Read Masana WID-ŊAYAYTA 8 Bible Online

WID-ŊAYAYTA 8 - Masana bible

WID-ŊAYAYTA 8

¹Hay li ma nam mal soona ma siɗiyana goyo, liyn ma dukalawna tun kiliŋ ir gal leer kepe nala.

²Nan wi sunda-wuralawna siɗiya ka lakay vok ir Lawna, togolomna siɗiya ay vuli tisiya.

³Sunda-wuralawna tara'a co'o, col kulo kay giwin-ma-ɗifinna, tasa ma ora ma no'osna ka hay ɓa'a, nisi vula' urdin ŋolo kay lum ɗifini, kulo kay giwin-ma-ɗifinna ma ka vok zlamda-mulda, hiɗi siɗawta vi sa peldetna.

⁴Nukŋa vi urdina kali kulo'o vok ir Lawna, hiɗi siɗawta vi sa peldetna, goy hay ɓam sunda-wuralawna pa, vok ir Lawna.

⁵Sunda-wuralawna sli tasa ma no'osna, hobom hiɗi kuta vi giwin-ma-ɗifinna, yamam gaa kay nagata, nala niyn tun caw baya, della tun caw di'e, wileta hiɗi wiira vi nagata li'e kaw.

⁶Sunda-wuralawna sa siɗiyana, sa ka hiɗi togolom ma buwna siɗiya hay ɓisiya kot tuwsi kay buw togolomna.

⁷Sunda-wuralawna ma jewna buw togolomna: Mokayna* hiɗi kuta rigasay hiɗi busuwna yak gaa kay nagata. Gal ma ɦidina vi nagata ŋalis goyo, gal ma ɦidina vi guna ŋalis goyo, us ma ŋulomna kaf ŋalis goyo.

⁸Sunda-wuralawna ma ma'na buw togolomna, hiɗiyta ta ŋolo sli kuwa, na' giys goloŋ hay niy-lum ma ŋolla, gal ma ɦidina vi niy-lumna muɗ goy busuwu.

⁹Gal ma ɦidina vi sle ma inina ma ka goloŋ hay niy-lumna ma sukka hayamna cim goyo, gal ma ɦidina vi lumayna ɓulak goyo.

¹⁰Sunda-wuralawna ma ɦidina buw togolomna, mislek ma ŋolla nig ay gaa dukalawn pa, nam ŋal ki sin kuta nala, mislek namna nig gaa kay gal ma ɦidina vi niy-lumna hiɗi liyn ma niy riŋ goy hayam pana.

¹¹Mislek na'ta semda va' ala goyo-goyna;[5] gal ma ɦidina vi niy-lumna muɗ goy galaki, sumun ŋolo fi mitta kuɗ niy namna ma muɗi goy galakŋa.

¹²Sunda-wuralawna ma fiɗina buw togolomna: Gal ma ɦidina vi fatta cim goyo, gal ma ɦidina vi tilla hiɗi mislekŋa cim goyo kaw, kay gal ma ɦidina ma muɗ jufunu, kay falayta ma ba gal ma ɦidina vi haraŋa va'a, henjeta nala kaw.

¹³Nan ɗuw kayni, iran wi bakŋa kep ma ka hal kulo jar dukalawna, nam ka di hiɗi delem kulo ŋol ala: Joota, joota, joota kay jaf-sumuna sa gaa kay nagata, kuɗ buwna vi togolomna ma sunda-wuralawna sa ɦidina min buwumna.