Read Masana WID-ŊAYAYTA 14 Bible Online

WID-ŊAYAYTA 14 - Masana bible

WID-ŊAYAYTA 14

¹Hay li ma nan ka ɗuwa, nan wi goor ɦu-dimina coli kulo'o kay hiɗiyt Siyon, hiɗi sum sa birim kis kalam dok-fiɗi yam fiɗina, sum sa semda valamu hiɗi semda vi bulumu ɗoy hay voksiya.

²Nan hum della goy hay wuralawn pa, ki della vi niy-lum ma ŋolla nala, ki della vi niy ma bay dono ŋolo nala; del ma nan humumna nam ki sumun ka ci dilla nala.

³Nisi ka gi nul ma wuliya vok zlamda-mulda, vok sle ma irina ma fiɗina, hiɗi sa maariyana kaw. Sa mara'a fi hat nul namnaɗi, may si sa birim kis kalam dok-fiɗi yam fiɗi sa gusi goy hay nagata pana tuta.

⁴Kayni si nisi sa may muɗ tuwsi liwisi hiɗi boynɗi, kay nisi bay gese. Nisi tap kuɗ goor ɦu-dimina hay li ma nam ka poy hayamna pet. Nisi ay gusi goyo jar sumuna pa, nisi tap kuɗ goor ɦu-dimina hay liyn marige pet, ma nam ka tuɗ haya. Nam gussi ay goy jar jaf-sumun pa ki vun-jaf ma jewna vi Lawna hiɗi goor ɦu-dimina nala.

⁵Hay vunsiya sa as fi sinda noŋɗi; kay joota ta san da' kisiya tay noŋɗi.

⁶Nan wi sunda-wuralawna mara kep ka hal kulo'o jar dukalawna, nam ka hiɗi labara ma firina ma vatɗina, kay kusum goyo tam sum sa gaa kay nagata, tam jaf-sumun kaf, tam vuɗna vi sumun kaf, tam vunna vi sumun kaf kaw.

⁷Nam di hiɗi delem kulo ŋolo ala: Ligi nar kuɗ Lawna, vulum gajijita, kay leera vi kitata valamu coowa, girifgi nam ma li wuralawna hiɗi nagata hiɗi niy-ŋolla, hiɗi kaara ma riŋ niyna kaw.

⁸Sunda-wuralawna tara'a tapay kuɗumu di'e: Na' nigawa gaa'a, na' nigawa gaa'a, Babilon ta ŋolda, na' ta vul vinna vi zlata-bulota va' ta ŋoldawa mi jaf-sumuna kaf kay nisi ma ci'e.

⁹Sunda-wuralawna ma ɦidina tapay kuɗsi lo, ka di hiɗi delem kulo ŋolo ala: La sa girif gaa'a vok muura hiɗi va ma sli tuw muura, la nam fi tumda hay vokamu lebo hay ɓalamu,

¹⁰Nam kaw ma ci vinna vi ɦiyda vi Lawna, ma ɦokay goyo, bay rigas hiɗi kaway-ma-cina vi ɦiyda valamu, nam ma ci lasta hay kuta hiɗi sufre, vok ir sunda-wuralawna sa peldetna hiɗi goor ɦu-dimina.

¹¹No'osna vi lasta visiya pat kulo'o hay vatɗita vatɗita, nisi as tun suk hay falaytɗi, hay henjetɗi kaw, nisi sa girif gaa vok muura hiɗi va ma sli tuw muura, hiɗi san gigekaw ma tumda vi muura tuni talamu.

¹²Tani so-tuwta vi sa peldetna ka'a, nisi sa ŋom vun-ma-gatna vi Lawna hiɗi vida hay Yesu.

¹³Nan hum della may goy wuralawn pa ka di ala: Ɗoŋu: Sle'ta ka kay nisi sa mit hay Bum-Sumuna wulin pa! Awa, din ti Ŋusta, kay nisi ma tun suksi hay lopna visiya, kay lopna visiya tap kuɗsiya.

¹⁴Hay li ma nan ka ɗuwa, nan wi ɗugul ma haɓi, sa mara kep ma musi kay ɗugul namna, nam sli Goora vi san nala. Bogoray ma ora ka tuni kalamu, hiramta ta siy hiliw-hiliw' ka hay ɓalamu.

¹⁵Sunda-wuralawna tara'a kali goy hay Tempella pa, na' ka siwel hiɗi dela' kulo ŋolo tam nam ka musi kay ɗugulla ala: Gaŋ hiramta vaŋis goyo, feɗaŋu, kay liyna vi feɗna coowa, kay wana hay nagata kaf niyawa.

¹⁶Nam ma ka musi kay ɗugulla gi hiramta valam goyo, nam feɗ sle ma kay nagata may.

¹⁷Sunda-wuralawna mara kali goy hay Tempel ma wuralawna pa, nam ka hiɗi hiram ma siy ŋolo hay ɓalamu.

¹⁸Nan wi sunda-wuralawna mara'a lo, ma gaŋeraŋa valam ka kay kuta, nam kali goy tam giwin-ma-ɗifinna pa, nam siwel hiɗi delem kulo ŋolo tam sunda-wuralawna ma hiɗi hiramta ta siy hiliw-hiliw ka hay ɓalamu, ka di talam ala: Meɗaŋ hiramta vaŋ ta siy hiliw-hiliwtis goyo, feɗaŋ vuɗna vi gulda-guldan gaa kay nagata, kay vuɗna valamu niyawa.

¹⁹Sunda-wuralawna meɗ hiramta valam goy kay nagata, nam feɗ vuɗna vi gulda-guldana, cukum hay doway-firi ma ŋolla vi ɦiyda vi Lawna.

²⁰Nisi kesl gulda-guldana goy gine hiɗi hoyok-ziyna; busuwna jaŋay goy tam doway-firin pa, busuwna jaŋ goy kay nagata ta-ta ir kilometre kis-ɦidi, fiyokka valamu ta kulota co ir metre kep hiɗi gali.