Read Masana 1 SAMUEL 14 Bible Online

1 SAMUEL 14 - Masana bible

1 SAMUEL 14

¹Fat tara kep, Yonatan goora vi Sawul di tam sa ma joriyo ma ka ziy sle-ma-duura valamna: Naŋaya, tuɗay ta-ta hay liyn ma sa Filistin ka tuni hayna, ma ka ɗaw goyni hay gal hena. Nam min di mi bulumɗi.

²Sawul ka coli goy hay vun Gibeya ma vatay goyna, gaa kuɗ gu ɦoro-ɦorona vi Migron, sum sa ay hiɗi namna tapay ir ki kis-karkiya nala.

³Sa ma cuki hiɗi sligar-ŋoŋŋa kayn mi Akiya, goora vi Akitub, ɓasum I-Kabodna, goora vi Fineyas, goora vi Eli, mul-ma-ɗifinna vi Ma-Vatɗina hay Silo. Sumun may wi ala Yonatan kaliyaɗi.

⁴Kay gar a co hay kaŋŋa vi soje sa Filistin kayni, Yonatan jik goy sin hiɗiy ma ma'na, hiɗiy namna ta kepta ya' Boses, ta heta ya' Sene may.

⁵Sin hiɗiy ta kepta ka hay gal ma gaana, ɗiger vok Mikmas, hena hay gal ma kayamna, ɗiger vok Geba.

⁶Yonatan di tam goor ma joriyona ma ka ziy sle-ma-duura valamna: Naŋaya, tuɗay ta-ta tam kaŋŋa vi sum nisi sa bay ka-gosayn tani. Ma-Vatɗin ma var kaya klasige, kay Ma-Vatɗina as kay suɗ sumuna valam goy hay bam sum sa kiɗayna, ŋray ca ki sum sa kuɗ tuwsi ŋolo nala kaw.

⁷Sa ma ziy sle-ma-duura valamna dumu: Laŋ slen ma kiraŋ ŋaan kafe, laŋ kuɗ hayaŋu. Nan ka kuɗaŋu.

⁸Yonatan di'e: Yo! Ŋaa'a, tuɗay ɗekay tuway goy kir sum nisina.

⁹La nisi di tayawa ala: Lakgiya numa ka tuɗis tigiya ni, nay ma lakay hay liyayna, tuɗay tisi loɗi may.

¹⁰La nisi di tayawa ala tuɗgiyay tuma'a ni, nay tuɗay may. Kay Ma-Vatɗin min vulsi hay ɓaya. Kayni mi va ma li ɗekka tay ɗawni.

¹¹Nisi ma' kaf vul tuwsi goy kir sa Filistina sa ka li ŋomda, sum sa Filistin di'e: Ɗuwgiya, sum sa Hebren ka cukay goy hay zul ma nisi ŋayay hayamna pa.

¹²Sa Filistina sa ka li ŋomda di tam Yonatan hiɗi sa ma kuɗumna ala: Nigiyay katma'a, numa min ɗek va katgiya. Yonatan di tam sa ma ziy sle-ma-duura valamna ala: Tuɗaŋay bugolanu, kay Ma-Vatɗin min vulsi goy hay ɓam sa Israyella.

¹³Yonatan jik kulo tisiya, nam tuɗ kayn hiɗi ɓalam lay selem lay. Sa ma ziy sle-ma-duura valamu ka tapay kuɗumu, Sum sa Filistina ka puk gaa vok Yonatan, sa ma ziy sle-ma-duura valamna ka ci sumun mat ɓugolomu.

¹⁴Hay cit na'ta ta jewt kayni, Yonatan hiɗi sa ma ziy sle-ma-duura valamna ci sumun ir ki dok-ma' nala jar liyn neeɗa ɦawa.

¹⁵Narta nig kay sa hay kaŋŋa, goy jar liyn kaf, jar sumun kafe kaw; sa ŋomda hiɗi sa ti ɓuraŋŋa kaf tun caw li nari; nagat wira, muɗi kayni ti narta ta may vi Lawn pa.

¹⁶Sa ŋomda vi Sawul, sa ay hay Gibeya vi Benyamin, hay li ma nisi wi ala sumun ŋolo ka meray goyo, ka tuɗ hay gal hena gal hena kaw,

¹⁷Sawul di tam sum sa ay hiɗi namna ala: Nan siɗawgiya, ŋaɓgi sumun goy tige, sum sara jaray kali goy su? Nisi ŋaɓ sumun goy kayni, Yonatan hiɗi sa ma ziy sle-ma-duura valamna mayɗi.

