Read Masana WID-ŊAYAYTA 12 Bible Online

WID-ŊAYAYTA 12 - Masana bible

WID-ŊAYAYTA 12

¹Ɗekka ŋolda tara li hay wuralawna, cat kepe fatta ka cuki ta'a, tilla cuki gaa se'a, bogoray ma mislek talam doogo yam ma'na ka tuni kulo ka'a.

²Na' ka hiɗi hayna, na' ka tiy tuwa'a hay pukka hiɗi tuw-tita vi vu'da.

³Ɗekka tara'a li hay wuralawn lo, guy ŋolla[8] ma slaw keŋ' yalam siɗiya, miyokom doogo, jakawat ka tuni kalam siɗiya kaw.

⁴Giɗerem tan gal ma ɦidina vi mislek ma dukalawna, cukum gaa kay nagata. Guyna lak vok cata ta min vuɗa, kay mut goora va'a hay li ma na' vuɗumawana.

⁵Na' vuɗ goor ma jufu, nam ma min ŋom jaf-sumun kaf hiɗi zugul ma kawaya. Goora va'a slumis kulo kat Lawna tam zlamda-mulda valamu.

⁶Cata pir goyo hay fulda, na' fi liyn ma Lawna kotom ka'a, kay na' ma ti tina va' ɗawni ir buura birim kep hiɗi diram kis-ma' kalam dok-karkiya.

⁷Duura li hay wuralawna. Mikayel hiɗi sa sunda-wuralawna valamu dur hiɗi guyna. Guy ma ŋolla hiɗi sa sunda valamu dura,

⁸may donota visi kiɗa goyo, nisi may fi liyn kisi hay wuralawn loɗi.

⁹Guyna namna ma ŋolla ma yum ala guy ma ɓa-ɓana, ma yum ala Matna hiɗi Satan kaw, namu ma ɗut sumun gaa hay nagat kafna, zutumay gaa kay nagata, sa sunda valamu zuti ay gaa hiɗi namu kaw.

¹⁰Nan hum del ma ŋolla hay wuralawna di'e: Wulini su'da coowa, hiɗi gaŋeraŋa hiɗi mulda vaya, hiɗi ŋolda vi Kristuna valamu, kay nam ma pi lawta kay ɓosiyayna zutumiyawa gaa'a, nam ma pi lawt kaya vok Lawna vaya falayta hiɗi henjet kafe.

¹¹Nisi kolawa kalamu hiɗi donota vi busuwna vi goor ɦu-dimina, hiɗi yoboyna vi di-goyta visiya, nisi may min irita visiɗi, ta-ta tam mitta kaw, nisi li narɗi.

¹²Kuɗ kayni laŋ firiya wuralawna, nigi sa hay wuralawna, ligi firiya kaw. Joot kay nagata hiɗi niy-lum ma ŋolla, kay Matna kalisawa gaa tigiya, nam muɗi ɦiy ŋolo, kay nam wi'e liyna valam hini kiɗaya.

¹³Hay li ma guy ma ŋolla wi ala nam digidiy ay gaa kay nagata, nam jaŋ kuɗ cata ta vuɗ goor ma jufna.

¹⁴Ki kayn nala nisi vul zlimitna ma ma'na vi bakŋa ma ŋolla mi cata, kay na' ma fok kulo'o, pir goy hay fulda, hay liyna va'a, hay liy ma na' fi tina va'a ir liyn kepe, ir liyn ŋolo hiɗi gal liyn kepe, goy gine'e vok ir guyna.

¹⁵Guyna cireɗ niyn hiɗi vunamu bugol cata, kay niy-lumna ma dola' kulo'o.

¹⁶May nagata gut kuɗ cata, nagat mal vuna' goyo, na' ci niy-lumna ma guyn cireɗem goy hiɗi vunamna.

¹⁷Guyna dikam ɓulak kat cata, nam kali goyo kay dur hiɗi segena sa hay jafna va'a, nisi sa vi kuɗ vun-ma-gatna vi Lawna, sa vi di-goyta vi Yesu kisin kaw.

¹⁸Nan col kulo'o kay ŋeslna vi niy-lum ma ŋolla.