Read Masana 1 SAMUEL 13 Bible Online

1 SAMUEL 13 - Masana bible

1 SAMUEL 13

¹Hay li ma Sawul muɗ mul kayni, busata valam asay. nam ti mulda kay Israyel ir busat ma'.

²Sawul vilek sum sa Israyella birim ɦidi, sumun birim ma' ay hiɗi namu hay Mikmas, kulo kay hiɗiyta vi Betel kaw, sumun birim ɗaw ay hiɗi Yonatan hay Gibeya vi Benyamin. Nam gi ir sum sa hinina, gigekaw hay ziyna valamu valamu.

³Yonatan ci guvernera vi Filistina ma ka hay Geba, sum sa Filistina hum labara namna. Sawul buw togolomna hay nagat kaf, nam di'e: Nigi sa hebrena humgiya.

⁴Sum sa Israyel kaf hum labar ma ka di ala: Sawul ci guvernera vi Filistinawa, sa Israyella muɗ tuwsiyawa bisi vok sa Filistina. Sumun fi yit kat Sawul hay Gilgal.

⁵Sum sa Filistin tok tuwsiya kay dur sa Israyella. Keke-ma-duura visi ay birim kepe, sa ɓe kulumayn birim karkiya, nisi ay ŋol ɦini-ɦini ki ŋesl ma goloŋ kel niy-lum ma ŋolla nala. Nisi co'o tun vokŋa visi hay Mikmas, hay gal kuɗuwu vi Bet-Aven.

⁶Hay li ma sum sa Israyella wi ala nisi ka vun-zlata, kay sumun ŋuysiyawa goboyo, nisi ŋay goy hay zul-hiɗiyna, goy jar gikŋa, kulo jar hiɗiyna, hay simdira, hay kaara kaw.

⁷Sum sa Hebren segena ɦaw niy-lumna Yordan kulo'o, kay tuɗ hay nagata vi Gad hiɗi Galaad. Sawul ay hay Gilgal tuwa, Sum sa ay hini talamna kaf tuwsi tun caw visi bat-bat'.

⁸Nam cub Samuel ta-ta ir buur siɗiya, ki Samuel dum nala.[5] May Samuel may co hay Gilgalɗi, nala sumun mer goy gine hiɗi Sawul.

⁹Nala Sawul di'e: Nigi ma maran ɗifin ma ŋal-goyna hiɗi ɗifinna vi lop ma slugona. Nam li ɗifin ma ŋal-goyna.

¹⁰Hay li ma ɓalam vat hiɗi ɗifinna vatna, ɗuw na kayn Samuel coyawa. Sawul kali goy kiramu kay gum deɓe.

¹¹Samuel di'e: Naŋ lum nala kayn mi mige? Sawul hot dita: Hay li ma nan wi ala sumun ka mer goy gine hiɗi nanu, naŋ kaw may coy ki naŋ di naɗi, sum sa Filistin kaw ka tokay hay Mikmas,

¹²nan di ala sum sa Filistin ma co duranu hay Gilgal, nala nan may tiy tam Ma-Vatɗinɗi! Nan li raw-goyta, nan li ɗifin ma ŋal-goyna may.

¹³Samuel dumu: Naŋ li kayni ki sa ma ɦay-ɦayn nala, vun-ma-gatna ma Ma-Vatɗina Lawna vaŋu vulaŋgina naŋ min li kuɗumɗi. Lali a Lawn vul donot kay mulda vaŋ kay sa Israyel ɗawni, ta-ta hay vatɗita,

¹⁴may wulin kayni, mulda vaŋ ma mus ta-taɗi. Lawn vilek sa ma dikam minimnawa, Ma-Vatɗin ŋaɓamawa goyo kaw kay nam ma tun mi ma ŋolla kay sumuna valamu, kay mige slen ma Ma-Vatɗina Lawna vaŋ daŋgina naŋ min li kuɗumɗi.

¹⁵Bugol kayni Samuel fok kulo'o nam fokis hay Gilgal pa, kal kulo hay Gibeya vi Benyamin. Sum sa ay hiɗi Sawul nam ŋaɓsi goyo, nisi noŋ pet kis-karkiya.

¹⁶Sawul hiɗi goora valam Yonatan, hiɗi sum sa ay hiɗi nisina kaw, tun vokŋa visi hay Geba vi Benyamin, sum sa Filistina kaŋŋa visi ka tuni hay Mikmas may.

¹⁷Hay kaŋŋa vi Filistin pa, vokŋ kali goy ɦidi kay ti ɓuraŋi: Vok ma kepn sli hagata vi Ofra, hay nagata vi Sual;

¹⁸vok hena sli hagata vi Bet-Horon; vok ma ɦidina sli hagata ta ka hay jar liyn ma beɗna vi Seboyim, hay galla vi fulda.

¹⁹Hay nagata vi Israyel kaf sa as fi sa ma zli caf loɗi, kay sum sa Filistin di'e: Nay ma tel sa Israyella kay nisi ma kot kew-gaferaŋ ɗi lay kawayɗi lay.

²⁰Sa ma Israyel gigekaw, la nam min ci siy ɗugumna vi luwayna, lebo ɗugum ma ɦawana, la mi ceɗna lebo beŋŋa kaw, nam tuɗum kayn goy vi sa Filistina.

²¹La tuloɓ mi siy beŋŋa lebo, siy ɗugumna vi luwayna lebo la mi nayna[6] lebo, ceɗna lebo, la moɗom mi jalaŋŋa kaw.

²²Muɗ kayni, hay buur ma duura, sum sa kuɗ Sawul hiɗi Yonatan kew-gaferaŋ may hay ɓisi noŋɗi lay, kaway ma duurɗi lay. Sle-ma-duura hini kayni hay ɓam Sawul hiɗi Yonatan tuta.

²³Vokŋa vi sa Filistin mara co'o tun hay hagata vi Mikmas.