Read Masana WID-ŊAYAYTA 18 Bible Online

WID-ŊAYAYTA 18 - Masana bible

WID-ŊAYAYTA 18

¹Bugol kayni nan wi sunda-wuralawn mara'a jikay gaa wuralawn pa, gaŋeraŋa valam ŋolo, nagata muɗi haraŋi kuɗ gajijita valamu.

²Nam siwel hiɗi delem kulo ŋolo ala: Na' nigawa gaa'a, na' nigawa gaa'a, ti Babilon ta ŋolda! Na' muɗi mi liyn ma musta vi fuliyana, na' muɗi mi tokosayna vi fuliyan ma liwisna kafe, na' muɗi mi tokosayna vi layay ma liwisi ma bis kir sumuna kaf,

³kay jaf-sumun kaf ci kuɗ vinna ma ɦiyda vi zlata-bulota va'a; muliyan sa hay nagat kaf kal tuwsi hay zlata-bulota hiɗi na'a, sum sa li filiwna gaa kay nagata muɗ tuwsi faraya kuɗ donota vi viyuwta va'a.

⁴Nan hum del mara'a may goy hay wuralawn pa di'e: Tuɗgi goyo, sumuna vanu, hina'a, kay nigi ma tap hiɗi na'a hay sulukŋa va'ɗi, kay a nigi ma fi bakmarana va' noŋɗi.

⁵Kay sulukŋa va'a vunam coowa ta-ta kulo wuralawna, Lawna humam gumawa kay bay-ɗigerta va'a.

⁶Nigi ma wuraka'a ki na' wurak nala, nigi ma wuraka' sem ma' suw lopna va'a, nigi ma ɦok sem ma' suwa hay tasata ta na' ɦok haya.

⁷Ki na' subur tuwa' ŋolo, kal tuwa' ŋol hay viyuwta nala, nigi ma kala' hay lasta hiɗi do'olla kaw, kay na' di hay dika' ala: Nan musi ca-mulda, nan may ti cata duhultaɗi, nan ma ti do'ol noŋɗi.

⁸Kuɗ kayni bakmarana ma co ka'a ir buur kep ɦawa: Mitta, do'olla, mayta, kuta ma ŋala' goyo kaw. Kay nam dono'o Lawn ma ka kitat ka'na.

⁹Muliyan kay nagata kaf, nisi sa li zlata-bulo'o hiɗi na'a, lak hay viyuwta hiɗi na'a kaw, nisi ma tiya, yor tuwsi ka'a, hay li ma nisi ma wi no'osna vi ŋal-goyta va'a.

¹⁰Nisi ma lak goy gine'e kay narta vi lasta va'a, nisi ma di ala: Joota, joota, nak Babilon, hoyok-ziy ma ŋolla, hoyok-ziy ma donona, kay kitata coowa kagu ir leer kep ɦawa.

¹¹Sum sa li filiwna kay nagata ma tiya yor tuwsi ka'a, kay slena visi ma nisi maram kay gusum goyna sa ma gusum may loɗi.

¹²Jak ma ora, ma doorona, hiɗiy ma jifiyna, kermena, baraw ma direŋŋa, purpella, baraw slawna, sligar slawna, gu ma hisna kaf, jak ma koti hiɗi siy-slokŋa, sle ma koti hiɗi gu ma ŋaana, ma koti hiɗi wayna, ma koti hiɗi hiɗiyn marbella;

¹³hiɗi sinamom,[12] hiɗi aromatna, hiɗi urdina, hiɗi miir, hiɗi urdi ma no'osna, hiɗi vinna, hiɗi mula, hiɗi futuw ma digeɗna, hiɗi alkamarena, luwayna hiɗi fukunayna, hiɗi kulumayna, kekena, tuw sumuna hiɗi ŋus sumuna kaw,[13]

¹⁴Vuɗ gu ma niyina hiɗi va ma dikaŋ daramu kalawa goy gine'e hiɗi naŋu. Slen ma ŋaana hiɗi ma jifiyna bay kaŋu, sa as fum loɗi.

¹⁵Sum sa li filiwna sa muɗ tuwsi faray hiɗi na'a ma lak goy gine'e, kuɗ narta vi lasta va'a, nisi ma tiya, ma ti do'olla kaw;

¹⁶nisi ma di'e: Joota, joota! hoyok-ziy ma ŋolla ma ganay hiɗi baraw ma direŋŋa, purpella hiɗi sligar ma slawna, ganay hiɗi ora, hiɗi hiɗiy ma ŋaana hiɗi kermena. Ir leer kep ɦawa, faray ma ŋolla ɓulakay goyo.

¹⁷Sum sa gi lumayn kaf, sum sa ɓe hay lumayn kaf, sumay lumayna hiɗi nisi sa li lop hay lumayn kaf lakay goy gine'e.

¹⁸Hay li ma nisi wi no'osna patay kulo'o kay kuta ta ŋala'ta, nisi siwela di'e: Hoyok-ziy ma ay ŋray hiɗi hoyok-ziyn tani mi marige?

¹⁹Nisi ko butuwn kulo kisiya, nisi tiya, nisi ti do'olla, nisi siwel ala: Joota, joota, hoyok-ziy ma ŋolla, sum sa lumayna visi ka goloŋ hay niy-lumna muɗ tuwsiyawa faray kuɗ faray ma haya'na. May hay leer kep ɦawa, na' muɗi goy ful ma wiŋŋa.

²⁰Firiyaŋ kalamu, naŋ wuralawna, nigi sa peldetna kaw, sa apostolayna hiɗi sa jobta-Lawna, kay Lawna gutawa kuɗgiya hay li ma nam ka kitata va'awa.

²¹Bugolda sunda-wuralawn ma dono kep sli hiɗiy ma ŋol kep ki hiɗiy ma lutna nala, nam gum goloŋ hay niy-lumna di'e: Babilon hoyok-ziy ma ŋolla ma giys gaa ɗawn ki kayn nala, sa as fa' loɗi.

²²Dilla hiɗi nulla, buwna vi difna hiɗi buwna vi togolomna sa as humum hayag loɗi, sa li gul-yalda kaw say hayag loɗi, della vi hiɗiy ma lutna kaw sa as humum hayag loɗi.

²³Haraŋa vi fitilla ma ŋal hayag loɗi, della vi jufna hiɗi cata sa min yaw tuwsiya sa as humum hayag loɗi. Kay sa li filiwna vagu ay si sa ŋulona gaa kay nagata, jaf-sumun gaa kay nagat kaf ay ɗuti goyo kay gul-yalda vagu.

²⁴Babilon fi kitata kayni kay mige sa jobta-Lawna hiɗi sa peldetna hiɗi nisi sa fi ŋatta-goyta kaf, busuwna visi ka haya'a.