¹⁸Sawul di tam Akiya: Maraŋ timgilla vi Ma-Vatɗin goboyo. Kay hay na'ta kayni timgilla vi Lawna ay hiɗi gurona vi Israyel.

¹⁹Hay li ma Sawul ka law hiɗi mul-ma-ɗifin kayni, ɦalayta-kulota hay kaŋŋa vi sa Filistina ka jor voka' suwa. Nala Sawul di tam mul-ma-ɗifinna: Yawaŋ ɓaŋ goyo.[7]

²⁰Bugol kayni Sawul hiɗi sum sa ka hiɗi nam kafna tok tuwsiya, nisi tuɗ ta-ta kulo kat liyn ma duura, nisi ɗuw kayni, sum sa Filistin muɗ kew-gaferaŋa visi kat tuwsiya, ka cal tuwsi jar-tuwsiya, nisi goɓi kulo jar-tuwsi suw asa.

²¹Sa Hebrena sa ay hiɗi Filistin jewna, sa kal kulo jarsi hay kaŋŋa, hay liyn ma nisi ka meray goy hay pana gi dirsi kuɗ sa Israyella sa ay kuɗ Sawul hiɗi Yonatan.

²²Sum sa Israyel kaf sa ka ŋayay kay hiɗiyta vi Efrayimna, hay li ma nisi hum ala sa Filistin munawa jaŋi, nisi jaŋ kuɗsiya kay dursiya.

²³Hay buur na'ta kayni, Ma-Vatɗin but sa Israyella goyo hay ɓam sa Filistina. Duura tuɗi vokomu ta-ta hay Bet-Aven.

²⁴Hay buur na'ta kayni sum sa Israyella sutaysi to ŋolo. Sawul halaf sumuna, nam di'e: Sa ma tun va ma ti vunam jew vulatita nam ma fi be'da, jew a nan job yan tam sa gawt kanna.

²⁵Nisi kaf co kuɗ juru tara'a, kuɗ caw juru na'ta kayni, yumna ka viy kulo kay yam nagat ɦawa'a.

²⁶Hay li ma nisi cuk kuɗ juruta, nisi ɗuw kayni yumna ka jaŋ goyo; may nisi min tun yumna hay vunsiɗi, kay nisi ka li nar kay kalaf ma Sawul halafsina.

²⁷Yonatan may humi labara kay va ma bulum yum kalamnaɗi; nala zugulda ta hay ɓalamta nam kala' vuna' hay yumna, ti yum ma hay vun zugulda may. Nala iram mun til'.

²⁸San kep jar sumuna sli ditiya di talamu: Buŋ yi va kalam ala sa ma ti tinawa vaydi nam beɗay goyo. May hay na'ta kayni sumun sutaysi toy ŋolo.

²⁹Yonatan di'e: Bun ka kicaɓsi kayn si sumun ɦawa'a; wulin sargi tige, nan iran muni til, kay nan jugo yumda neeɗa.

³⁰La li sle ma sumun yawami ɓuraŋŋa nisi ti tiy kuɗumu, nisi ci sum sa Filistin ɗawn ŋol suwa ɗisu?

³¹Hay buur na'ta nisi ci sum sa Filistin ŋolo, tun cawis hay Mikmas zaw ta-ta hay Ayalon, nisi ay makay ŋolo,

³²nisi tun caw vurum slena. Nisi yaw fok-dimina, luway-jufayna hiɗi guro-luwayna. Nisi ŋatam gaa butuwu, tun caw tum hiɗi busuwamu.

³³Nisi mar labara tam Sawul, ka dum ala: Humaŋu, sumun ka li suluk kat Ma-Vatɗina, kay nisi ka ti sliwn hiɗi busuwna. Sawul di'e: Nigi ka la' kayn ti bay-vida, wulini nigi ma ligat hiɗiy ŋol kep kay maram katanu.

³⁴Bugolda nam di'e: Mergi goy jar sumuna, nigi ma di tam gigekaw kay nam ma maran put kep lebo ɦu-dimi kep, kay ŋatam gaa tani, bugolda nigi ma tumu, kay nigi ma li suluk kat Ma-Vatɗina a ti sliwn hiɗi busuwnɗi. Hay henjeta, gigekaw vi putna valam ay hiɗi ɓalamu ɓalamu, kay ŋatam kulo kay hiɗiyna.

