Read Masana RUT 2 Bible Online

RUT 2 - Masana bible

RUT 2

¹Hay na'ta juf Noomi sugolom mara ka'a, sa namna mi sa ma dono'o, faray kaw hay jafna vi Elimelek, semda valamu ala Bowaz.

²Rut ta Mowabta di tam Noomi: Nan min tuɗ goy sine'e kay gar ɦelena kuɗ san gigekaw ma nan fi slugotawa vok iramu. Noomi di ta'a: Tuɗagu goota vanu.

³Na' kaliya, na' co gar ɦelena hay sinena mara kepe bugol sa feɗna. Dolay kayni sine ma na' ka gar ɦelen hayna mi sinena vi Bowaz ma hay jafna vi Elimelekŋa.

⁴Ɗuw na kayni Bowaz coy goy hay Betlehem pa, nam di tam sa feɗna: Ma-vatɗina li hiɗi nigiya. Nisi hotom dita: Naŋ kaw Ma-vatɗina ma gaŋ bolo.

⁵Bowaz di tam sa ma sunda valamu ma ka ŋom sum sa feɗna: Cat-goot zawni ti cata vi gige?

⁶Sa ma ŋom sum sa feɗna dumu: Kayni ti goota Mowabta ta tapay kuɗ Noomi hay li ma na' hotay hay nagata Mowab pa.

⁷Na' di tuma ala: Hinan tuɗ kuɗ sa feɗna kay vilek ɦele ma hini hay baŋal muɗakŋa. Hay li ma na' co tani grawn pa, na' ka kulo kay se'a ta-ta wulini, na' kal kalaf hay ziyd kay tun suka' kayni ir neeɗa ɦawa.

⁸Bowaz di tam Rut: Humag ŋaa'a goota vanu, nak ma tuɗ vilek ɦelena hay sinena vi sa maraɗi, nak ma tuɗ goy gine hiɗi sen tanɗi. Tapag tuwag hiɗi boy sa sunda vanu.

⁹Nak ma cuk irag kay sine ma nisi ka feɗemna, nak ma tuɗ bugolsiya, nan vul hagata kay sa joriyona ma tamagɗi; hay li ma laat vagawa, niy ma sum sa joriyon gomina ka hay genda, nak ma tuɗ ci'e.

¹⁰Rut gi tuwa' gaa vokomu, na' girif gaa kay nagata. Na' dumu: Nan ta sa wan noŋɗit zawni naŋ lan sle ma sleɗan hayan nala kay mige?

¹¹Bowaz hot di ta'a: Nan humi goy haraŋ kagu kay lopna ma nak li tam kunakga bugol mitta vi jufagu. Nak hin bugu hiɗi sugu hiɗi nagata ta nak vuɗi haya'ta kaw, nak maawa tam sum sa nak wisi jewɗi.

¹²Hin Ma-vatɗina lag ŋaata kuɗ va ma nak lumna, Ma-vatɗina Lawna vi Israyel vulag ŋaata, nam sulura' goy kaw, kay nak coowa kay ŋay tuwag gaa kuɗ gilaŋatamu.

¹³Rut di'e: Nan fi slugotawa vok iraŋu mulanna, naŋ teŋan iranawa, naŋ sleɗ dik ta sunda vaŋawa, nir na'ta kep nan may ŋray hiɗi boy sa sunda vaŋ noŋɗi.

¹⁴Hay li ma nisi ka ti'e: Bowaz di tam Rut: ɦurakay goboyo, jutag hambulla, dom hay vin ma zlayna, na; mus gaa tam sa feɗna, Bowaz vula' orge ma hawayna, na' mutumu, hobay kaw, na' ŋomom diram ma hinna.

¹⁵Bugol kayni na' fokay kulo'o kay vilek ɦelena lo. Bowaz di tam sa li lopna valamu: Hina' vilek jar muɗakŋa kaw, baya'ɗi.

¹⁶Nigi ma cuka' yam wan gaa kep kep kaw kay na' ma vilekemu, nigi may lawa'ɗi.

¹⁷Na' vilek ɦelena hay sinena ta-ta hay vulatita. Na' hot to alkamarena ma na' vilekemayna, nam as hob sakka vi orgena kepe.

¹⁸Na' slumiya, maram hay hoyok-ziyna, vulum kir kuno'ta. Caw wan (ma hawayna) ma hin ka'na na' butum goyo kaw, vulum mi kuno'ta.

¹⁹Kuno'ta joba'a: Nak gar ɦelen ay vaydi arige? Nak li lopnay vaydi arige? San ma tun ŋalda valam kagŋa Lawn gum bolo. Na' vi labar ma li'ay ta'na mi kuno'ta, bugolda na' di ta'a: Sa ma nan li lop ay kuɗumna yum ala Bowaz.

²⁰Noomi di ta'a: Ma-Vatɗina ma li ŋaata tam sa ma irina hiɗi sa mitina kaw gum bol gi ge. San namna kayni goboy hay jafna vaya, namu jar nisi sa yaw vocota vayna.

²¹Rut ta Mowabta hot di'e: Nam dan lo ala nan ma tap tuwan hiɗi sa sunda valamu ta-ta lopna vi feɗna valam vat goyo.

²²Noomi di tam kuno'ta Rut: Nam kayni mi sa ma ŋaa'a goota vanu: Nak ma tap kuɗ sa sunda valamu, tun seg goy hay sine vi sa maraɗi.

²³Ki kayn nala Rut ka li lopna hiɗi sa sunda vi Bowaz kay vilek helena ta-ta nisi vat feɗna vi orgena hiɗi alkamerena. Na' ka musi kayni hiɗi kuno'ta may.