Read Masana WID-ŊAYAYTA 16 Bible Online

WID-ŊAYAYTA 16 - Masana bible

WID-ŊAYAYTA 16

¹Nan hum del ma ŋolla may goy hay liyn ma peldetna pa ka di tam sa sunda-wuralawna ala: Tuɗgiya, ɦokgi kaway-ma-cina ma siɗiyana vi ɦiyda vi Lawna gaa kay nagata.

²Sunda-wuralawna ma jewna kaliya, nam ɦok kaway-ma-cina valam goy kay nagata. Mil guɗoŋ ma guɗulina ma ɓas ŋolo vi sum sa tumda vi muura tisin kaf, hiɗi nisi sa girif gaa vok va ma sli tuw muura kaf kaw.

³Sunda-wuralawna ma ma'na ɦok kaway-ma-cina hay niy-lum ma ŋolla, niy-lum ma ŋolla muɗ busuwu ki busuwna vi sa ma mitina nala, sle ma irina ma hay niy-lum ma ŋolla kaf mitiya.

⁴Sunda-wuralawna ma ɦidina ɦok kaway-ma-cina valam hay kaara. Kaara muɗ goy busuwu.

⁵Nan hum sunda-wuralawna vi niyna ka di ala: Naŋ ɗigere, naŋ ma ka'a, ma aya, naŋ ma peldetna, kay naŋ ka kitata vaŋawa.

⁶Kay nisi ɦok busuwna vi sa peldetna hiɗi sa jobta-Lawna goyo, naŋ vulsi busuwnawa a ci'e may; nisi nagay kay kayni.

⁷Nan hum giwin-ma-ɗifinna ka di ala: Awa, naŋ Bum-Sumuna Lawna, ma Gaŋeraŋ-Petna, kitana vaŋu ɗigere hiɗi gasiya kaw.

⁸Sunda-wuralawna ma fiɗina ɦok kaway-ma-cina valam goy kir fatta. fatta fi donota kay war sumuna hiɗi kuta.

⁹Zalla ma ŋolla war sumuna goy ŋolo. May nisi ŋul semda vi Lawna ma gaŋeraŋa valam ka'a kay bakmara namna, nisi min ham goyo kay hot vul suburta tam Lawnɗi.

¹⁰Sunda-wuralawna ma vaslna ɦok kaway-ma-cina valam goyo kay zlamda-mulda vi muura. Mulda vi muura muɗ jufunu; sumuna ka mut siysiya kay tuw-tita,

¹¹May nisi ŋul sem Lawna ma wuralawna, kuɗ tuw-tita visiya hiɗi moy guɗoŋŋa, hiɗi kayni kaf nisi min ham kay lopna visiɗi.

¹²Sunda-wuralawna ma karkiyana ɦok kaway-ma-cina valamu goy kay niy-lum ma ŋolla Eufrata, niyna hiɗak goyo kay kot hagata kay muliyan sa may kuɗuw pana.

¹³Nan wi ŋusiyan ma liwisna ɦidi, sli luura nala, nam kali goy hay vun guy ma ŋolla, goy hay vun muura, goy hay vun sa-jobta sa bay-gasina kaw.

¹⁴Kayni mi ŋusiyana vi fuliyana, nisi li ɗekka, nisi tuɗ tam muliyana vi nagat kafe, kay toksi kay duura vi buur ma ŋolla vi Lawna, ma Gaŋeraŋ-Petna.

¹⁵Humgiya, nan ka co'o ki sa ma kulla nala. Sle'ta ka kay sa ma mus jigere, ŋom sligara valamu kaw, kay nam ma poy goy nalaɗi, kay a nisi wi zulota valamɗi.

¹⁶Nisi tok tuwsi hay liy ma yum hay vun Hebren ala Harmagedon[11]

¹⁷Sunda-wuralawna ma mul siɗiyana ɦok kaway-ma-cina valamu goy jar simeɗna. Della may goy hay liyn ma peldetna vi Lawn pa, goy tam zlamda-mulda pa ka di ala: Slen laawa.

¹⁸Wileta li'e, della di'e, niyna baya, wiira vi nagata li ŋolo, hay tun cawta vi sumun gaa kay nagat pa, wiira-nagata ma ki kayn nala bay li sem kep tuwa.

¹⁹Hoyok-ziy ma ŋolla iram ɓuraw goy hiɗi, hoyok-ziyna vi sa waana ɦo gaa'a. Lawna humam gum kay Babilon ta ŋolda, kay vula' kaway-ma-cina vi ɦiyda valam ta ŋolda.

²⁰Jokona kaf muni jaŋi, hiɗiyna sa fum loɗi.

²¹Mokayna* ma ŋulona ma nekka valam ir talente kep kep, kulo hay wuralawn pa cuk gaa kay sumuna; sumuna ŋul Lawna kuɗ bakmarana hiɗi mokayna, kay bakmara namna suwi ŋolo.