Read Masana 1 SAMUEL 11 Bible Online

1 SAMUEL 11 - Masana bible

1 SAMUEL 11

¹Hay na'ta Nahas ma Amonna co'o, nam sli Yabes hay Galaad. Sum sa hay Yabesna kaf di tam Nahas: Vaŋ bono hiɗi numa'a, numa ma sunaŋu may.

²May Nahas ma Amonna hot disiya: La nigi min ala nan vi bono hiɗi nigiya, nan patgi irgi ta jufta goy kep kep tuwa, ki kayn nala nan min tun zulota kat sum sa Israyel kafe.

³Sum sa maariyana vi Yabes di talamu: Naŋ ma hinma sle'ta ir buur siɗiya, kay a numa ma cuk sa sunda hay nagata vi Israyel kafe, la sa ma gut kuɗma mayɗi ni numa ma hin tuwma maŋu may.

⁴Sa cuki sunna co hay Gibeya vi Sawul, nisi di labar namna tam sumuna. Sumun kaf pat tiyn digi-digi'.

⁵Duw na kayn Sawul may goy hay sinen kuɗ luwayna valam pa. Nam di'e: Sumun tiy kayn kay mige? Nisi vum labara kay slen ma sum sa hay Yabes dumna.

⁶Hay li ma Sawul hum labara namna, ŋusta vi Lawn kal hayamu, nam muɗ ɦiy dono ŋolo.

⁷Nam yaw luway-jufay ma', kaam sliwam goy ne' ne', nam cuk sumun hiɗi namu hay nagata vi Israyel kafe, nam di'e: Sa ma min tuɗay kuɗ Sawul hiɗi Samuelɗina, ma ka sliw luwayna valam goy ɗawn ki kayn nala kaw. Narta vi Ma-Vatɗina kal hay dik sumuna, nisi tok tuwsiya ki sa ma kepna ɦawa nala.

⁸Nam ŋaɓ sumun goyo hay Bezek; gurona vi Israyel ay sumun birim kis-ɦidi, sumuna vi Yuda ay birim dok-ɦidi may.

⁹Nisi di tam sa sunda sa cona ala: Nigi ma di ki kayn nala mi sum sa hay Yabes hay Galaadna: Jifini, hay li ma fatta tun cawawa ti'e, nigi ma fi sum sa gut kuɗgina. Sa cuki sunna tuɗ labar namna mi sum sa hay Yabesna, nala sa Yabesna diksi li firi ŋolo,

¹⁰nisi di tam sa Amonna: Jifini numa ma vul tuwma migiya, nigi as li tuma'a ki nigi min nala.

¹¹Hay buurta ka'ta, Sawul ɓuraw sumun goy ir vok ɦidi. Nisi cuk kulo hay kaŋŋa vi sa Amonna hay ŋarpita, nisi cisi ta-ta hay li ma fatta muɗ ti'e. Sa pir goyna mer goy kep kep, sum sara may hin kuɗ tuwsi ma' noŋɗi.

¹²Nisi di tam Samuel: Sum sa di ala Sawul as ti mul kayɗina ka arige? Cukgi sum nisin ay goyo, kay numa min cisi goyo.

¹³May Sawul di'e: Buur ta vaydit zawn as ci sa mat haya'ɗi, kay Ma-Vatɗin li butta-goyta ŋolda vi sa Israyel kayn haya'a.

¹⁴Samuel di tam sumuna: Nigiyaya, tuɗay hay Gilgal kay tun mulda.

¹⁵Sumun kaf kali hay Gilgal, nisi tun Sawul mul vok ir Ma-Vatɗina hay Gilgal. Ɗawni nisi li ɗifinna vi lop ma slugona vok ir Ma-Vatɗina; ɗawni kaw Sawul hiɗi sum sa Israyel kaf li firi ŋolo.