Read Masana SA KA KITANA 8 Bible Online

SA KA KITANA 8 - Masana bible

SA KA KITANA 8

¹Sumuna vi Efrayim di tam Gedeyon: Naŋ li van ki kayn nala katma'a kay mige? Hay li ma naŋ tuɗ dur sa Madiyanna, naŋ min dumaɗi kayn kay mige? Nisi gar cirepta ŋolo hiɗi namu.

²Gedeyon hot di tisiya: Nigiya, va ma nan lum a ŋra hiɗi nigin mi mige? ɦelena vi wana ma nigi garamna nam suw wan kay tuwamu ma gurona vi Abiyezer feɗemna ɗisu?

³Oreb hiɗi Zep muliyana vi Madiyan Lawna vulsi kayn hay ɓigi nigiɗi su? Va ma nan lum asay ŋray hiɗi nigina mi mige? Hay li ma nam disi ki kayn nala dina, diksi bulasa.

⁴Gedeyon hiɗi sumuna valam sa kis-ɦidina co hay Yordan, jik kay Yordan kaw, nisi ay makay ŋolo, may ka sli sem sa Madiyanna dok-dok.

⁵Gedeyon di tam sum sa hay Sukkotna: Nan siɗawgiya, sum sa kuɗanna nigi vulsi va ma ti ne', kay nisi makay ŋolo, kay nan ka sli giɗer Zebak hiɗi Salmuna, muliyan sa hay Madiyanna.

⁶Muliyan sa hay Sukkotna di'e: Naŋ hiɗi sojena vaŋ numa vulgi va ma tin kayni Zebak hiɗi Salmuna yaway kigi yaw su?

⁷Gedeyon disiya: Kayn ŋaa'a, hay li ma Zebak hiɗi Salmuna Lawn vulsi ayawa hay ɓanu, nan ma jetgi sliwgi goy ne' ne' hiɗi zigiy ma fulla hiɗi zigiy-olla.

⁸Nam fokis hay liy namna pa kal hay Penuwel. Sum sa hay Penuwel nam jobsi va ma ti kaw. Dit ta nisi hotomtita ŋray ca ki sum sa hay Sukkot nala kaw.

⁹Sum sa hay Penuwel nam ka disi ala: La nan hotiyawa ŋaa'a ni, gulmun namna zawni nan min ɦom gaa'a.

¹⁰Zebak hiɗi Salmuna ka hay Karkor, hiɗi dir sojena visi kuɗsi ir ki birim doogo yam vasl nala. Kayni mi dir sojena vi sum sa gal kuɗuwna ma hinina tuta. Sa birim kis kalam dok-ma'na sa wi duura ciy goy kafe.

¹¹Gedeyon jik hay hagata vi sum sa li ziy hay guɗukŋa, hay gal ma kuɗuwna vi Noba hiɗi Jokbeha. Soje sa hay liy namna var ala nisi ŋayawa, may nam co cisiya.

¹²Zebak hiɗi Salmuna pir jaŋi, nam jaŋ kuɗsiya, muliyan nisi sa ma'na vi Madiyan nam yawsiya, sojena visiya nam jaysi goy pek-pek'.

¹³Gedeyon goora vi Yowas hotay bugolomu hay duur pa. Nam sla'ay ti hagata ta hay Heresta.

¹⁴Goor ma joriyo kep hay hoyok-ziyna Sukkot, nam vumu jobom kay sem sum sa ŋulona hiɗi sa ŋom hoyok-ziyna Sukkot. Goor namna ɗosi semda visi gaa'a. Nisi noŋ kaf sumun dok-siɗiya yam siɗiya.

¹⁵Bugolda nam co tam sum sa hay Sukkotna nam disiya: Heɗe! Zebak hiɗi Salmuna lakŋi; nigi panan ala nan hiɗi sumuna van sa kuɗanna la numa makay ŋol kaw nigi vulma va ma ti kayn nisi yaway kuma lak su? May nisi lakŋi.

¹⁶Nam yaw sum sa ŋulona sa hay hoyok-ziyna hiɗi sum sa hay Sukkotna kaf, nam watsi hiɗi zigiy ma fulla hiɗi zigiy-olla.

