Read Masana 1 SAMUEL 12 Bible Online

1 SAMUEL 12 - Masana bible

1 SAMUEL 12

¹Samuel di tam sa Israyella kaf ala: Humgiya, nan humgi delgiyawa hay slen ma nigi danti kafna, nan tun mulawa kigiya kaw.

²May wulini, zawn mi mul ma tun vokgin ɗawni. Nan hayɗini, nan viy busaya, yan ɓoowa haɓi, gurona van ka jargiya may; nan tuni vokgiya, hay joriyota van pa ta-ta vaydi.

³Nan zawni, vok ir Ma-Vatɗina hiɗi falamna ma mul ɦoki kamna kaw, nigi ma dan goy kay joo ma nan lum tigina, sa ma nan vi putna valamu lebo kurona valamu mi gige? Sa ma nan curoɗomu lebo lum hiɗi dono'o mi gige? Sa ma nan duk iran talamu kay yaw slen hay ɓalamu mi gige? la ka'a nan vulgit goyo.

⁴Nisi hot dita: Naŋ may curoɗma noŋɗi, naŋ may luma hiɗi ɗeŋ noŋɗi, naŋ may vi va hay ɓam sa noŋɗi lay.

⁵Nam disi lo: Ma-Vatɗina ka wi jaraya, falamna ma mul ɦoki kalamna ka wi jaray kaw, hay buur na'ta zawni, ala va vigi may hay ɓan noŋɗi. Nisi hot dita: Awa, nam ka wi jaraya.

⁶Bugol kayni Samuel di tam sumuna: Musus hiɗi Aaron tunsi kigi kayn mi Ma-Vatɗina, mi ma yaw sumaygi ay goyo hay nagat Egipte kaw.

⁷Wulin kayni, nigiyay vok ir Ma-Vatɗina, kuɗ ŋaata ta nam la' tigi kafta, hiɗi sumaygiya kaw.

⁸Bugol cota vi Yakub hay Egipte kayni, sumaygi tiy tam Ma-Vatɗina, nala nam cuk Musus hiɗi Aaron aya, nisi kal sumaygi goy hay nagat Egipte, nisi laksi hay liyn tani.

⁹May yisi jok Ma-Vatɗina Lawna visiya; nala nam gussi goy hay ɓam Sisera, ma ŋolla vi sojena vi Hatsor, nam gussi goy hay ɓam sa Filistina, hay ɓam muliyana vi Mowab kaw, nisi dur sa Israyella.

¹⁰Nisi hot tiy tam Ma-Vatɗin lo, nisi di'e: Numa li sulukawa, kay yuma jok Lawnawa goyo, numa sun Baal* hiɗi Astarte*, wulin kayni naŋ butma goy hay ɓam sum sa gawt kuma'na yo, nala numa ma sunaŋu.

¹¹Ma-Vatɗina cukay Yerubaal hiɗi Bedan[4] hiɗi Yefte hiɗi Samuel aya, nisi butgi goyo hay ɓam sa gawta sa ka ŋuyi tigina, nala nigi lak hay sle'ta.

¹²Bugol kayni, hay li ma nigi wi ala Nahas mul ma Amonna ka durgiya, nigi di tan ala, marya nan gargi mul kigiya. May mulla vigi kayni mi Ma-Vatɗina Lawna vigiya.

¹³Wulin kayni mulla vigi ma nigi vilekemna, ma nigi jobomna zawni yo. Humgiya, Ma-Vatɗin tun mulawa kigiya.

¹⁴La nigi li nar kuɗ Ma-Vatɗina, la nigi sunumu, la nigi hum vunamu, la nigi may ŋel dita vi Ma-Vatɗinɗi, nigi ma jun tuwgi tam Ma-Vatɗina Lawna vigiya, nigiya hiɗi mulla vigi lay.

¹⁵May la nigi hum kuɗ dita vi Ma-Vatɗinɗi, la nigi ŋel vun Ma-Vatɗina, nam ma ɗek donota valam goy tigiya, ki nam li tam sumaygi nala kaw.

¹⁶Nigi ma cub tani mara lo, ɗuwgi ɗekka ta Ma-Vatɗin ma la' kirgit ɗawni.

¹⁷Wulini nay ka hay feɗna vi alkamarena ɗisu? Nan min job tam Ma-Vatɗina, nam ma gi niy-ma-bayna hiɗi niy ma sin aya. Nala nigi ma wi'e, nigi ma vi ala nigi li suluk tam Lawn sem ŋolo hay li ma nigi job mul kigiya.

¹⁸Samuel yi sem Ma-Vatɗina, hay buur na'ta Ma-Vatɗin gi niy-ma-bayna hiɗi niy ma sin aya. Sumun kaf li nar ŋolo kay Lawna, kay Samuel kaw.

¹⁹Sumun kaf di tam Samuel: Siɗawaŋ Ma-Vatɗina Lawna vaŋu, siɗawam kay sa sunda vaŋu, kay numa ma mitɗi; kay suluk ma numa lum kafna, numa tap talamu suluk ma hena, kuɗ job ma numa job mulla.

²⁰Samuel di tam sumuna: Nigi ma li nar noŋɗi, joo na'ta kaf kayn nigi la'awa; may muɗgi ŋorgi mi Ma-Vatɗinɗi, sungi Ma-Vatɗin hiɗi dikgi kafe.

²¹Muɗgi ŋorgiɗi, la naɗi, nigi tuɗ ɗawn kuɗ sle ma waana, ma nigi as fi niy kuɗumɗi lay, ma as butgi goyɗi lay, kay kayni mi sle ma waana.

²²Ma-Vatɗin as hini sumuna valam goy noŋɗi, kuɗ semda valam ta ŋolda, kay Ma-Vatɗin yi va kalamu a ligi goy sumuna valamu.

²³Gine'e hiɗi nanu kay li suluk kat Ma-Vatɗina, nan as siɗaw kigi dok-doko kaw! Nan as hatgi hagat ta ŋaata hiɗi ta ɗigerta dok-doko kaw.

²⁴Ligi nar kay Ma-Vatɗina tuta, nigi ma lak jigere kay sunum hiɗi dikgi kafe; kay ɗuwgi donota valam ta nam ka ɗeka' goy jargit tige.

²⁵May la nigi li joo'o, nigi hiɗi mulla vigi kaw ma ba goyo.