Read Masana SA KA KITANA 7 Bible Online

SA KA KITANA 7 - Masana bible

SA KA KITANA 7

¹Yerubaal ma yum Gedeyonna, hiɗi sum sa kuɗumna kaf fok kulo graw culum, tuɗ tok tuwsi goy hay gal niy-ma-riŋŋa vi Harod. Sum sa Madiyanna vokŋa visi ka viy hay gal ma gaana, hay gal hiɗiyta More, gaa hay liyn ma beɗna.

²Ma-Vatɗina di tam Gedeyon: Sum sa kuɗaŋŋa suwi ŋolo, nan as vul sum sa Madiyanna hay ɓisiɗi, kay a nisi ma subur tuwsi katanu, di ala but tuwsi goy kayn hiɗi donota visi kay tuwsiyaɗi.

³Siwelaŋis kulo hay hum sumun ɗeŋe disi ala sa ma narta hiɗi ɓolda hay dikamna hot vo'o; hiɗiyt Galaad zawni nam vi tuwan goy ta' gine'e. Sumun jarsi birim dok-ma' yam ma' hot vo'o, sumun hin kuɗum birim doogo.

⁴Ma-Vatɗina di tam Gedeyon: Sum sa hini kuɗaŋŋa ka hiɗi ŋolsi dok-doko, naraŋ sum nisin kel niyna, nan min poŋaŋgi irsiya. La nan daŋawa ala zawn tuɗ hiɗi naŋu, nam ma tuɗ hiɗi naŋu, zawn tuɗ hiɗi naŋɗi, nam ma tuɗ hiɗi naŋɗi may.

⁵Gedeyon tuɗ sumun kel niyna. Ma-Vatɗina di talamu: Sum sa zlak niyn hiɗi sinsiya ki durnayn naana naŋ ma ɓurawsi irsi goy visiya hiɗi sum sa ci niyn girifi gaa'a hiɗi ŋulofsina.

⁶Sum sa zlak niyn hiɗi ɓisiya kay naram kulo hay vunsiya nisi kis-ɦidi. Ŋolsi segen kaf kayn ci niyn gaa hiɗi ŋulofsi girifi dam dam'.

⁷Ma-Vatɗina di tam Gedeyon: Nan min but sa Israyel goy ɗawni hiɗi sum sa kis-ɦidi sa zlak niyn hiɗi sinsin tani, sum sa Madiyanna nan min vulsi hay ɓigiya, may ŋolgi ma hinin kaf kayni, gigekaw hot vo'o.

⁸Sum sa hot vona nisi yaw tina hiɗi togolomna visi ma hay ɓisina, telem gaa'a. Gedeyon hin sum sa kis-ɦidin kuɗumu, vok ŋolla vi gurona vi Israyel nam gisi irsi vo'o, gigekaw vo hay ziyna valamu valamu. Vokŋa vi sa Madiyanna ka tuni gaa bugolsi hay liy ma beɗna.

⁹Ma-Vatɗina di tam Gedeyon hay henjeta: Fokaŋ kulo'o, tuɗaŋ hay liyn ma nisi ka moli hayamna, kay nan vulsiyawa hay ɓaŋu.

¹⁰La naŋ li nar kay tuɗ ma vaŋ kepna ni, vaŋ Pura ma sunda vaŋ kuɗaŋu.

¹¹Naŋ ma jak humaŋ tam law ma nisi ka dumna, bugol kayni kursulit ma kal hay dikaŋu, tuɗaŋ hay liy ma nisi ka moli hayamna wulini. Nam hiɗi Pura ma sunda valam kaliya, ta-ta nisi co hay liyn ma soje sa ka yam liyna tuni hayamna.

¹²Sum sa Madiyanna, sum sa Amalekŋa, hiɗi sum sa gal kuɗuw pana ka meri goy siɗak-ɗak' jar hiɗiyna, nisi ŋol ɦini-ɦini' ki baara nala, lamgana visi kaw sa as a ŋaɓam noŋɗi, suwi ŋol ki ŋesl ma goloŋ kel niyn nala.

