Read Masana RUT 1 Bible Online

RUT 1 - Masana bible

RUT 1

¹Hay li ma ŋomda vi nagata ka hay ɓam sa ka kitana, mayta li hay nagata. Sa mara hay Betlehem vi Yudiya kep kali kay mus ɗawni hay Mowab, namu hiɗi cata valamu hiɗi gurona valam sa jufayna sa ma'na, kay mus ɗawni hay fulda vi Mowab.

²San kayni semda valam ala Elimelek, cata valamu semda va' ala Noomi. Gurona visi sa ma'na, yisi ala Makiliyon hiɗi Kiliyon. Nisin jaf Efratana, hay hoyok-ziyn Betlehem hay Yuda. Nisi co hay fulda vi Mowab, nisi lak ziy ɗawni.

³Bugol kayni Elimelek juf Noomi mitawa, na' mus hiɗi gurona va' sa ma'na.

⁴Nisi yaw boy sa Mowabna ma' pete. Ta jewta ya' Orpa, heta ya' Rut may. Nisi lakay ɗawni ir ki busat doogo nala.

⁵Makiliyon hiɗi Kiliyon ma' pete mitiya, cata hini kuyu'u va' kepe, gurona va'a hiɗi jufa' kaw say loɗi.

⁶Hay na'ta Noomi hiɗi kuniya' sa boyna fokaya kay na' min hin fulda vi Mowab, kay na' humi hay fulda vi Mowab ala Ma-vatɗina humam gumawa kay sumuna valamu, kay nam vulsi va ma tinawa.

⁷Na' kali goyo hay liyn ma musta va'a, kuniya'na ma' pet ay hiɗi na'a, nisi tun goy hay hagata kay hot hay nagata vi Yuda.

⁸Noomi di tam kuniya' sa ma'na: Tuɗgiya, gigekaw hot hay ziyna vi sulumu sulumu. Hin Ma-vatɗina li ŋaat katgi lige, ki nigi li ŋaata tam nisi sa mitina hiɗi nanu nala kaw.

⁹Hin Ma-vatɗina vul mi gige jargi ma' pete kay nigi ma fi tun-sukka hay li ma nigi yaw jufay sara'a. Na' bowsiya, may nisi tun caw tiy hiɗi zimiyn ŋolo.

¹⁰Nisi di ta'a: A'a, may naɗi, numa min tuɗ hiɗi naku hay jafna vagu.

¹¹Noomi hot di'e: Hotgiya, gurona vanu, nigi tapay kuɗan ɗawn kay mige? Guro sa jufay sara hini hayan lo kay muɗ jufaygi su?

¹²Hotgiya, gurona vanu, tuɗgiya, nan muɗi maari, may as kay fi juf loɗi, la nan digi ala nan ka cub kay sa slan hay henjet ta vaydita kay fi guro sa jufayna kaw,

¹³nigi as cubsiya ta-ta wulsi vat su? Nigi as tel tuwgi kay hin jufay sara yawgiɗi su? Asɗi, gurona vanu, dikan ka tan ŋolo kigiya kay Ma-vatɗina gi ɓalam ma nekŋawa gaa kanu.

¹⁴Nisi tiy ŋolo lo. Hay na'ta Orpa gi deɓ mi kuno'ta, may Rut tap kuɗ kuno'ta.

¹⁵Noomi di'e: Ɗuwagu, hinakga hotawa tam sumuna va'a hiɗi lawayna va'a, tapay kuɗ hinakga.

¹⁶May Rut hot dita: Nak ma son dono kay hinagɗi, gan iran goyɗi, liyn ma nak ma tuɗa nan ma tuɗa, liyn ma nak ma bura nan ma bura, jafna vagu ma muɗ mi jafna vanu, Lawna vagu ma muɗ mi Lawna vanu.

¹⁷Liyn ma nak ma mit haya nan ma mit haya kaw, nisi ma panis ɗawni, la kaay jaray goy ɗawn ti mitta tuta ɗini, Ma-vatɗina ka kitata valam ta ŋolda kanu.

¹⁸Hay li ma Noomi wi ala Rut dika' so'otawa kay tuɗ hiɗi na'a, na' hina'a.

¹⁹Nisi kali kuɗ tuwsi ma' pete ta-ta nisi cuk kulo'o hay Betlehem. Hay li ma nisi cuk kulo hay Betlehem, sumuna muɗi ɦuyum' ŋolo kisiya, sumuna ka joba: Kilan ti Noomi su?

²⁰Na' di tisiya, nigi ma yan Noomi loɗi, may yan mara, kayn ala galaki, kay Lawn ma Gaŋeraŋ-Petna muɗan dikanawa galaki ki miyawn nala.

²¹Nan kali goy hobiya, may wulin Ma-vatɗina hotaniyawa goy ɦawa kiɗaŋ-kiɗaŋ. Yan Noomi ɗawn kay mige? Ma-vatɗina ɗek tuwamawa goy tanu, ma Gaŋeraŋ-Petna lan jootawa.

²²Ki kayn nala Noomi coy vo'o, hiɗi Rut ta Mowabta ta kuno'ta kuɗa'a. Nisi co hay Betlehem hay li ma feɗna vi orgena coowa.