Read Masana WID-ŊAYAYTA 11 Bible Online

WID-ŊAYAYTA 11 - Masana bible

WID-ŊAYAYTA 11

¹Nisi vulan libetna kepe ma sli zugulda nala, nisi di tanu: Fokaŋ kulo'o, ŋaɓaŋ Tempella vi Lawna, ŋaɓaŋ giwin-ma-ɗifinna hiɗi sum sa ka girif hay liy namna kaw.

²May wur-daŋŋa ma ka goy jiy vi Tempella, naŋ ma hinim goyo, naŋ ma ŋaɓamɗi, kay nam vuli mi jaf-sumuna, hoyok-ziy ma peldetna nisi ma tayam gaa kuɗ sesiya, ir til dok-fiɗi yam ma'.

³Nan ma vul vulda ta di vun-jobta mi sa di-goyna van sa ma'na, nisi ma di vun-jobta ir buur birim kep hiɗi diram kis-ma' kalam dok-karkiya.

⁴Nisi kayni si gu-olive ma ma'na, hiɗi slen ma tun fitilla ma ma'na, ma ka lakay vok Bum-Sumuna vi nagata[7]

⁵La sa min li va ma joo tisiya, kut kal goy hay vunsiya, ŋal sum sa gawt kisina, la sa min li va ma joo tisiya, nam ma fi cita-goyta hiɗi hagat na'ta.

⁶Donota visi ka'a kay duk vun-dukalawna, kay niyn ma siɗi, hay li ma nisi ka di vun-jobta, nisi ka hiɗi gaŋeraŋa kay muɗ niyn goy busuwu, kay gi bakmara mara'a mara'a gaa kay nagata, hay liyn kaf ma nisi mina.

⁷Hay li ma nisi hob vun di-goyta visiyawa, muura ma may goy hay zul ma wiŋŋa pana ma dur hiɗi nisiya, nam ma kol kisiya, nam ma cisi goyo kaw.

⁸Tuwna visiya ma mitina ma lak goy hay hagata vi hoyok-ziyna ma ŋolla, hoyok-ziyna ma yum hiɗi hagata vi Ŋusta ala Sodoma hiɗi Egipte, mi liyn ma Bum-Sumuna visiya ay ɓalay kat gu-ma-grakŋa hayamu.

⁹Sara'a jar sumuna hiɗi jaf-sumuna, vuɗna vi sumuna, jaf-sumuna kuɗ vunna kaf, ma ɗuw tuwna visi ma mitina ir buur ɦidi hiɗi gali, nisi ma vul hagata kay pisi gaa hay zulda noŋɗi.

¹⁰Sum sa gaa kay nagatna ma li firiya, haysi ma sleɗ ŋolo kaw kuɗ kayni. Nisi ma jok slen jar-tuwsiya tuwsiya, kay mige sum nisi sa jobta sa ma'n lakŋi las sum sa gaa kay nagatna ŋolo.

¹¹Bugol buur ma ɦidi hiɗi galla, sukŋa vi irita vi Lawna kal haysiya, nisi yaw kulo kay sesiya, narta ŋolo cuk kay nisi sa ka ɗuwsina.

¹²Goy hay wuralawn pa nisi hum della ma ka di tisi dono ŋolo ala: Jikgi ay kulo tani! Hay ɗugulla pa nisi jik kulo hay wuralawna, sa gaw kisina wisi hiɗi irsiya.

¹³Hay leer namna wiira vi nagata li ŋolo, gal-ma-doogona vi hoyok-ziyna ɦo gaa'a, sumun birim siɗiya miti hay wiira-nagata namna. Sum sa hinina muɗi nar ŋolo, nisi subur Lawn ma wuralawna.

¹⁴Joota ta mul ma'ta kalawa. Wulini joota ta sem ɦidita ka co goboyo.

¹⁵Sunda-wuralawna ma siɗiyana buw togolomna. Del ma dono'o ka di goy wuralawn pa ala: Mulda vi nagata vuli mi Bum-Sumuna vaya hiɗi Kristuna valamu. Nisi ma ti mulda ta-ta hay vatɗita vatɗita.

¹⁶Sa maariyana sa dok-ma' yam fiɗina sa ka lakay vok ir Lawna kay zlamda-mulda visiya dab voksi gaa'a, subur Lawna.

¹⁷Di'e: Numa gaŋ deɓe, naŋ Bum-Sumuna Lawna, ma Gaŋeraŋ-Petna, ma ka'a, ma aya kaw, kay naŋ yaw gaŋeraŋa vaŋ ma ŋollawa, naŋ tun mulda vaŋawa kaw.

¹⁸Jaf-sumuna muɗi ɦiya, ɦiyda vaŋu coowa, hiɗi liyn ma ka kitat kay sa mitina, kay wurak sa sunda vaŋu sa jobta-Lawna sa peldetna, sa li nar kay semda vaŋu, sa gurayna hiɗi sa ŋulona, hay li ma naŋ ci sum sa min ɓulak nagatna goyo.

¹⁹Tempella vi Lawna hay wuralawna mal goyo, arkena vi bonota valamu vul tuwam goyo hay Tempella valamu, wileta li'e, della di'e, lawn tiya, nagat wira, mogoyn yak ŋolo kaw.