Read Masana WID-ŊAYAYTA 17 Bible Online

WID-ŊAYAYTA 17 - Masana bible

WID-ŊAYAYTA 17

¹Bugolda sunda-wuralawna mara kepe jar sa siɗiyana sa kaway-ma-cina ma siɗiyan hay ɓisina ma'a, ka di tan ala: Naŋaya, nan min ɗekaŋ kay kitata vi cata ta viyuw ŋolda, na' ta ka musi kel niy-lum ma ŋolla,

²na' ta muliyan kay nagat li zlata-bulo hiɗi na'a, na'a ta muliyan gaa kay nagata ɦoy tuwsi goyo hiɗi vinna vi viyuwta va'a.

³Hay Ŋusta pa nam kalan goy hay fulda. Nan wi cat kep musi kay muur ma slaw keŋ', hobay cep-cep' hiɗi semda vi ŋulda. Muur namna yalam siɗiya, miyokom doogo may.

⁴Cata na'ta ganay hiɗi sligar purpella hiɗi sligar ma slaw-keŋŋa, ganay hiɗi ora, hiɗiy ma ŋaana hiɗi kermena. Kaway-ma-cina ma ora ka hay ɓa'a, hobay hob' hiɗi sle ma liwisna hiɗi gesna hiɗi zlata-bulota va'a kaw.

⁵Hay voka'a semda ka ɗoya, ŋayayta: Babilon ta ŋolda, sum boy sa li tuwsi viyuwu hiɗi sa li tuwsi liwisi gaa kay nagata.

⁶Nan wi cat na'ta ɦoyay goyo hiɗi busuwna vi sa peldetna hiɗi busuwna vi sa li di-goyta kay Yesu. Hay li ma nan wa'a, nan muɗ ɦuyum' ŋolo.

⁷Sunda-wuralawna di tanu: Naŋ muɗ ɦuyum kay mige? Nan min daŋ goy kay ŋayayta vi cata hiɗi muura ma ziya'na, ma yalam siɗiya hiɗi miyokom doogona.

⁸Muura ma naŋ wumna aya, may nam may loɗi. Nam ma jik kulo hay zul ma wiŋŋa pa kal hay ba-goyta, sum sa ka kay nagata ma muɗ ɦuyum', nisi sa hay tun-cawta vi inda vi nagat pa sesi bay ɗo hay defterta vi irita, hay li ma nisi wi muura, a nam aya, wulini nam may loɗi, may nam min ma'a lo.

⁹Nanige kaw tani yamda-wida ta hiɗi yalla ma li ka'a: Yam ma siɗiyan kayni mi hiɗiy ma siɗiyana, ma cata ka musi kalamna.

¹⁰Kayni si muliyan siɗiya: Vasl cuki gaa'a, kepn ka'a, hena bay ma tuwa, hay li ma nam coowa, nam ma mus ir liyn neeɗa ɦawa.

¹¹Muur ma aya, may wulini nam may loɗi, kayni mi mul ma glafandina; namu mi kep jar sa siɗiyana, nam ka tuɗ hay ba-goyta.

¹²Miyok ma doogo ma naŋ wumna kayni si muliyan doogo, nisi bay fi mulda tuwa, may nisi fi gaŋeraŋa ki muliyan nala ir leer kep ɦawa hiɗi muura.

¹³Nisiya varta visi kepe, donota visiya hiɗi gaŋeraŋa visiya nisi vulum mi muura.

¹⁴Nisi ma dur goor ɦu-dimina, may goor ɦu-dimina ma kol kisiya, kay namu mi Bum-Sumuna vi sumay sumuna, mulla vi muliyana kaw. Sa yiyna, sa vilekay-goyna sa gasina sa ka hiɗi namna ma kol kisiya kaw.

¹⁵Nam di tanu: Niyna ma naŋ wumna ma cata viyuwta ka musi kalamna kayni si sumuna, vokŋa vi sumuna, jaf-sumuna kuɗ vunna kaf.

¹⁶Miyok ma doogo ma naŋ wumna hiɗi muura ma ka gaw hiɗi cata viyuwta, nisi ma foka' goy nala'a, nisi ma muta' sliwa'a, ma ŋala' goyo hiɗi kuta kaw.

¹⁷Kay Lawna tun van kayni hay diksiya kay hob varta valamu, a tap varta visi kep kay vul donota tam muura, ta-ta yoboyna vi Lawna vunam hob goyo.

¹⁸Cata ta naŋ wa'ta, kayni mi hoyok-ziyna ma ŋolla ma gaŋeraŋa valam ka kay muliyan gaa kay nagata.