Read Masana 3 YOHANA 1 Bible Online

3 YOHANA 1 - Masana bible

3 YOHANA 1

¹Sa ma maara ɗo tam Gayus, ma hayan kalamna, ma nan minim hay gasita.

²Ma hayan kaŋŋa, nan min ala naŋ ma muɗ dono'o hay slen kaf, a naŋ ma mus goy gaŋiya kaw, ki ciwta vaŋu muɗ dono'o nala.

³Nan li firi ŋolo hay li ma ɓosiyayna co tani, nisi di goyo kay gasita ta ka hayaŋu, kay poyta vaŋu ta naŋ ka poy hay gasita kaw.

⁴Hay li ma nan ka hum ala gurona van ka poy hay gasita, firita van tara ta suw kayn tayɗi.

⁵Ma hayan kaŋŋa, naŋ ka li slen hay liyamu hay sle ma naŋ ka lum kay ɓosiyayna, sa pulla noŋ kaw;

⁶Nisi li di-goyta kay minda vaŋu vok Ekklesiyata. nan siɗawaŋu kay naŋ ma gut kuɗsiya hay rogoyta visiya, kay kayni ŋaa'a kir Lawna.

⁷Kay nisi kal goy kayni hay semda vi Bum-Sumuna, nisi fi va hay ɓam sa waana noŋɗi.

⁸Sum sa ka ki kayn nala nay as visi hiɗi firita, kay nay ma muɗ si sa sunda hiɗi nisi hay gasita.

⁹Nan ɗo ɗerwelda neeɗa tam Ekklesiyata; may Diyotrefes ma min mus ma ŋolla jarsiya, min vumaɗi.

¹⁰Kay na'ta, la nan coysawa, nan ma digi kay sle ma nam lumna, kay nam ka di yoboy ma joon kuma'a; kayni kaf may asamɗi, kay nam kay tuwamu min vi ɓosiyaynɗi, sum sa min vi ɓosiyayna nam telsiya, digiɗsi goy hay ziyna-Lawna kaw.

¹¹Naŋ ma hayan kaŋŋa, naŋ ma tap kuɗ jootɗi, may laŋgi mi sle ma ŋaana. Sa ma li ŋaata, nam vi Lawna; sa ma li joota, nam vi Lawnɗi.

¹²May Demetriyus sumun kaf, gasita kay tuwa' kaw ka li di-goyta ta ŋaata kalamu, numa kaw ka li di-goyt kalamu, naŋ wi ala di-goyta vuma kayni gasiya.

¹³Slen ka kan ŋolo kay ɗo taŋu, may nan min ɗo taŋu hiɗi aŋkrenaɗi, hiɗi plumnaɗi kaw,[1]

¹⁴nan ka hiɗi cubta-sle'ta ala ir liyn neeɗa ɦawa nan ma ŋaf hiɗi naŋu, nala nay ma laway vun tuwaya.

¹⁵Slugota mus hiɗi naŋu! Boniyayna ka gaŋ deɓisa. Gaŋ deɓ mi boniyayna, gisi deɓ kisi kep kep kafe.