kay hiɗiyt Tabor pa hiɗi sumuna valam sa duur kuɗum ɓirim doogo.

¹⁵Sisera hiɗi kekena valam ma duur noŋ kaf, hiɗi sojena valam noŋ kaf, Lawn munsi jaŋi vok Barak calsi hiɗi kew-gaferaŋa.

¹⁶Barak digiɗ sojena hiɗi keke-ma-duura ta-ta hay Haroset-Goyim. Sojena vi Sisera noŋ kaf nam cisi goy hiɗi kew-gaferaŋa, sa kep kaw hin kuɗsiɗi.

¹⁷Sisera pir jaŋ hiɗi selemu kay tuɗ ŋay hay guɗukŋa vi Yayel cata vi Heber ma Keniyena. Kay hay liyn namna kayni Yabin mul ma Hatsor ŋaat ka jaram hiɗi ziyna vi Heber ma Keniyena.

¹⁸Yayel kali goy kir Sisera dumu: Naŋaya, sam-ŋolla, naŋaya kalaŋ kalaf vanu, tuwaŋ li narɗi. Nam kal kalaf va'a, na' kusuɓum yalam hiɗi borgona.

¹⁹Nam di ta'a: Nan siɗawagu, nak vulan niy ma ci doge, kay laat ka lanu. Na' poŋ yam ŋalayta va' ta hiɗi miira goyo, vulumta, nam ci'e, bugolda na' hot kusuɓum yalamu.

²⁰Nam hot di ta'a lo: Colag kag hay vun-ziyn na zaw, la sa coy jobawa ala sa ka tan su ni, nak hotom dit ala sa mayɗi.

²¹Yayel cata vi Heber sli gu-meɗemna ma ka buri hay daŋ-ziyna kepe, na' sli gu-ɓalla hay ɓa' kepe may; na' ma talam hiɗi ŋali, pum meɗemna kuɗ zeŋ-humamu (cum kalam hiɗi ɓalla) meɗemna duɓ goy gaa vi nagata. Nam cap mitis nala, kay na' fum kayni buri sen to-to'.

²²Barak ay bugolom kay slum selemu, Yayel kali goy kiramu, ka dumu: Naŋaya, nan min ɗekaŋ kay sa ma naŋ min garamna. Nam kal kalaf va'a, cuk iram na kayni, Sisera ka buri gaa danan tal-tal', mitiya, meɗemna piy kuɗ zeŋ-human zaw may.

²³Hay buur namna kayni, Lawn hot yam Yabin mulla vi Kanaan gaa kuɗ sa Israyella.

²⁴Nisi so tuwsi dono'o tam Yabin mul ma Kanaanna, ta-ta nisi ɦo mulda valam gaa kirɓicik'.