Read Masana WID-ŊAYAYTA 7 Bible Online

WID-ŊAYAYTA 7 - Masana bible

WID-ŊAYAYTA 7

¹Bugol slen kayni, nan wi sunda-wuralawna fiɗi lakay kulo kay gef-nagat fiɗi. Nisi ka tel simeɗ ma biw gaa kay nagat kuɗ batam fiɗina, kay simeɗna ma biw gaa kay nagatɗi, kay niy-lumnaɗi, kay gunɗi kaw.

²Nan wi sunda-wuralawna mara'a jikay kulo hay liy ma fatta dayna pa, soona vi Lawna ma irina ka moki hay ɓalamu, nam siwel hiɗi delem kulo ŋolo tam sunda-wuralawna sa fiɗina sa donot vuli tisiya kay li joot tam nagata, tam niy-lumna kaw.

³Nam disiya: Nigi ma tun ɓigi tam nagatɗi, tam niy-lumnaɗi, tam gunɗi kaw, ta-ta nay tun soona hay vok sa sunda vi Lawna vay kaf tuwa.

⁴Human hum ŋaɓta vi sa soon tuni hay voksina, nisi birim kis-fiɗi kalam dok-fiɗi yalam fiɗi hay jafna vi Israyel noŋ kaf.

⁵Hay jafna vi Yuda, sa soon tuni hay voksina noŋ pet birim doogo yam ma', hay jafna vi Ruben birim doogo yam ma', hay jafna vi Gad birim doogo yam ma',

⁶hay jafna vi Aser, birim doogo yam ma', hay jafna vi Neftali birim doogo yam ma', hay jafna vi Manase birim doogo yam ma',

⁷hay jafna vi Simeyon, birim doogo yam ma', hay jafna vi Levi, birim doogo yam ma', hay jafna vi Isakar birim doogo yam ma',

⁸hay jafna vi Zabulon birim doogo yam ma', hay jafna vi Yosef, birim doogo yam ma', hay jafna vi Benyamin birim doogo yam ma', sa soon tuni voksina.

⁹Bugol kayni, nan ka ɗuwa, iran wi sumuna ŋolo sa san as ŋaɓsiɗi, nisi kuɗ jaf-sumun kaf, kuɗ vuɗna vi sumun kafe, sumun kuɗ jafsi kafe, kuɗ vun kafe. Nisi ka lakay vok zlamda-mulda vi goor ɦu-dimina, cuki hiɗi sligar ma haɓna, hiɗi hum-gomona hay ɓisiya.

¹⁰Nisi ka siwel kulo hiɗi delsi ŋol ala: Su'da na' vi Lawna vaya ma ka musi kay zlamda-mulda, na' vi goor ɦu-dimina kaw.

¹¹Sunda-wuralawna kaf ka zlaray kat zlamda-mulda, sa maariyana hiɗi sle ma irina ma fiɗina kaw; nisi dab voksi gaa kay nagata vok zlamda-mulda, nisi girif Lawna,

¹²nisi di'e: Amen! Suburta, gajijita, yalla, lop ma slugona, sli-yamda kulota, gaŋeraŋa hiɗi donota kaf, nam vi Lawna vaya hay vatɗita vatɗita, Amen!

¹³San kep jar sa maariyana sli ditiya di tanu: Nisi sa cuki hiɗi sligar ma haɓn lakŋi si sarige? Nisi may arige?

¹⁴Nan dumu: Bum-Sumuna vanu, naŋ wi'e. Nam danu: Lakŋi si nisi sa may goy hay lasta ta ŋolda pana, nisi muz sligar-tuwna visiyawa goy haɓ tal-tali hay busuwna vi goor ɦu-dimina.

¹⁵Kuɗ kayni, nisi ka vok zlamda-mulda vi Lawna, nisi ka sunumu hay falayta hiɗi henjeta kaf hay Tempella valamu, nam ma ka musi kay zlamda-mulda ma pi guɗukŋa valam kulo kisiya.

¹⁶Mayta ma lisi loɗi, laat ma lisi loɗi, fatta ma tisi loɗi, zalla ma lisi loɗi.

¹⁷Kay goor ɦu-dimina ma ka jar zlamda-mulda ma ŋomsiya, nam ma narsi tam kaar ma law niyna vi irita, Lawna ma ɦas zimiyna kaf goy kirsiya.