Read Masana 1 SAMUEL 29 Bible Online

1 SAMUEL 29 - Masana bible

1 SAMUEL 29

¹Sum sa Filistin tok vokŋa visi kaf hay Afek, sa Israyella tun vokŋa visi goboy hiɗi niy-ma-riŋŋa vi Yisreel.

²Sa ŋulona vi Filistina ka tuɗ voksiya, segena hiɗi vokŋ kuɗsi kis, segena hiɗi vokŋ kuɗsi birimi may. David hiɗi vokŋa valamu vokŋa visi ay goy cawi hiɗi Akis kuɗsiya.

³sa ŋulona vi sa Filistin di'e: Sum sa Hebren cani lum tan kayn mi mige? Akis hot dita tam sa ŋulona vi Filistin ala: Zawni mi David, ma sunda vi Sawul mulla vi Israyella. Musi ŋolo nam ka hiɗi nan tani, hay cota valam pa ta-ta vaydi nan may fi va ne' ma joo hayamɗi.

⁴May sa ŋulona vi sa Filistina muɗ ɦiy kat Akis, nisi dumu: Digiɗaŋ san kayni, hinim hot hay liyn ma naŋ musum hayamna; hinim tuɗ hiɗi nay vun duurɗi, kay a nam ma muɗ diram kaya hay duurɗi. San kayni as muɗ tuwam ŋaa'a kir mulamna kayni, hay li ma nam co tam mulamna hiɗi yam sumuna vay hay ɓalamna ɗisu?

⁵Kayni mi David ma nisi ka gi nul kalamu pir nul kaw ala: Sawul ci sumun birimi, David ci sumun birim doogona ɗisu?

⁶Akis yi David dumu: Ma-Vatɗin ka iriya, naŋ mi sa ma ɗigere, dikaŋ ŋaa'a kay waŋ vun duura hiɗi nanu, kay hay buur ma naŋ co tan pa ta-ta vaydi, nan may fi va ma joo hayaŋɗi; may sa ŋulona vanu naŋ may kirsi ŋaaɗi.

⁷Wulin kayni naŋ ma hot vo'o hay toyta, kay naŋ ma li va ma joo kir sa ŋulona vi sa Filistinɗi.

⁸David di tam Akis: May nan lum mi mige? Naŋ fum joo hay dikan mi mige, hay cota van taŋ pa ta-ta vaydi? Lebo nan tuɗ dur sum sa gawta vi mulla vanɗi kay mige?

⁹Akis hot dit tam David: Nan wi kayni, kay naŋ kiran ŋaa'a ŋolo ki sunda-wuralawn nala; may sa ŋulona vi Filistin ka di ala: Naŋ ma tuɗis dur hiɗi numaɗi.

¹⁰Ki kayn nala, fokaŋ kulo'o graw culum culum, naŋu hiɗi sa sunda vanu sa co kuɗaŋu; yawgi kulo graw culum culum, hay li ma nigi wi haraŋawa, nigi ma kalgi de'.

¹¹David hiɗi sumuna valamu yaw kulo hay ŋarpita, kay kal hay graw culumta, kay hot hay nagata vi sa Filistina. May sa Filistin kali hay Yisreel.