³⁵Sawul in giwin-ma-ɗifinna tam Ma-Vatɗina, kayni mi giwin-ma-ɗifinna ma nam inim sem ma jewna tam Ma-Vatɗina.

³⁶Sawul di'e: Hay henjeni nay ma tuɗ kuɗ sa Filistina, nay ma tisi ɓuraŋi ta-ta goy girawta, nay ma hin sa kuɗsi kep noŋɗi. Nisi di'e: Laŋ va ma kuɗ hayaŋŋa. Nala mul-ma-ɗifinna di'e: Nay ma co tani vok ir Lawna.

³⁷Sawul job Lawna ala: Numa ma tuɗ dur sa Filistin su? Naŋ min vulsi hay ɓam sa Israyella su? May hay na'ta Ma-Vatɗin min vulum hot ditɗi.

³⁸Sawul di'e: Nigi sa ŋulona vi Israyel kaf nigiyay tan goboyo, nigi ma gar kay fi suluk ma ka liy jar sa Israyel vaydina.

³⁹Kay Ma-Vatɗin ma but sa Israyel goyn ka iriya. La li suluk namna mi goora van Yonatan kaw, nam ma fi mitta. Jar sumun kaf sa ma hotom dit mayɗi.

⁴⁰Nam di tam sa Israyella kaf ala: Nigi ma lak kuɗ tuwgi hay gal kepe, nan hiɗi Yonatan goora van lak kuɗ tuwma hay gal kepe may. Sumun di tam Sawul: Laŋ va ma kiraŋ ŋaana.

⁴¹Sawul di tam Ma-Vatɗina: Lawna vi Israyel, ɗekaŋ gasit goyo. Ŋaɓta nig kay Yonatan hiɗi Sawul, sumun fi butta-goyta may.

⁴²Sawul di'e: Ligi ŋaɓta jaran nan hiɗi goora van Yonatan. Ŋaɓta nig kay Yonatan.

⁴³Sawul di tam Yonatan: Dan goy kay va ma naŋ lumna. Yonatan dum ala: Awa, zugulda kayni nan kala' vuna' gaa hay yumna, tunum vunanu. Nan zawni, can goyo.

⁴⁴Sawul di'e: Yonatan, la naŋ mitɗi, Lawn ka kitat kan hiɗi dikam kaf.

⁴⁵Sumun kaf di tam Sawul: Mi mige? Butta-goyta ta ŋolda la' hay Israyel kayn mi Yonatan, may nam mit mita? May noŋ ne'ɗi. Ma-Vatɗin ka iriya! Ɗuŋus ma kay yalam kep kaw as nig gaaɗi, kay fat na'ta nam duur kayn hiɗi donota vi Lawna. Ki kayn nala sumun suɗ Yonatan goyo, nam may fi mittaɗi kaw.

⁴⁶Sawul hin digiɗ ma nam ka digiɗ sa Filistina nisi kali hay nagata visiya may.

⁴⁷Hay li ma Sawul musawa goy kay mulda jar sa Israyel kayni, nam li duur goy galam kaf hiɗi sa gawt kalamna; nam dur sa Mowabna, dur gurona vi Amon, dur Edom, dur muliyana vi Soba, dur sa Filistina kaw. Liyn marige kaw ma nam muɗ iram kayn kayni, kol mi namu.

⁴⁸Nam ɗek donota valam goyo, ci sum sa Amalekŋa, but sa Israyella goy hay ɓam sa tisi ɓuraŋŋa.

⁴⁹Gurona vi Sawul kayni: Yonatan, Yikvi hiɗi Malkisuwa. Gurona valam sa boyn sa ma'na ta ŋolda ya' Merab, ta ka'ta ya' Mikal.

⁵⁰Sawul cata valam ya' ala Akinowam, na'ti goota vi Akimaas, ma ŋolla vi sojena vi Sawul yum ala Abiner[8] goora vi Ner nasum Sawulla.

⁵¹Kis bum Sawul hiɗi Ner bum Abner busi kep, yum Abiyel.

⁵²Hay buura irita vi Sawul kaf kayni, duur ka li ku ŋolo hiɗi sa Filistina; hay li ma Sawul iram wi sa ma dono ma manjufawa, nam vum kuɗum soje de.