Read Masana SA KA KITANA 9 Bible Online

SA KA KITANA 9 - Masana bible

SA KA KITANA 9

¹Abimelek goora vi Yerubaal* kal hay Sikem tam ɓosiyom sulumna, hiɗi sa hay jafna vi bum sulum kaw; kayni mi va ma nam di tisiya:

²Nan siɗawgiya, nigi ma di tam sum sa hay Sikem ala: Nigi min ala gurona vi Yerubaal dok-siɗiya kaf kayni ti mulda kigi si nisiya lebo ŋaan mi sa ma ti mulda kigi valam kepna su? May humgi ma gigi ala nan mi sliwgi nigiya.

³Ɓosiyom sulumna tuɗ dit mi sum sa hay Sikem kaf. Nala ŋalda visi tun kayn kay Abimelek. Nisi di jar-tuwsiya: Nam kaw mi ɓasuyna.

⁴Nisi vulum gurjuta ir sikel dok-siɗiya, Gurju na'ta nisi yawa'ay goy hay ziyna vi Baal-Berit pa, nam yaw gurjut na'ta, gus sum sa yisi may tuɗ ŋaaɗina hiɗi sum sa ŋalda visi kiɗayna, nisi tap kuɗumu.

⁵Nam ma hay ziyna vi bulum hay Ofra, ɓosiyomna gurona vi Yerubaal dok-siɗiya noŋ kaf nam cisi goyo, kulo kay hiɗiyn na kep. Hin goy kuɗsi mi Yotam kep, kay nam ŋay goyo. Nam mi ma joriyona jar gurona vi Yerubaal.

⁶Sum sa ka hay hoyok-ziyn Sikem noŋ kaf hiɗi sum sa hay Bet-Milo tok tuwsiya, nisi co tam Abimelek tunum mulu; kayn goboy hiɗi gu-ma'asna ma ka hay Sikem.

⁷Labara kayni co tam Yotam, nam tuɗa jik kulo sin hiɗiyta vi Garizim. Nam siwel tisi hiɗi delem kulo'o di'e: Nigi sum sa hay nagat Sikemna humgiya: Lawna kaw jak humam tigi lay.

⁸Guwayn tok tuwam kay tun gu mara kulo kalam mulu. Nam di tam gu olivena: Tunaŋ mul kuma'a.

⁹May gu-oliven hotsi dit ala: Nigi var ala mul ma may goy hayan pana, Ma ka sleɗ hay Lawn lay sleɗ hay sumun layna, Nan ma hinim goyo tuɗ ti mul kulo kay guwayna kay mige?

¹⁰Guwayna hot di tam gu-gumna: Naŋ naŋaya taŋ mul kuma'a.

¹¹May gu-gumna hotsi dita: Nigi min ala luma'da vanu hiɗi vuɗ-guna van ma ŋaana nan ma hinim goy hini, tuɗis ti mul kay guwayna kayni kay mige?

¹²Guwayna di tam gulda-guldana: Naŋ hayɗin naŋaya, taŋ mul kuma'a.

¹³May gulda-guldana ka hotsi dita: Vin ma jibetna ma may goy hayan pana, ma ka sleɗ dik Lawn lay, ma ka sleɗ dik sumun layna, nan ma hinim goy hini, tuɗis ti mul kay guwayna kayni kay mige?

¹⁴Guwayna hot di tam gu-biremna: Naŋ naŋay taŋ mul kuma maŋu.

¹⁵Gu-biremna hot dit tam guway hegena: La nigi min tunan mul kayni hiɗi dik ta gasita ni, nigiyaya, ŋaygi gaa kuɗ ŋusanu, may la hiɗi dik ta gasitɗi ni, kut ma kali goy hay zigiyan pa, na' ma ŋal gu-gamna ma ka hay Libaŋ goy kafe.

¹⁶Wulin kayn Abimelek nigi tunum mul kayn hiɗi dik ta gasita, hiɗi haygi kep kaw ala nam ma ti mul kigiya su? Nigi var ala nigi la' tam Yerubaal hiɗi ziyna valam kayn ti ŋaata su? Nigi wurakamti kayn mi lop ma nam lum kigin su?

¹⁷Kay bun kayni nam dur kigi ŋolo, nam may var kay irita valamɗi, Nam butgi goy hay ɓam sum sa Madiyanna.

¹⁸May nigiya, nigi fok kulo kat ziyna vi bunu, nigi ci gurona valam goyo, sum jufayn dok-siɗiya, nigi cisi kulo kay hiɗiyta ta na kepta. Abimelek nam mi goora vi cat ta gorvo'o. May nigi tunum mul kay Sikem ala nam mi ɓasukina.

