Read Masana WID-ŊAYAYTA 22 Bible Online

WID-ŊAYAYTA 22 - Masana bible

WID-ŊAYAYTA 22

¹Nam ɗekan kay niy-lumna vi niyna vi irita, ciliŋ ki kristal nala, riŋay goy hay zlamda-mulda vi Lawna hiɗi goor ɦu-dimina pa.

²Jar hagata vi hoyok-ziyna hiɗi deŋel niyna ma' pet, guna vi irita ka'a, nam vuɗ vuɗna selem doogo yam ma', nam vuɗ vuɗna valamu hay tilla tilla kafe. Hum-gu namna gut jaf-sumuna kay yersi goyo.

³Va ma beɗay goyna ma li loɗi. Zlamda-mulda vi Lawna hiɗi zlamda-mulda vi goor ɦu-dimina ma tun hay hoyok-ziy namna. Sa sunda valamu ma sunumu,

⁴nisi ma wum iramu, semda valam ma ɗo kulo hay voksiya.

⁵Henjeta ma li loɗi, nisi ma gar haraŋa vi fitilla hiɗi fatta loɗi, kay Lawna Bum-Sumuna kay tuwamu ma li haraŋ kisiya, nisi ma ti mulda ta-ta hay vatɗita vatɗita.

⁶Nam danu: Yoboyna kayni nam gasi gasiya. Bum-Sumuna Lawna ma gi Ŋusta valam hay sa jobta-Lawna, gi sunda-wuralawna valamiya, kay ɗek sa sunda valamu kay sle ma min li vokay wulin ɗawni.

⁷Humgiya, nan ma co goboyo. Sle'ta ka kay sa ma ŋom yoboyna vi jobta-Lawna ma ɗoy hay ɗerwelda kayni.

⁸Nan Yohana mi ma hum slen kayni, nan mi ma wum hiɗi iranu kaw. Hay li ma nan hum slen kayni, wum hiɗi iranu kaw, nan her gaa sem sunda-wuralawna ma ɗekan kay slen namna, kay girifimu.

⁹May nam di tanu: Tel tuwaŋu kay li van kayni, nanu mi niraŋŋa hay lopna, nir ɓosiyom sa jobta-Lawna kaw, hiɗi nir nisi sa ŋom yoboyna ma ɗoy hay ɗerwelda kayni. Girifaŋgin mi Lawna.

¹⁰Nam di tanu: Yoboyna ma di hay ɗerwelda kayni, naŋ ma dukum vunam gaa hiɗi soonɗi, kay liyna ka goboyo.

¹¹Sa ma min li bay-ɗigerta hinim li bay-ɗigerta valam tuwa, sa ma min li liwista hinim li liwista valam tuwa, sa ma min li peldetta hinim li peldetta valam tuwa, nam ma peldetna hinim li goy peldet tuwa.

¹²Humgiya, nan ma ma gosoyo. Nan ka mar wurakŋa van kanu kay wurak mi san gige gigekaw kuɗ lopna valamu valamu.

¹³Nanu mi Alfa hiɗi Omega, ma jewna hiɗi ma cawna, cawa'ta tunita hiɗi dabaŋ-gu'ta.

¹⁴Sle'ta ka kay nisi sa muz sligar-tuwna visi goyo, kay nisi ma fi liyna tam guna vi irita, kay cuk hay vun-galana vi hoyok-ziyna kaw.

¹⁵May goy jiya durnayna, sa li gul-yalda, sa li zlata-bulona, sa ci matna, sa girif lawayn ma waana hiɗi san gigekaw ma min sinda, ma ka sin kaw ka'a.

¹⁶Nan Yesu, nan gi sunda-wuralawna vanisawa kay di slen kayni goy tigiya hay ziyna-Lawna. Nanu mi sutayna hiɗi jafna vi David. Mislek ma wilena ma fo liyna.

¹⁷Ŋusta hiɗi cat-goota di'e: Naŋaya! Sa ma hum slen kayni, hinim di ala naŋaya! sa ma laat lumna, nam ma ma'a, sa ma mina, nam ma ci niyna vi irita bay wuraki.

¹⁸Nan di goyo tam gigekaw ma hum yoboyna ma jobta ma ɗoy hay ɗerwelda kayni ala: La sa cuk mara vunamu, bakmarana ma ɗoy hay ɗerwelda kayni, Lawna ma cuk mara vun falamna kaw.

¹⁹La sa yaw goy kuɗ yoboyn ma jobta ma ɗoy hay ɗerwelda kayni, ir ɓurawta valamu ma ka hay guna vi irita hiɗi hoyok-ziyn ma peldetna ma ɗoy hay ɗerwelda kayni Lawna ma yawam goyo kaw.

²⁰Nam ma di goy kay slen kayni di'e: Awa nan ma co gosoyo. Amen! Naŋaya Bum-Sumuna Yesu.

²¹Slugota vi Bum-Sumuna vaya Yesu mus hiɗi nigi mus musge!