Read Masana WID-ŊAYAYTA 15 Bible Online

WID-ŊAYAYTA 15 - Masana bible

WID-ŊAYAYTA 15

¹Bugolda, nan wi ɗekka tara'a hay wuralawna, ɗekka ta ŋolo ɦuyumda kuɗa'a, sunda-wuralawn siɗiya, bakmaran kis-siɗiya kaw ka hay ɓisiya, bakmara ma cawna, kay Lawna hob vun ɦiyda valam ɗawni hiɗi bakmara namna.

²Nan wi slen ki niy-lum ma ciliŋ ki kristal[10] nala, rigasay hiɗi kuta, hiɗi sa kol kay muura, sa kol kay va ma sli tuw muura hiɗi nimerona vi semda valamu, nisi ka lakay kulo kay niy-lum ma ciliŋ ki kristal nalana. Dilla vi Lawna ka hay ɓisiya.

³Nisi gi nulla vi Musus sa ma sunda vi Lawna, hiɗi nulla vi goor ɦu-dimina kaw di'e: Lopna vaŋu mi lop ma ŋulona hiɗi ɦuyumda kuɗumu, naŋ Bum-Sumuna Lawna ma Gaŋeraŋ-Petna, hagana vaŋu ɗigere hiɗi gasiya, naŋ mulla vi sumun kafe.

⁴Bum-Sumuna, sa ma as kay li nar kay semda vaŋɗin mi gige? Sa ma as subur semda vaŋɗin mi gige? kay naŋ kepe peldete, jaf-sumuna kaf ma ma'a kay girif gaa vokaŋu, kay mige ɗigerta vaŋu ɗek tuwa'awa goyo.

⁵Bugolda, hay li ma nan ka ɗuwa, liy ma peldetna vi tabernaklena vi di-goyta hay wuralawna mal goyo.

⁶Sunda-wuralawna sa siɗiya sa bakmaran siɗiya ka hay ɓisina, kali goy hay liyn ma peldetna pa, nisi cuki hiɗi baraw ma bay-gesna ma haɓ tal-talla, kanti ma ora ka juni war-digsiya.

⁷Kep jar sle ma irina ma fiɗina vul ma kaway-ma-cina ma ora siɗiya mi sunda-wuralawna sa siɗiyana, hobay hob' hiɗi ɦiyda vi Lawna ma ka iriya hay vatɗita vatɗita.

⁸Nala liy ma peldetna hob hiɗi no'osna, kuɗ gajijita vi Lawna hiɗi donota valamu, sa as kal kalaf hay liy ma peldetna namna noŋɗi, ta-ta bakmara ma siɗiyana vi sunda-wuralawna sa siɗiyana vunam hob kulo tuwa.