¹⁹Yo! Ŋaa'a, la nigi li va namna tam Yerubaal hiɗi ziyna valam kayni hiɗi dik ta gasita ni, Abimelek ma sleɗgi haygiya, nigi kaw ma sleɗem hayam lay.

²⁰May la naɗina, kut ma kali goy hay Abimelek pa, ŋal sum sa hay Sikem hiɗi sum sa hay Bet-Milo pa kaw, na' ma ŋal Abimelek goy lay.

²¹Bugolda Yotam pir jaŋi, nam kal ŋay goy hay Beer. Nam mus goy gine'e hiɗi goor-bulumna Abimelek.

²²Abimelek ti mulda hay Israyel ir busat ɦidi.

²³Bugol kayni sum sa hay Sikemna min hum kuɗ Abimelek loɗi, kay Lawna gi ŋusta ta joota aya kay kal ŋel-vunda hay diksiya.

²⁴Kay Abimelek nam ci ɓosiyomna sa dok-siɗiya sa gurona vi Yerubaal goyo, sum sa hay Sikemna kaw si sa tap kuɗumu kay li joo na'ta. Nala busuw ma nisi ɦokom goyna ma hot kisiya. Joota ta nisi la'ta wurakŋa va' ma hot kisi lay.

²⁵A li joo tam Abimelek kayni, sum sa hay Sikemna lak sumun kulo kay hiɗiyna, sum nisin bari kayni kay cigeɗ sumuna sa jik hay hagata. La sa jikawa tisi goboy hay hagata ni, sum nisin yaw slen kalam kaf. Labar kayni co tam Abimelek.

²⁶Ga'al goora vi Ebed co hiɗi ɓosiyomna, nam jik hay Sikem. Sum sa hay Sikemna ɗuwum ki nam mi sa ma ŋaa'a nala.

²⁷Nisi tuɗ goy hay sinena, nisi ja vuɗ gulda-guldana visiya, keslemu, nisi li yuldeta, nisi li firi ŋolo. Nisi cuk hay ziyna vi lawayna visiya, nisi ti'e, ci'e, beɗ Abimelek kaw.

²⁸Ga'al goora vi Ebed di'e: Abimelek noŋ kayni mi gige? Sum sa hay Sikemna sun Abimelek suntige? Namu mi goora vi Yerubaal, tun Zebul mul kay sumun kayn mi namɗi su? Sungit si gurona vi Hamor sa sumay nagat Sikemna. May nigiya, nay sunay Abimelek ɗawn suntige?

²⁹Hi! Lali sumun tan disi lawsi mi nanu ni, Abimelek nan ram ti mulɗi. Nam di'e: La Abimelek mina, nam gar soje sara'a tam sa falamna, kal ay goy disu?

³⁰Sle ma Ga'al goora vi Ebed dum kafna, Zebul guverner ma hay hoyok-ziyn namna humum kafe, nam muɗ ɦiya.

³¹Nam cuk sumun tam Abimelek goy ŋayaya, nisi tuɗ dum ala: Humaŋu, Ga'al goora vi Ebed co tani hiɗi sumun kuɗumu, nisi fok dik sum sa hay hoyok-ziyn kulo kataŋu.

³²Wulin kayn la liyn laawa henje'e, fokaŋiya, hiɗi sum sa kuɗaŋŋa, naŋ ma bar goy hay sinena.

³³Graw culumta hay li ma fatta dayawa, naŋ ma mok hoyok-ziyna, naŋ hiɗi sum sa kuɗaŋŋa, hay li ma nam hiɗi sum sa kuɗumna kalisawa goy kiraŋu, naŋ ma lisi va ma kuɗ hayaŋŋa.

³⁴Hay henjeta, Abimelek hiɗi sum sa kuɗumna kaf yaway kulo'o, nisi tuɗ bar goyo, goboy hiɗi Sikem, ka irsi goy ir vok fiɗi.

³⁵Ga'al goora vi Ebed kaw kali goyo, nam col goy hay vun-galana ma ka kulo hay hoyok-ziyna. Abimelek hiɗi sum sa kuɗumna pat tuwsiyay goyo hay liyn ma nisi baray hayamna pa.

³⁶Ga'al iram wi sumuna. Nam di tam Zebul: Iran ka wi sumuna ka jikay gaa kay hiɗiyta pa. Zebul hotom dita: Kayni mi ŋus hiɗiyna, may naŋ ala kayni mi sumu'u de su?

