Read Masana 1 SAMUEL 16 Bible Online

1 SAMUEL 16 - Masana bible

1 SAMUEL 16

¹Ma-Vatɗin di tam Samuel: Naŋ ma tiy Sawul ta-ta lancitige? Kay nam noyay goy kan vatiya, a nam ma ti mul kay Israyel loɗi. Miyokka vaŋu naŋ ma hoba' hiɗi mula, naŋ ma tuɗa; nan min gaŋ hay ziyna vi Isay ma Betlehemna, kay nan wi sa kep jar gurona valamu, dikan min kay nam ti mulda.

²Samuel di'e: Nan tuɗ ɗawn tuɗtige? Kay hay li ma Sawul hum labarawa, nam ɗawn ma can goyo: Nala Ma-Vatɗin di'e: Naŋ ma vi put ta gunay kuɗaŋ kepe, naŋ ma di ala naŋ co kayni kay li ɗifin tam Ma-Vatɗina.

³Naŋ ma yi Isay ay hay ɗifin namna: Nan ma daŋ kay va ma naŋ ma lumna: Sa ma nan min daŋ kalamna ɗawni naŋ ma ɦok mul kalamu.

⁴Samuel li kuɗ va ma Ma-Vatɗin dumna, nala nam kali hay Betlehem. Sa maariyana vi hoyok-ziyna jaŋay kiram hiɗi narta, nisi di'e: Cota vaŋ kayni kay vulma labar ma sleɗ kaw su?

⁵Nam hot dit ala: Awa, nan co kayni kay li ɗifin tam Ma-Vatɗina, porgi tuwgi goyo, nigiyay hiɗi nanu hay ɗifinna namna. Nam por Isay hiɗi gurona valamu kaw, nam yisi hay ɗifinna.

⁶Hay li ma nisi cukay kalafi, nam wi Eliyab kayni, ka di hay dikam kalaf ala: Gasi wete, zawni ma fum ɗawni mi sa ma Lawn vilekemna.

⁷Ma-Vatɗina di tam Samuel: Naŋ ma tun ŋalda vaŋ kay jifiyta valamu hiɗi fiyokka valamɗi, kay nan noyomawa goyo. Ma-Vatɗin may ɗuw kay va ma san ɗuwumnaɗi, san minim kayn mi va ma ɗuw kiram ŋaana, may Ma-Vatɗin ɗuwum kayni mi dik sana.

⁸Isay yi Abinadab, nam co vok ir Samuel; Samuel di'e: Nam zawni kaw Ma-Vatɗin may vilekemɗi lay.

⁹Samma co vok ir Samuel; Samuel di'e: Nam zawni kaw Ma-Vatɗin may vilekemɗi lay.

¹⁰Gurona vi Isay sa siɗiyana nam marsi vok ir Samuel kaf; nala Samuel di tam Isay: Ma-Vatɗin may vilek sa kuɗsi kep noŋɗi.

¹¹Bugol kayni Samuel di tam Isay: Nisi kaf lakŋi si gurona vaŋ tuta su? Nam hot dita: Ma goora ay goyo, nam ka goy ŋom fok-dimina. Samuel di'e: Gaŋ sun kalamu kay garam aya, la nam bay co'o, nay as zlar goy tam ɗifinnaɗi.

¹²Isay gi sun kalamu, nam co'o. Nam kayni slaw cutut', iram tuni ŋaa'a, vokom ɗuw jifiya kaw. Ma-Vatɗina di tam Samuel: Fokaŋ kulo'o, ɦok mul kalamu, kay zawn mi namu.

¹³Samuel sli miyokka ta hiɗi mula, nam ɦokom mul kalamu jar ɓosiyomna. Ŋusta vi Ma-Vatɗin kal hay David, tun caw hay buur na'ta pa ta-ta voko. Samuel fokay kulo'o, kali hay Rama.

¹⁴Ŋusta vi Ma-Vatɗina vi tuwa' goy hay Sawul, Ma-Vatɗin gi ŋusta ta joota aya, na' tun caw vum tuwam bat-bat'.

¹⁵Sa sunda vi Sawul dumu: Humaŋu, ŋusta joota ta may vi Ma-Vatɗin ka vaŋ tuwaŋ bat-bat'.

¹⁶Mulla vuma'a, naŋ ma di va'a, numa sa sunda vaŋ ka humaŋu. Numa min garaŋ sa kep ma wi liwta vi dilla, hay li ma Lawn cuk ŋusta ta jootawa kanu, nam ma ci dilla, nala naŋ ma muɗ marya.

¹⁷Sawul di'e: Garangi sa ma liw dil ŋaa'a, marangit tani.

¹⁸Kep jar sa sunda sli ditiya di'e: Humaŋu, nan wi sa ma hay Betlehem kepe, namu mi goora vi Isay, nam wi dil ŋaa'a ŋolo; nam mi sa ma dono'o, ma kursuliya kaw, wi duura kaw, law ŋaa'a ŋolo, jifiy ŋolo kaw. Ma-Vatɗin ka hiɗi namu kaw.

¹⁹Sawul cuk sumun tam Isay, kay dum ala: Goora vaŋ David ma ka ŋom fok-dimina naŋ ma vulantiya.

²⁰Isay vi kuro kepe, nam jak fun kulo kalamu, hiɗi doŋolayt ta vinna ka haya, hiɗi goor ɦu-mee kepe kaw, sle namna nam vulum hay ɓam, David goora valamu, kay naram tam Sawul.

²¹David co kat Sawul, nam col vok iramu; Sawul iram vum ŋaa'a ŋolo, nisi vilekemu kay ziy sle-ma-duura vi mulla.

²²Sawul gi sunda tam Isay kay dum ala: Nan siɗawaŋu kay naŋ ma hin David vokanu, kay nam fi slugotawa vok iranu.

²³Hay li ma Lawn hin ŋusta joota cuk kay Sawul, David sli dilla, nam liw hiɗi ɓalamu; Sawul sukam hot gaa'a, nam muɗ marya, ŋusta joota vi tuwa' goy talamu.