Read Masana 1 SAMUEL 15 Bible Online

1 SAMUEL 15 - Masana bible

1 SAMUEL 15

¹Samuel di tam Sawul: Nan zawni mi ma Lawn ganiya kay tunaŋ mul kay sumuna valamu sa Israyella. Wulini humaŋ va ma Ma-Vatɗin di'e:

²Ma-Vatɗina vi vok-ma-duur di ala: Human ka gan kay va ma Amalek lum tam sa Israyella, hay li ma nam duk hagat voksiya hay kalta visi ay goy hay Egipte pa.

³Wulin kayn tuɗaŋ duraŋ sa Amalekŋa, slena visi noŋ kaf naŋ ma ɓulakam goyo, naŋ as hin va goyɗi, naŋ ma ci jufayna hiɗi boyn goy kafe, gurosguroyna hiɗi sa vuɗi wulina, luwayna hiɗi fokŋa, lamgana hiɗi kurona kaw.

⁴Sawul yi sumuna, nam li ŋaɓta visi goyo hay Telayim, Sum sa asay kay li duura birim kis-ma', hiɗi sumuna vi Yuda ir birim doogo kaw.

⁵Sawul tuɗ ta-ta hay hoyok-ziyna vi sa Amalekŋa, nam bar goy hay liyn ma beɗna.

⁶Nam di tam sum sa Keniyena: Tuɗgi goy gosoyo, vigi tuwgi goy jar sum sa Amalekŋa, kay a nan ma vatgi goy hiɗi nisiɗi, kay nigi li ŋaat tam gurona vi Israyel kaf, hay li ma nisi kali goy hay Egipte pa. Sa Keniyena vi tuwsi goy jar sa Amalekŋa.

⁷Sawul ci sa Amalekŋa, tun caway hay Havila pa ta-ta hay Sur, ta ka ɗiger vok Egipte.

⁸Agag, mulla vi Amalekŋa nam vum iriya, sumun kaf nam cisi goyo hiɗi kew-gaferaŋa.

⁹May Sawul hiɗi sum sa kuɗumna min ci Agag goyɗi, fukunay ma ŋaana, luway ma ŋaana, faray ma ɗorayna guro fok-dimi ma jakayna, hiɗi sle ma ŋaan noŋ kaf; nisi min cum goyɗi, nisi cum goy kayni mi ma ɗuw birek-cekŋa hiɗi ma ŋokayna tuta.

¹⁰Ma-Vatɗin sli ditiya nam di tam Samuel:

¹¹Nan gi hama mi tuwanu kay mulda ta nan vula' mi Sawulta. Kay nam muɗ ŋoromawa tanu, nam may li kuɗ sle ma nan dumtin loɗi. Samuel ka ɦiya, nam bur tiy tam Ma-Vatɗin tos'.

¹²Nam fok kulo graw culum culum, kay tuɗ ŋaf hiɗi Sawul. Nisi co'o di talam ala: Sawul kali hay Karmel, ɗuwaŋu nam kot va ma girifawa; nam hotiyawa kaw, nam jiki goy gine'e, wulin kayn nam kali hay Gilgal.

¹³Samuel tun iram kat Sawul, Sawul dumu: Ma-Vatɗin gaŋ bolo, yoboyna vi Ma-Vatɗin ka ŋomi kaŋu.

¹⁴Samuel di'e: Nan ka hum del fok-dimin tiya, del luwayn ka tiy lay kayn litige?

¹⁵Sawul hot dita: Nisi maramay goy hay nagata vi sa Amalekŋa, kay fukunay ma ŋaana hiɗi luway ma ŋaana sumun may cum goyɗi, kay nisi min li ɗifin tam Ma-Vatɗin Lawna vaŋ hiɗi namu; may diram hena numa cum ay goy kafe.

¹⁶Samuel di tam Sawul: Baŋ vunaŋu, nan min daŋ va ma Ma-Vatɗin di tanu hay henjeta ta vaydita. Sawul di'e: Daŋaya.

¹⁷Samuel di'e: Hay li ma naŋ ay ɗuw tuwaŋ ir goor tuwana, nan muɗaŋ goy mulla hay jafna vi sa Israyella ɗisu? Ma-Vatɗin ɦok mul kaŋ kayni kay naŋ ma tun mul kay sa Israyella ɗisu?