³⁷Ga'al hot sli ditiya di'e: Ka jikay gaa hay liyn ma diŋiriŋŋa vi nagat pa kayn si sum gasiya. Vok hena ko co'o hay hagata ta jik gaa kuɗ gun ma tun gireyn gaa kuɗumna.

³⁸Zebul ka dumu: Wulini vunaŋ ma di law ma galakŋa ka ara loge? Naŋ di ala Abimelek nigi hum kuɗum kayn nam mi gige ɗisu? Tuɗi zawn si sum nisi sa naŋ law tisi joon yo, tuɗaŋ kirsi dursi yo ɗisu?

³⁹Ga'al tun vok sum sa hay Sikemna, nam ŋaf duura hiɗi Abimelek.

⁴⁰Abimelek digiɗimu, nam pir vok Abimelek jaŋi, sumun ŋolo fi cita-goyta, vunsi co ta-ta kulo hay vun-galana vi hoyok-ziyna.

⁴¹Abimelek tuɗ mus hay Aruma, may Zebul digiɗ Ga'al hiɗi ɓosiyomna, hinsi a lak ziy hay Sikem loɗi.

⁴²Hay buurta ka'ta, sumuna cukay goy hay sinena, hay li ma Abimelek hum labara visiya,

⁴³nam yaw sumuna valamu, ɓurawsi irsi ɦidi, nam bar hiɗi nisi goy hay sinena, hay li ma nam wi sumun ka cuki goyo, nam fok kulo kirsiya cisi goyo.

⁴⁴Abimelek hiɗi vok ma kuɗumna tun tuwsi goy voko, nisi lak hay vun-gala ma kal hay hoyok-ziyna, vok ma ma'na mok sum sa ay goy hay sinen tuwana, nisi cisi kirap'.

⁴⁵Abimelek busa he' kay dur sum sa hay hoyok-ziyna, sum sa hayamna nam cisi goy kafe, to hoyok-ziy namna gaa noŋ kaf, was mandan gaa hayamu.[6]

⁴⁶Hay li ma sa ŋulona vi Sikem hum labara kayni, nisi kal ŋay tuwsi hay gulmun ma ka ŋuyi tam lawna visi yum Berit.

⁴⁷Labara co tam Abimelek ala sum sa ŋulona vi Migdal-Sikem kaf tok tuwsiyawa,

⁴⁸Abimelek hiɗi sum sa kuɗumna kaf jik kulo kay hiɗiyta vi Talmon, nam sli ceɗna hay ɓalamu, ka hum gun kep burum pelemu, nam di tam sum sa kuɗumna: Va ma nan lum ɗawn nigi wumawa su? Nigi ma lum ki nan nala lay.

⁴⁹Segen kaf ka hum gun kisiya, nisi tap kuɗ Abimelek, nisi cuk hum-gun vun gulmunna, sum sa ka ŋayay hay gulmunna nisi ŋal kutis gaa kisiya. Ki kayn nala sum sa hay Migdal-Sikem fi mitta, jufayna hiɗi boyna ir ki sumun birim ɗaw nala.

⁵⁰Abimelek raw vokom mok Tibet lo, sum sa Tibetna nam dursiya, sli nagat kisiya.

⁵¹Hay na'ta ziyn ŋol ma dono'o ka ini kalaf hay hoyok-ziyn zaw, jufayna hiɗi boyna hiɗi sum sa ŋulo hay hoyok-ziyn kaf mun jaŋi, ŋay kulo hayamu. Nisi dukum vunam kulo bugolsiya, nisi cap jik hay yalam ma kulona.

⁵²Abimelek co tam ziy namna, nam ŋuyumu, nam ɦur kulo goboy tam vunamu kay do kut kuɗumu.

⁵³Duw na kayni, cat kep gi Abimelek kalam kil' hiɗi goor-hiɗiy ma lutna, munum ta'aram goyo.

⁵⁴Wulini wulini nam yi sa ma joriyo ma ziy sle ma duura valamna dumu: Pataŋ kew-gaferaŋa vaŋ goyo, calanu, can goy mati, a sumun ma vul labara ala can mat ti ca'a kayn may ŋaaɗi. Sa ma joriyon calamu, nam mit may.

⁵⁵Hay li ma sum sa Israyella wi ala Abimelek mitawa, nisi meriya, gigekaw hay ziyna valamu valamu.

⁵⁶Joot ta Abimelek la'a hay li ma nam ci gurona vi bulum sa dok-siɗiyan goyna, Lawna hotomti kalamu.

⁵⁷Sum sa hay Sikemna kaw, joo ma nisi lum kafna Lawn hotsit kisiya. Ki kayn nala kaw, vun Yotam goora vi Yerubaal ma nam beɗsina hot visiyawa.