Read Masana SA KA KITANA 5 Bible Online

SA KA KITANA 5 - Masana bible

SA KA KITANA 5

¹Hay buur namna, Debora hiɗi Barak goora vi Abinowam gi nulla di'e:

²Sum sa ŋulona tunawa vok gurona vi Israyel yo, gurona vi Israyel tuwsi kotawa kay li duur yo, suburay Ma-Vatɗina.

³Muliyana, nigi humgiya, gurona vi muliyana, jakgi humgiya. Nan min gi nulu, awa, nan min gi nul tam Ma-Vatɗina, Lawna vi sa Israyella.

⁴Awa, Ma-Vatɗina, hay li ma naŋ kali goy hay Seyir pa, hay li ma naŋ may goy hay nagat Edom pa, Nagat tun caw wira, dukalawna gur goyo, Ɗugulla ɦuwal goy niyo.

⁵Hiɗiyna tun caw geɗ vokaŋu, hiɗiyta Sinay kaw geɗ vokaŋ naŋ Lawna vi Israyel.

⁶Hay buura vi Samgar, goora vi Anat, hay buura vi Yayel, haga ma sumun tuɗ hayamna hini goy hin'. Sumun sa tuɗ rogoyn slum mi haga ma calay goyna.

⁷Hay nagata vi Israyel noŋ kaf mul ma dono mayɗi, May nan Debora, hay li ma nan fok kulon kayni, nan fok kulo ki nan ti sum gurona vi Israyel nala.

⁸Fisi lakn garam mi laway ma wuliya, dolay na kayn duur ka tuɗay hay vun-ziyna visi ɗaw. Sum sa duura birim dok-fiɗi tuni hay Israyel tan ɦawa'a, marayt tayɗi, kaway-ma-duur mayɗi lay.

⁹Nan dikan min sum sa Israyel ŋolo, sum sa tuwsi koti kay tuɗ vun duura nisi kiran ŋaa ŋolo. Suburaygi Ma-Vatɗina.

¹⁰Nigi sa poy kay kuro ma haɓayna, nigi sa lakay hay tapina Nigi sa poygi hay hagana, ligi nulu.

¹¹Nigi sum sa dur ɓarawta, goy hay liyn ma gi niyn mi farayn pa, tiygi sem Lawna, kuɗ ŋaata valam ta nam la'ta, ŋaata ta nam la' tam sa ma nam tunum vok sa Israyella, tunum voksi kay ɗeksi kay hagata. Gurona vi Israyel cukawa goy hay vun-galan yo.

¹²Zliyag kulo'o, zliyag kulo'o Debora, gag nulu. Fokaŋ kulo'o, Barak, goora vi Abinowam, tuɗaŋ hiɗi sum sa gorvona vaŋu.

¹³Yawwa! Dir sumuna vay ma hini ne'na kolawa kay sum sa donon yo! Lawn vulan donotawa kay kol kay sum sa donona.

¹⁴Sum sa ay hay nagat Amalek coowa jar sa fi Efrayimna, Benyamin ka jargiya, jar vokŋa vigiya, sum sa ŋulona may goy hay Makir pa, sumuna vi Zabulon cuk sum sa wi duurayawa jaraya.

¹⁵Sa ŋulona hay jafna vi Isakar tapawa kuɗ Debora, sa fi Neftalina tapawa kuɗ Barak, nisi tapawa kuɗumu gaa hay liyn ma beɗna, goboy hiɗi liyn ma niyn-ma-riŋ goyna vi Ruben. May nisi hayɗin vunsi ŋray a tuɗ vun duurɗi.

¹⁶May naŋu, naŋ musi jar farana vi luwayna, kay humum mi tiyna vi farayn ɦawa'a kay mige? Hay liy ma niyn-ma-riŋ goyna vi Ruben, may nisi kayɗin vunsi may ŋray a tuɗ vun duurɗi.

¹⁷Sumuna vi Galaad goy bugol niy-lumna Yordan, min hin ziyna visi ay goyɗi, sumuna vi Dan min lak kulo gal lumayna visi ɦawa'a kay mige? Sumuna vi Aser ka dakay kulo deŋel niy-lumna, ka tun suksi hay liyna visi ma lak lumayna.

¹⁸Sumuna vi Zabulon si sum sa tuwsi li nar kay mittaɗi, Sumuna vi Neftali kaw nisi nala, ka goboy kay tuɗ vun liyn ma duur hayamna.

¹⁹Muliyan co'o, nisi li duura. Awa, muliyan sa hay Kanaan dur hay Taanak goboy vun niyn Megiddo. May nisi as a yaw gurju hay vun duurɗi.

²⁰Hay dukalawn pa mislekŋa co kay dura, nam sli hagata valamiya, co kay dur Sisera hiɗi sumuna valamu.

²¹niy-ma-riŋŋa vi Kison yawsiyawa, niy namna ma hay liyn ma ɓa-ɓana, niy namna vi Kison. Ciwta vanu, tayag sum sa donon gaa kuɗ segu.

²²Nisi muni jaŋi, awa sojena visi muni jaŋ gosoyo, sem kulumayna visi ma duura tiy gaa kay nagat rim-rim'.

²³Beɗgi nagat Meroz, din mi sunda vi Ma-Vatɗina. Beɗgiya, beɗgi sum sa hay nagat na'tina, kay nisi min dur duura vi Ma-Vatɗinɗi, nisi min gi dirsi kuɗ Ma-Vatɗina jar sumuna valam sa kursulinɗi.

²⁴Jar sa boyn kaf bolda ka kay Yayel cata vi Heber ma Keniyena, awa, jar boyn kaf sa ka laki vo hay ziyna, bolda ka' suwsiya.

²⁵Sisera joba' kay niyo, may na' vulumti mi miira, miir ma yalam mulu hay ŋalayta ta ya' kuluɓita.

²⁶Hay ɓa' ta kepta na' vi meɗemna, na' sli gu-kuɓulusna ma sumun li lop hiɗi namna, hay ɓa' ta heta, ta jufta; Na' ci Sisera kalam til' munum yalam goyo, ɓetem yalam gaa ma', munum zeŋ-humam goyo.

²⁷Nam her gaa jar gaya'a, nam cap ligat gaa kay nagata, nam cap ligat gaa hay liyn ma nam her gaa hayamna na zaw, suk may hin hayam loɗi.

²⁸Goy hay ir-ziyda, sum Sisera ka ɗuwa, goy hay vun-galana sulum ka siwela: Hiyo! Keke-ma-duura valam may co gosoy vaydɗin ana loge?

²⁹Boy sa yalla jar boy sa hay mulda hota' dita, na' kay tuwa' hot dit mi tuwa' lay,

³⁰Slen ma liys yaway kisi vun duur ŋol klasige, Goot-cat kep lebo ma' kay sa ma kepna klasige. Sligar ma goɗina maram ɗawni cukum mi Sisera, Sligar ma ciliyna ma ŋaana, sligar ma ciliy kuɗ batam ma'na maram ɗawn kaam tam sum sa ay vun duura.

³¹Ki kayn nala sum sa gaw kaŋŋa vatis goy vatge Ma-Vatɗina. May nisi sa minaŋu hinsi muɗ ki fatta ta day kulo hiɗi kuwa'ta nala muɗge. Ki kayn nala nagat mus hay sle'ta ta-ta busat dok-fiɗi.