¹³Hay li ma Gedeyon co kayni, ɗuwa, san kep ka vi sem duwayta ta dumta mi niramna, ka dum ala: Ɗuwaŋu, duwayt dan ala fu-orgena ka poy jar sum sa Madiyanna, nam co ta-ta tam guɗukŋa, tupa talamu, guɗukŋ nig gaa'a muɗ kulo danani, cap nig goy gaa'a.

¹⁴Niramna hot dumu: Ma fum ɗawn mi kew-gaferaŋa vi Gedeyon goora vi Yowas ma Israyella de ɗisu? Sum sa Madiyanna hiɗi vok-ma-duura visi noŋ kaf Lawn vulsiyawa hay ɓam Gedeyon ɗisu.

¹⁵Van li nala hay li ma Gedeyon hum labara vi duwayta hiɗi cawa' ma diy goyna humna, nam girif gaa'a. Nam hot jar vok-ma-duura vi Israyel disiya: Yawgi kulo'o, kay Lawna vul vok-ma-duura vi sum sa Madiyannawa hay ɓigiya.

¹⁶Sum sa kis-ɦidina nam kaasi irsi goy ir vok hiɗi, nam vulsi togolom kisi kep kep kafe, vulsi genna ma hayam goy ɦawa kisi kep kep lay, gi vun kut hayam kep kep lay.

¹⁷Nam disiya: Nigi ma ɗuwanu, nigi ma li va ma nan lumna kaw, hay li ma nan coowa jar vokŋa visiya, va ma nan ma lumn ɗawn nigi ma lum kaw.

¹⁸Hay li ma nan hiɗi sa kuɗanna buw togolomnawa, nigi kaw ma buw togolomna goy bugol farana visiya: Nigi ma di'e: Vi Ma-Vatɗina vi Gedeyon kaw.

¹⁹Gedeyon hiɗi sum sa kuɗum kisna co kulo vun vokŋa vi segen goboyo. Liyn goboy hiɗi ŋomda-henjeta ta jaata, sum sa ŋomda nisi muɗsi kayni may musi ŋolɗi. Nisi buw togolomna, to genna ma hay ɓisin kaf goyo.

²⁰Vokŋa visi ma kaay goy ɦidina buw togolomna kafe, to genna visi goy kafe kaw, vun-kuta nisi va' hay ɓisi ma gulla, togolomna nisi vum hay ɓisi ma jufna kay buwumu. Nisi siwela di'e: Kew-gaferaŋa vi Ma-Vatɗina, vi Gedeyon kaw.

²¹Nisi ŋuy farana, gigekaw col hay liyn ma nam hayamna hayamna. Sum sa hay farana kaf tun caw jaŋa, tun caw ciriya, tun caw pir kaw.

²²Sum sa kis-ɦidina buw togolomna sem mara lo: nala sum sa hay farana Ma-Vatɗina muɗsi kew-gaferaŋa visi tam tuwamu, nisi mun jaŋi ta-ta hay Bet-Sita hay gal Cerera ta-ta kulo vun Abel-Mehola goboy hiɗi Tabbat.

²³Sum sa Israyella tok tuwsiya, sa fi Neftalina, sa fi Aser hiɗi sa fi Manasena kaf, nisi jaŋ kuɗ sum sa Madiyanna.

²⁴Gedeyon cuk sa sunda tam sa kulo kay hiɗiyta vi Efrayim kaf kay disiya: Jikgiyay gaa'a, kaagi vok sum sa Madiyanna, niyna vi Bet-Bara hiɗi niy ma Yordanna nay hinsi a ɦawam kuloɗi. Sumuna vi Efrayim kaf tok tuwsiya, haga ma ɦaw niyna hay Bet-Bara hiɗi ma hay Yordan nisi slum goy kafe.

²⁵Muliyana vi Madiyan sa ma'na Oreb hiɗi Zep nisi yawsiya; Oreb nisi cum kulo kay hiɗiyta vi Oreb, Zep nisi cum goy hay liyn ma kesl gulda-guldana vi Zep, nisi digiɗ sa Madiyanna lo, nisi mar yam Oreb hiɗi yam Zep mi Gedeyon goy gal bugol niy-lumna Yordan.