Read Masana WID-ŊAYAYTA 20 Bible Online

WID-ŊAYAYTA 20 - Masana bible

WID-ŊAYAYTA 20

¹Bugolda nan wi sunda-wuralawna mara kep jikay gaa hay wuralawn pa, klena vi zul ma wiŋŋa hiɗi lenje ma ŋolo ka hay ɓalamu.

²Nam vi guy-ŋolla, guy ma busayna ma yum Matna hiɗi Satan. Nam junumu ir busat birim kep.

³Nam gum gaa hay zul ma wiŋŋa, duk vun zulla kaw, gum vunam gaa'a kaw, kay nam ma ɗut jaf-sumun loɗi, ta-ta busat ta birim kepta vat tuwa. Bugol kayni nam ma butis goyo ir liyn neeɗa.

⁴Nan wi zlamayn-mulda. Sum sa lakay kalamna donota vuli tisiya kay ka kitata. Nan wi ciwta vi sum sa sumun kaasi yisi goyo kuɗ di-goyta kay Yesu, kuɗ yoboyna vi Lawna kaw, hiɗi nisi sa bay girif gaa vok muura hiɗi va ma sli tuw muura, sa bay fi tumda vi nimerona hay voksiya hiɗi ɓisiya kaw, wulini sum nisin muɗi iriya, nisi ti mulda hiɗi Kristu ir busat birim kep.

⁵Sum segena sa mitina may day kuloɗi ta-ta busat ta birim kepta vat tuwa. kayni ti dayta-kulota ta jewta.

⁶Sle'ta hiɗi peldetta kay nisi sa min day kulo'o hay dayta-kulota ta jewta. Mitta ma'ta ma li gaŋeraŋ kisi loɗi, may nisi ma lak si muliyan-sa-ɗifinna vi Lawna hiɗi Kristu, nisi ma ti mulda hiɗi namu ir busat birim ɗaw'.

⁷Hay li ma busata ta birim kepta vatawana, Satan ma butis goyo hay daŋgayna valamu,

⁸nan ma kali goyo kay ɗut sum sa hay gef-nagata ma fiɗin pete, Gog hiɗi Magog,[14] kay toksi yisiya kay li duura. Ŋaɓta visiya ŋray ca ki ŋesl ma goloŋ kel niyna nala.

⁹Nisi jik kulo'o kay nagata, nisi sli kaŋŋa vi sa peldetna hiɗi hoyok-ziyna ma ŋaa ŋolla. May kut may kulo wuralawn pa, na' ŋalsi goyo.

¹⁰Matna ma ka ɗutsiya gumis hay zul ma kuta hiɗi sufre*, liyn ma muura hiɗi sa jobta bay-gasina ka hayamna. Nisi ma li las ŋolo falayta hiɗi henjeta, hay vatɗita vatɗita.

¹¹Bugol kayni nan wi zlamda-mulda ta ŋolo ta haɓ tal-tal', nan wi sa ma musi ka'na kaw. Vok iramu nagat hiɗi dukalawna muni jaŋi, nisi ma fi liyn kisi noŋɗi.

¹²Nan wi sa mitina sa ŋulona hiɗi sa gurayna kaw, lakay kulo vok zlamda-mulda. Ɗerwella mali goyo, ɗerwel mara mali goy lo, kayni mi ɗerwella vi irita. Sum sa mitina kitat kaay kisiya, gigekaw kuɗ lopna valamu valamu.

¹³Niy-lumna vul sum sa mit hayamna ay goyo, mitta hiɗi liyna vi mitta vul sa mitina visi ay goyo, gigekaw kitat kaays kalamu kuɗ lopna valamu valamu.

¹⁴Mitta hiɗi liyna vi mitta cuki hay goloŋ ma kuta, kayni ti mitta ta ma'ta.

¹⁵San gigekaw la semda valam may ɗoy hay ɗerwella vi iritɗina, gumis hay goloŋ ma kuta.