Read Masana WID-ŊAYAYTA 9 Bible Online

WID-ŊAYAYTA 9 - Masana bible

WID-ŊAYAYTA 9

¹Sunda-wuralawna ma vaslna buw togolomna. Nan wi mislekŋa mara'a ma dukalawna ka nig ay gaa kay nagata. klena vi ɦuɗuk ma wiŋŋa ay vuli hay ɓalamu.

²Nam mal vun zulla vi ɦuɗuk ma wiŋŋa goyo, no'osna kali goy hay zulla pa, ki no'osna vi zul ŋol ma kuta nala, fatta hiɗi dukalawna muɗi guriya kay nukŋa vi zulla.

³Baara may goy jar no'osn pa, nam cukay goy kay nagata, donot ay vuli talamu ki donota vi ɦurduwna gaa kay nagata nala.

⁴Dit diy tisi ala nisi ma li va tam us ma gaa kay nagatɗi, tam us ma ŋulomnaɗi, tam gunɗi kaw, may tam sum sa soona vi Lawna bay tun hay voksina tuta.

⁵Donot vuli tisi kayni kay ci sumun goyɗi, may kay nisi ma las sumuna ir til fiɗi, lasta visiya na' ŋray ca ki tina vi ɦurduwta hay li ma na' gi sa'a nala.

⁶Hay buur namna ɗawni, sumuna ma gar mitta, may nisi ma fa' noŋɗi, haysi ma dar mitta, may mitta ma pir goy kisiya.

⁷Baar namna sli kulumay ma tuwam ganay gan' kay duura nala, va ka kulo kalamu ŋray ca ki bogoray ma ora nala, vokomu ki vok sumuna nala,

⁸ɗuŋus ma kalamna ki ɗuŋusna vi boyna nala, siyamu ki siy zlona nala.

⁹Ŋoŋŋa ka kalamu ki ŋoŋ ma kawayn nala, suwana vi zlamiyamu ki suwana vi kekena hay li ma kulumayn ŋolo jaŋ vun duura nala.

¹⁰Giɗerem ŋray ca ki giɗer ɦurduwta hiɗi jalaŋŋa nala. Donota vuli tam giɗeremu kay las sumuna ir til vasl.

¹¹Mulla ma tuni voksina mi sunda vi zul ma wiŋŋa, semda valamu hay vun Hebren ala Abadon, hay vun Grekŋa semda valam ala Apoliyoŋ.

¹²Joota ta jewta kalawa. Ɗuwgiya, joota tara'a ma' lo ka co bugol kayni.

¹³Sunda-wuralawna ma karkiyana buw togolomna. Nam hum dit kep may goy tam miyok ma fiɗina vi giwin-ma-ɗifinna ma ora ma ka coli vok ir Lawna pa,

¹⁴dit na'ta di tam sunda-wuralawna ma karkiyana ma ka buw togolomna ala: Sunda-wuralawna sa fiɗina sa ka juni kel niy-lum ma ŋolla Eufrata naŋ ma butsi goyo.

¹⁵Ki kayn nala sunda-wuralawna sa lakay ŋom leera, buura, tilla hiɗi busata butis goyo kay ci gal ma ɦidina vi sumun goyo.

¹⁶Ŋaɓta vi sum sa li duura sa ɓey kay kulumayna nisi miliyoŋ kis-ma', human hum ŋaɓta na'ta.

¹⁷Hay slen ma vul tuwam kiranu, nan wi kulumayna hiɗi nisi sa ɓey kalamna, ŋoŋŋa visiya slaw keŋ', bufu kaw ki sufre* nala, yam kulumayna ay ki yam-zlona nala, kuta hiɗi no'osna hiɗi sufre kali goy hay vunam pa.

¹⁸Bakmara namna ma ɦidina hiɗi kuta hiɗi sufre hiɗi no'osna ma kali goy hay vunsi pana ci gal ma ɦidina vi sumun goyo.

¹⁹Kay donota vi kulumay namna ka hay vunamu, hay giɗeremu kaw; giɗerem sli guyn nala, yalam ka'a kaw, nam li sumun joo ŋol kayn hiɗi yalamu.

²⁰Sum segena sa bakmara namna may cisi goyɗina min ham kay sle ma nisi lumnaɗi; dok-dok nisi ka girif fuliyana, hiɗi lawayn ma yoray hiɗi ora, ma yoray hiɗi doorona, hiɗi wayna, hiɗiyna hiɗi guna kaw, ma as ɗuwɗi, ma as poyɗi kaw;

²¹ci-matta, gul-yalda, poyta waata hiɗi kulda visiya kaf, nisi min ham ka'ɗi.