Read Masana WID-ŊAYAYTA 10 Bible Online

WID-ŊAYAYTA 10 - Masana bible

WID-ŊAYAYTA 10

¹Nan wi sunda-wuralawna mara'a ma gaŋeraŋi, ma jikay kulo hay wuralawn pa, ɗugulla cuki talamu, kelkedekŋa ay kulo kalamu, vokomu ay ki fatta nala, gayamu ay ki dol ma kuta nala.

²Ɗerwelda ta goota kep ta goy maliya ka hay ɓalamu, nam tun selem ta jufta kay niy-lum ma ŋolla, tun selem ta gulda gaa kay nagata may,

³nam siwel kulo hiɗi delem ŋolo ki zlona ka ci gumu nala. Hay li ma nam siwela, niy-ma-bayna siɗiya di delemu.

⁴Hay li ma niy-ma-bayna siɗiya di delem dina, nan min kay ɗo'o, may dit may kulo hay wuralawn pa ka di tan ala: duk soona kay sle ma niy-ma-bayna ma siɗiyana dumna, naŋ may ɗomɗi.

⁵Sunda-wuralawna ma nan wum coli kay niy-lum ma ŋolla hiɗi nagata meɗ ɓalam ta jufta kulo hay wuralawna;

⁶bugolda nam yi va kalam hay semda vi nam ma ka iriya hay vatɗita vatɗita, nam ma kot dukalawna hiɗi sle ma hayam kafna, nagata hiɗi sle ma haya' kafna kaw, niy-lum ma ŋolla hiɗi slen ma hayam kafna kaw, nam yi va kalam ala liyna ma li loɗi.[6]

⁷May hay li ma sunda-wuralawna ma siɗiyan tun caw buw togolomna dawni, hay na'ta Lawna ma hob vun sle ma nam kotom hay ŋayayta valamu, ki nam di labara ma firina tam sa sunda valamu sa jobta-Lawna nala.

⁸Del ma nan humumay hay wuralawn pana co di tan lo ala: Tuɗaŋu, slaŋ ɗerwelda ta goota ta goy malita hay ɓam sunda-wuralawna ma ka coli kay niy-lumna hiɗi nagata.

⁹Nan kal goy tam sunda-wuralawna, di talamu kay nam ma vulan ɗerwelda ta goota. Nam di tanu: Slaŋga, ligaŋga, na' ma waraŋ hayaŋu, may hay vunaŋu na' jibet ki yumda nala.

¹⁰Nan sli ɗerwelda goota hay ɓam sunda-wuralawna, nan liga'a, hay vunanu na' ay jibet ki yumda nala, may hay li ma nan liga' ligŋa', hayan tun caw waranu.

¹¹Sunda-wuralawna di tanu: Naŋ ma di vun-jobta mara lo kay sumuna ŋolo, kay jaf-sumuna ŋolo, kay vun mara'a mara'a hiɗi muliyana ŋolo ŋolo kaw.