¹⁸Ma-Vatɗin tunaŋ iraŋu, nam daŋ ala naŋ ma tuɗa, sum sa joona sa Amalekŋa naŋ ma cisi goy kafe; naŋ ma dursiya ta-ta naŋ vatsi goy kafe.

¹⁹Naŋ min hum della vi Ma-Vatɗinɗi kay mige? Naŋ vurum slena kay mige? Slen ma kir Ma-Vatɗin joona naŋ lumu kay mige?

²⁰Sawul hot dit tam Samuel: Della vi Ma-Vatɗina humi kan ŋaa'a ŋolo, nan tuɗ kayni hay hagat ta Ma-Vatɗin gan iran haya'ta. Nan mar Agag mulla vi Amalekŋa; sum sa Amalekŋa nan cisi goy kafe.

²¹May sumun yaw sle ma ɓuraŋŋa jar fukunayna hiɗi luwayna, ki vun-jaf ma jewna vi sle ma vuli goyn nala, kay li ɗifin hiɗi namu tam Ma-Vatɗin Lawna vaŋu, hay Gilgal.

²²Samuel di'e: Ma-Vatɗin kiram ŋaa'a kayni mi ɗifin ma ŋal-goyna hiɗi ɗifin ma ɦawana lebo, kiram ŋaa'a kayni ti hum-vunda su? May humaŋu, hum-vunda na' ŋaa'a ŋolo suw ɗifinna, lita kuɗ yoboyna na' suw mul fok-gamalana kaw.

²³Kay ŋel-vunda na' ŋray ca hiɗi tunda vi gireyta, so'otta-dikga kaw mi girifta vi fuliyan ma waana hiɗi terafimna*. Kay naŋ gi yoboyna vi Lawnawa goyo ni, nam pataŋawa goy hay mulda vaŋ lay.

²⁴Sawul di tam Samuel: Nan li sulukawa, kay nan raw dita vi Ma-Vatɗinawa goyo, nan min hum kuɗ dita vaŋɗi; nan ka li nar kay sumuna, kay na'ta nan humsi vunsiya.

²⁵Wulin kayni nan siɗawaŋu, vulan gida kay sulukŋa vanu, tapaŋay hiɗi nanu, nan ma girif gaa vok Ma-Vatɗina may.

²⁶Samuel di tam Sawul: Nan as hotis hiɗi naŋ noŋɗi; kay naŋ noy yoboyna vi Ma-Vatɗinawa goyo, Ma-Vatɗin noyoŋawa goyo kaw, kay naŋ ma ti mul hay Israyel loɗi.

²⁷Hay li ma Samuel muɗ bugolom kay tuɗ kayni, Sawul vi vun sligara valamu, vun sligar cap haw goyo.

²⁸Samuel di talamu: Vaydi kayni mulda vi Israyel ta Ma-Vatɗin cuka' taŋga nam ma jeta' goyo, nam ma vula' mi sa mara ma ŋaa'a suwaŋ naŋu.

²⁹Nam ma yum ala «donota vi Israyel» as ka sin noŋɗi, may ham noŋɗi lay. Kay nam may mi sa'a kay hamɗi.

³⁰Sawul hot di lo: Nan li sulukawa, wulin kayn nan siɗawaŋu, naŋ ma slan yan kulo'o vok sa maariyana vi sumuna vanu, vok sa Israyella kaf kaw; hotaŋay hiɗi nanu, nan ma girif gaa vok Ma-Vatɗina Lawna vaŋu.

³¹Samuel hot bugolomu tap kuɗ Sawul, Sawul girif gaa vok Ma-Vatɗina may.

³²Bugolda Samuel di'e: Nigi ma maran Agag mulla vi Amalekŋa tani. Agag co talam hiɗi hayam firiya kay nam varay ala narta vi mitta kalawa klasige.

³³Samuel di'e: Ki kew-gaferaŋa vaŋ hin sumayn goy bay gurona visi nala, suŋ kaw ma hin goy jar boyn ɗawn bay gooro. Nala Samuel ci Agag goyo vok ir Ma-Vatɗina, hay Gilgal.

³⁴Samuel kali malam hay Rama, Sawul kal hay ziyna valamu hay Gibeya vi Sawul may.

³⁵Samuel min tuɗ ɗuw Sawul loɗi, ta-ta hay buur ma mitta valamu; kay Samuel ka tiy kay Sawul, kay Ma-Vatɗin ka gi hama mi tuwam kay tun ma nam tun Sawul mul kay sa Israyella.