¹⁷Gulmunna ma ŋuyi tam Penuwel kaw nam ɦom gaa'a, sum sa hay hoyok-ziyna nam cisi goy kirap'.

¹⁸Nam di tam Zebak hiɗi Salmuna: Sum sa nigi cisi hay Tabor nisi ay nanige? Nisi hot dita: Nisi ay slaŋ naŋ nala, nisi kaf voksi ay ki vok gurona vi muliyana nala.

¹⁹Gedeyon disiya: Nisi kayni si ɓosiyonna, gurona vi sunu. Hay sem Lawna! Lali nigi hinsi hini iriya, nan kaw as a cigi nigi goyɗi lay.

²⁰Nam di tam Yeter goora valam ma ŋolla: Yeter, fokaŋ kulo'o, cisi goyo. May goor ma joriyona min calsi hiɗi kew-gaferaŋaɗi, tuwam nari kay nam ay goor tuwa.

²¹Zebak hiɗi Salmuna di'e: Fokaŋay kulo'o, cuma goyo mi naŋ kay tuwaŋu. Kay donom as sa jufn kayn mi sa jufn lay. Gedeyon kay tuwam fok kulo'o, nam cisi goyo, ganna ma kel lamgana visina nam yawamu.

²²Sum sa Israyella di tam Gedeyon: Wulin kayn taŋ mul kuma'a, tunis taŋ naŋ pa, tam goora vaŋ kaw, tam guro-ŋolona vaŋ kaw, kay mige suɗma goy hay ɓam sa Madiyanna kayni mi naŋu.

²³Gedeyon disiya: Nan as ti mul kigiɗi, gurona van kaw as ti mul kigiɗi lay, ti mul kigi mi Ma-Vatɗina tuta.

²⁴Gedeyon disiya: Nan jobgi va'a: Wayta ta nigi yawa'ay vun duura nigi ma vulan kep kep. (Kay sum sa nisi kol kisina ka hiɗi ora, nisin si sum sa Ismayelitna.)

²⁵Nisi dumu: Numa vulaŋga hiɗi hayma haɓi. Nisi bar sligar gaa'a, gigekaw cuk wayta valam ta nam yawa'ayt gaa'a gaa'a.

²⁶Ora ma Gedeyon jobsi kalamna co goboy ir kilo dok-ma'. Sle guray ma ganta, sle ma cukum humna, sligar purpella ma muliyana vi Madiyan cukum tisina, hiɗi kerme ma kel lamgana visin kaw may ŋayɗi.

²⁷Gedeyon in va ma girifimna kep hiɗi namu, nam colom hay hoyok-ziyna valam hay Ofra zaw. Nam muɗ kayni mi va ma gurona vi Israyel li tuwsi viyuw hiɗi namu. Va namna gan jawta vok Gedeyon hiɗi ziyna valam kaf.

²⁸Sum sa Israyella hot yam sum sa Madiyanna gaa kuɗsiya, nisi fi a di delsi kulo ɗeŋ noŋɗi. Nagat fi tun-sukka ta-ta busat dok-fiɗi. Kayn hay li ma Gedeyon ka iri tuwana.

²⁹Yerubaal goora vi Yowas hot vo'o, nam mus hay ziyna valamu.

³⁰Gedeyon vuɗ guron dok-siɗiya, kayn si sa nam vuɗsi kay tuwamna, kay nam yaw boyn ŋolo.

³¹Cat ta sunumta ta goy Sikem vuɗum goor kep lay. Goor namna nam tunum selem ala Abimelek.

³²Gedeyon goora vi Yowas mit kayn muɗi busay ŋolo. Nisi pum hay Ofra, hay zulda vi bulum Yowas, kayn ti zulda vi jafna vi Abiyezer.

³³Bugol mitta vi Gedeyon kayni, gurona vi Israyel tun caw li tuwsi viyuw kuɗ Baal lo, nisi tun caw ɗuw Baal-Berit ki lawna visi nala.

³⁴Lawna Ma-Vatɗina ma but sa Israyel goy hay ɓam sa gawta sa ŋuyi tisina humsi min gisi kalam loɗi.

³⁵Yisi jok kay li ŋaat tam ziyna vi Gedeyon ma yum Yerubaal; humsi min gisi kay ŋaata ta nam la'ays tam sum sa Israyella loɗi.