Read Masana WID-ŊAYAYTA 19 Bible Online

WID-ŊAYAYTA 19 - Masana bible

WID-ŊAYAYTA 19

¹Bugol kayni nan hum della goy hay wuralawn pa ki della vi sum sa tokay yam tuwsi ɦiir nala ka di ala: Halleluya! Su'da, gajijita hiɗi donota kaf vi Lawna vaya.

²Kay mige kitata valamu gasiya hiɗi ɗigere kaw. Kay nam ka kitatawa kay cata viyuwta ta buw nagatawa hiɗi liwista va'a, nam job yam busuwna vi sa sunda valamawa hay ɓa'a.

³Sem ma ma'na lo nisi ka di ala: Halleluya! No'osna va'a pat kulo'o hay vatɗita vatɗita.

⁴Sum sa maariyana sa dok-ma' yam fiɗina hiɗi sle ma irina ma fiɗina girif gaa vok Lawna ma ka musi kay zlamda-mulda, nisi di'e: Amen, halleluya!

⁵Della may goy tam zlamda-mulda pa di'e: Gigi nul tam Lawna vaya, nigi sa sunda valamu kaf, hiɗi nigi sa li nar kuɗumu kaw, sa gurayna hiɗi sa ŋulona kaw.

⁶Nan hum della ki della vi tok ma ŋolla hiɗi della vi niy-lum ma ŋolla, ki hiɗi della vi niy-ma-bayna nala kaw, ka di ala halleluya! Kay Lawna Bum-sumuna ma Gaŋeraŋ-Petna tun mulda valamawa.

⁷Nay ma li firiya, hayay ma firi ŋaa ŋolo, nay ma suburumu kaw, kay yuldeta vi dabayna vi goor ɦu-dimina ka goboyo, cata valamu kot tuwa'awa.

⁸Vuli ta'a kay gan tuwa' hiɗi sligar ma haɓ tal-talla, ma wilena ma bay-gesna. sligar ma haɓi ma jifiyna kayni mi lopna vi sa peldetna.

⁹Sunda-wuralawna di tanu: Ɗoŋu, sle'ta ka kay sa yiy hay yuldeta vi dabayna vi goor ɦu-dimina. Bugolda sunda-wuralawna hot di tanu: Kayni mi yoboyna ma gasina vi Lawna.

¹⁰Nan her gaa vok sunda-wuralawna kay girifimu, may nam danu: Tel tuwaŋu kay li van kayni. Nanu mi niraŋ ma lopna, nanu mi nir ɓosiyoŋŋa sa li di-goyt kay Yesuna kaw. Girifaŋgin mi Lawna. Kay di-goyta kay Yesu kayni mi Ŋusta vi dita vi vun jobta-Lawna.

¹¹Bugolda nan wi wuralawna goy maliya, iran cuk kay kulum ma haɓna. Nam ma musi kalamna yum ala ɗigere hiɗi gasiya. Nam ka kitata, dur kaw hiɗi hagata ta hay liya'ta.

¹²Iram tilek ki sin-kuta nala, bogorayn ŋolo ka kuluɓi kalamu; semda ka ɗoy talamu, sa mara ma wa' mayɗi, say nam kepe.

¹³Sligara ma ŋuruɓi hiɗi busuwna ka cuki talamu, semda valam ala yoboyna vi Lawna.

¹⁴Vok-ma-duura vi wuralawna ka tapay kuɗumu, ɓey kay kulumay ma haɓna, sligar ma jifiy ŋolo ma haɓna ka cuki tisiya.

¹⁵Kew-gaferaŋ ma siy ŋolo kali goy hay vunam pa, kay cal sum sa waana. Nam ma ŋomsiya hiɗi zugul ma kawayna. Doway-firina ma kesl gulda-guldana vi ɦiyda vi Lawna ma Gaŋeraŋ-Petna nam ma kesl gulda-guldan hayamu.

¹⁶Tam sligara valamu, tam selem kaw, ɗot ka ɗoy ala: Mulla vi muliyana, Bum-Sumuna vi sumay-sumuna.

¹⁷Nan wi sunda-wuralawna mara'a coli kulo'o hay fatta zaw, nam ka siwel hiɗi delem kulo ŋolo tam layayn ma ka fok kulo dukalawn kaf ala: Nigiyaya, tokgi tuwgiya kay yuldeta ŋolda vi Lawna,

¹⁸kay ti sliw muliyana, sliw sa ŋulona vi duura, sliw sum sa donona, sliw kulumayna hiɗi nisi sa ɓe kalamna, sliw sumun noŋ kaf, sa buti goyna hiɗi sa gorvona, sliw sa gurayna hiɗi sa ŋulona.

¹⁹Nan wi muura hiɗi muliyan sa kay nagatna, hiɗi vok-ma-duura visiya, nisi tokiya kay dur hiɗi nam ma ka musi kay kulumna hiɗi vok-ma-duura valamu.

²⁰Nisi vi muura hiɗi sa jobta bay-gasina sa li ɗekka vok ir muura, ɗekka ma nisi ɗut sum sa tumda vi muura tuni tisin hiɗi namna, hiɗi nisi sa girif gaa vok va ma sli tuw muura. Nisi ma' pet cuksis hay zulla vi kuta ma sufre* ka ŋal hayna.

²¹Sa hinina fi cita-goyta hiɗi kew-gaferaŋa vi nam ma ka musi kay kulumna, kew-gaferaŋa ma kali goy hay vunam pana, layayna hob hiɗi sliwna visiya.