Read Masana 1 SAMUEL 26 Bible Online

1 SAMUEL 26 - Masana bible

1 SAMUEL 26

¹Sum sa Zifna tuɗ kat Sawul hay Gibeya, nisi di'e: David may ŋayay kulo kay hiɗiyta vi Hakila ɗiger vok fulda ɗisu?

²Sawul fok kulo'o, nam kal hay fulda vi Zif, hiɗi sum sa Israyel sa wi duura kuɗum birim ɦidi, kay gar David hay fulda vi Zif.

³Nam vi guruna valam kulo kay jiŋiliŋŋa vi Hakila, ɗiger vok fulda, goboy hiɗi hagata. David ka goy hay fulda; nam wi ala Sawul ka garam hay fulda,

⁴nam cuk sum sa ɗuw gul-liyna, nam wi goy ŋaa'a ŋol ala Sawul ka coya.

⁵David fok kulo'o, nam co hay liyn ma kaŋŋa vi Sawul ka tuni hayna, nam wi liyn ma Sawul ka buri hayna, hiɗi Abner goora vi Ner, ma ŋolla vi sojena valamu. Sawul ka buri goy way kaŋŋa, sumun ka ŋuyi goy talamu may.

⁶David sli ditiya: Nam di tam Akimelek ma Hetna hiɗi Ab iskay, goora vi Seruya, ɓasum Yowabna, nam di'e: Sa ma min tuɗ hiɗi nanu hay kaŋŋa kat Sawul mi gige? Abiskay di'e: Nanu, nan min tuɗis hiɗi naŋu.

⁷David hiɗi Abiskay kali henjeta kat sumuna. Nam ɗuw kayni, Sawul ka buri gaa'a, ka kal sene goy jar kaŋŋa. Kawayta valam ka ɓalay kalam gaa kay nagat zaw may. Abner hiɗi sum segen ka buri gaa talamu.

⁸Abiskay di tam David: Vaydi Lawn vulaŋ sa ma gawt kaŋŋawa ɓaŋu, nan siɗawaŋu kay naŋ ma hinanu, kay nan min jikim sen kep ɦawa hiɗi kawayna, ɓalam gaa vi nagata, kay a nan ma hot jikim sem mara loɗi.

⁹May David di tam Abiskay: Cum goyɗi. Kay sa ma tun ɓalam tam sana vi Lawn ma mul ɦoki kalamna, may kitat fumɗi ɗawn mi sa gige?

¹⁰David hot di'e: Ma-Vatɗin ka iriya. Cum mi Ma-Vatɗin kepe; la buura valam as a nam mita kla, la nam tuɗ vun duura cap mita kla nala.

¹¹Hay sem Ma-Vatɗina! Sana vi Lawn ma mul ɦoki kalamna nan as tun ɓan talamɗi. Slaŋ yakata valam ta ɓalay kulo kalamta zawni, hiɗi genda ta niyna tuta, tuɗay maya.

¹²David sli kawayta hiɗi genda ta niyna ma ka lakay kulo kay Sawul; nisi kaliya may. Sa may wisiɗi lay hum va ɓislek' noŋɗi lay, sa may zliy kuloɗi lay, kay Ma-Vatɗina kalsi hay senda ŋolda.

¹³David kal goy hay gal hena, nam col goy gine'e, kulo hay sin-hiɗiyta, goy gine'e hiɗi kaŋŋa visiya.

¹⁴Bugolda nam siwel tam sumuna hiɗi Abner goora vi Ner ala: Abner, naŋ may hot ditɗi su? Abner hot dita: Naŋ ma ka siwel hum mulla zawni, naŋ mi gige?

¹⁵David di tam Abner: Naŋ may mi sa jufɗi su? Sa ma ŋray hiɗi naŋu hay Israyel mi gige? Naŋ may ŋom mulla vaŋɗi kay mige? Kay sa kep jar sumuna co'o kay ci mulla vaŋu.

¹⁶Va ma naŋ lumna kayn may ŋaaɗi, Ma-Vatɗin ka iriya, nigi nagay a ti mitta, kay mulla vigiya ma mul ɦoki kalamna nigi may ŋomomɗi. Ɗuwaŋ wulini tige, kawayta vi mulla hiɗi genda valam ma ka lakay kulo kalamna wulin ka arige?

¹⁷Sawul hum del David, nam di'e: Kayni mi delaŋ naŋ goora van David gasi su? David hot dit ala: Kayni mi delan nanu mulla, sam-ŋolla vanu.

¹⁸David hot di'e: Mulla vanu, nan gorvona vaŋu naŋ digiɗan kayn kay mige? Nan lum mi mige? Joota van ka hay mige?

¹⁹Wulin kayni mulla, humaŋ dita vi gorvona vaŋu, la zutaŋ katan kayn mi Ma-Vatɗina, naŋ ma lum ɗifini kay nam ma hot gaa'a, may la zutaŋ katan kayn si sumu, Ma-Vatɗina ma beɗsiya, kay vaydi nisi ka digiɗan goyo kay jan jaran goy hiɗi vocota vi Ma-Vatɗina, la nala hinsi dan ala: Tuɗaŋ sunaŋ laway ma pulu.

²⁰Awa, busuwna van ma ɦok goy gine vok ir Ma-Vatɗinɗi, kay mulla vi Israyel kot tuwamay kayni kay tuɗ gar ɗakɗariya, ki san digiɗ ceket kulo kay hiɗiyn nala.

²¹Sawul di'e: Nan li sulukawa, hotaŋaya, goora van David, kay nan as laŋ va ma joo loɗi, kay ta-ta vaydi irita van kiraŋ ŋaa'a ŋolo. Nan li kayni ki sa ma ɦay-ɦayna nala nan li joo ma ŋolawa.

²²David hot dita: Kawayta vi mulla kayni, hin sa kep jar sa faŋŋa co kay sla'a.

²³San gige gige kaw Ma-Vatɗin ma wurakam ɗawni kuɗ ɗigerta valamu hiɗi vida valamu; kay vayd kayni Ma-Vatɗin vulaŋ hay ɓaŋ vulu, may kay naŋu mi sana vi Lawn ma mul ɦoki kaŋŋa, kay na'ta nan min tun ɓan kataŋɗi.

²⁴Ki vaydi irita vaŋu na' kiran nan ŋaa'a nala, irita van kaw na' ma li ŋaa'a kir Lawna, nam ma butan goyo hay bam lasta kaf.

²⁵Sawul di tam David: Bolda kaŋu goora vanu, sle ma naŋ min lumna ma li hay liyam kafe. David kali hay hagata valamu, Sawul hot vo'o may.