Read Masana 1 SAMUEL 10 Bible Online

1 SAMUEL 10 - Masana bible

1 SAMUEL 10

¹Samuel sli doŋdoloŋ ta hiɗi mula kepe, nam ɦokom kay yam Sawul. Nam bowomu di'e: Ma-Vatɗin ɦok mulawa kaŋu kay naŋ ma li mi ma ŋolla vi vocota valamu ɗisu?

²Vaydi, hay li ma naŋ hinan ɗawni, naŋ ma fi sumun ma' goboy hiɗi yam-usta vi Rakel, hay jar-liyna vi Benyamin, hay Selsak. Nisi ma di taŋ ala: Kuro ma naŋ garamna nam fiya; humaŋu, wulin buŋ ka var kayn kay kuron loɗi, may kaŋ naŋu. Nam ka di ala: Goora van wulin kayn nan ma fum ɗawn fitige?

³Hay li namna pa naŋ ma tuɗ vokaŋ gine'e, naŋ ma co tam gu-ma'asna hay Tabor, naŋ ma ŋaf hiɗi sumun ɦidi, nisi ka jik kulo hay ziyna-Lawna hay Betel, ma kepna ka ziy guro fok-meen ɦidi hay ɓalamu, hena ka hiɗi hambulla hay ɓalam ɦidi, ma hena ka hiɗi genda ta vin haya'ta hay ɓalamu.

⁴Nisi ma jobaŋ ala naŋ ka ŋaa su. Nisi ma vulaŋ fu ma ma'na, naŋ ma vum hay ɓisiya kaw.

⁵Bugol kayni, naŋ ma co hay Gibeya-Elohim, liyn ma vokŋa vi sa Filistin ka tuni hayna. Hay li ma naŋ coowa hay hoyok-ziyna, naŋ ma ŋaf hiɗi vokŋa vi sa-jobta sa jik gaa'a kay liy ma jiŋiliŋŋa; dilla, darayna, zlekemna hiɗi dil mara'a mara'a ka liw voksiya, nisi ka di slen ma voksina may.

⁶Ŋusta vi Ma-Vatɗin ma cuk kaŋu, naŋ ma di slen ma vokŋa hiɗi nisi kaw, naŋ ma muɗ jafaŋ vaŋu.

⁷La ɗek namna cani laawa taŋu, naŋ ma li va ma naŋ fi a lina, kay Ma-Vatɗin ka hiɗi naŋu.

⁸Bugolda naŋ ma tuɗ hiɗi nanu hay Gilgal, humaŋu, nan ma tuɗis kuɗaŋu, kay li ɗifin ma ŋal-goyna hiɗi ɗifinna vi lop ma slugona. Naŋ ma cub buur siɗiya jew a nan ma tuɗis kataŋu, a nan ma daŋ kay va ma naŋ ma lumna.

⁹Hay li ma Sawul muɗ ŋoromu kay ja jaram goy hiɗi Samuel, Lawn vulum dikga tara'a, ɗekka na'ta li goyo hay buur na'ta kafe.

¹⁰Hay li ma nisi co hay Gibeya, ɗuw na kayni, sum sa jobta kuɗ tuwsi ŋolo co ŋaf hiɗi namu. Ŋusta vi Lawn cuk kalamu, nam tun caw di kay sle ma vokomna jarsiya.

¹¹Nisi kaf sa wum jewna ɗuw kayni nam ka di law ma vokomna hiɗi sa jobta segena. Nisi tun caw law jar-tuwsiya jar sumuna: Va ma co tam goora vi Kis kayni mi mige? Sawul kaw nam jar sa jobta lay su?

¹²San kep hay Gibeya hot dit ala: Busiya nam mi gige?[3] Kuɗ kayni law ma nir-niramna hini ala: Sawul kaw ka jar sa jobta lay su?

¹³Hay li ma nam vat dit ta vokomta vatna, nam kal kulo hay liyn ma jiŋiliŋŋa.

¹⁴Nasum Sawulla di tam Sawul hiɗi sa ma sunda ala: Nigi ay kayn arige? Sawul hot dita: Numa ay gar kurona, may numa fumɗi, nala numa cap tam Samuel.

¹⁵Nasum Samuella hot dumu: Naŋ van labara kay slen ma Samuel dum tigina.

¹⁶Sawul dumu: Samuel duma goy haraŋ ala kuron fiya. May labara vi mulda ta Samuel dum ka'ta nam min dumtaɗi.

¹⁷Samuel yi sumun vok Ma-Vatɗina hay Mispa,

¹⁸nam di tam gurona vi Israyel: Humgi va ma Ma-Vatɗina Lawna vi Israyel di'e: Sum sa Israyella nan yawsiyay goy hay Egipte pa, nan butgi goy hay ɓam sum sa Egiptena hiɗi muliyan kaf sa ka curoɗgina.

¹⁹Vaydi, Lawn ma butgi goyo hay makka vigi kaf hiɗi lasta vigi kafna, nigi noyomawa goyo, nigi ka di talam ala: Naŋ tunma mul kuma'a. Wulin kayn nigiyay vok Ma-Vatɗina, kuɗ jafna vigiya vigiya, hiɗi vokŋa vigiya vigiya kaw.

²⁰Jafna vi Israyel kaf co vok Samuel: Ŋaɓta nig kay jafna vi Benyamin.

²¹Jafna vi Benyamin co vok Samuel kuɗ ziyna visiya visiya, ŋaɓta nig kay ziyna vi Matri. Bugol kayni ŋaɓta nig kay Sawul goora vi Kis. Nisi garamu, may fumɗi.

²²nisi job Lawn mara lo ala: Sa mara ma bay co tan ka lo su? Ma-Vatɗin di'e: Humgiya: Sawul ka ŋayay jar jakŋa.

²³Nisi jaŋ talamu kay vumi goyo, nala nam co jar sumuna, yalam ka suwsi kulo hiɗi fiyokka kafe.

²⁴Samuel di tam sumuna: Sargit tige, nigi ka ɗuw san ma Ma-Vatɗin vilekemna su? Jar sumun kaf sa ma ŋray hiɗi nam mayɗi. Sumun kaf tun caw ciriy ala: Mulla mus iri musge.

²⁵Samuel ɗek tam sumuna kay va ma nisi ma lum tam mulla, nam ɗo kayni gaa hay ɗerwelda, burum vok ir Ma-Vatɗina. Bugol kayni nam gi ir sumun kaf hay ziyna visiya visiya.

²⁶Sawul kaw kali hay ziyna valamu hay Gibeya. Sum sa varta visi ŋaana, sa Lawn kal hay diksina tap kuɗumu.

²⁷Hiɗi kayn kaf sum sa yisi ɗeŋŋa ka jarsiya: Kay nisi di'e: Mige, kilan mi sa ma as suɗay goyn su? Nisi tun caw ɗuwum birek-ceke, min maram vuldaɗi. May Sawul min jak humam kay kaynɗi.