Read Masana 1 SAMUEL 3 Bible Online

1 SAMUEL 3 - Masana bible

1 SAMUEL 3

¹Goor ma joriyona Samuel ka sun Ma-Vatɗina vok Eli. Hay na'ta kayni, yoboyna vi Ma-Vatɗina may di tam sumun dok-dokɗi lay, Lawn may vul tuwam kir sa dok-dokɗi lay.

²Hay na'ta kayn kaw, Eli iram muɗi ɗuw turum-turum', ta-ta nam muɗ wi noŋɗi, kay na'ta nam ka buri gaa hay liyna valam waŋ'.

³Samuel ka buri kalaf hay Tempella vi Ma-Vatɗina, hay liyn ma arkena vi Ma-Vatɗin ka tuni hayna. Hay na'ta fitilla vi Ma-Vatɗin bay tew tuwa.

⁴Bugol kayni Ma-Vatɗin yi Samuel. Nam hot dit ala: Nanis zawni!

⁵Nam jaŋ kat Eli, ka dum ala: Nanis zawni, kay naŋ yanu. Eli hot dit ala: Nan may yaŋɗi, goora vanu, hotaŋ buraŋ gaa'a. Nam kali bur gaa'a.

⁶Ma-Vatɗina hot yi Samuel mara lo. Samuel fokay kulo'o, kali kat Eli, nam di'e: Nanis zawni, kay naŋ yanu. Eli hot dita: Nan may yaŋɗi, goora vanu, hotaŋ buraŋ gaa'a.

⁷Samuel may wi Lawn tuwaɗi, yoboyna vi Lawn bay ɗek tuwan kiram tuwa hay na'ta.

⁸Ma-Vatɗina yi Samuel mara lo hay sem ma ɦidina. Samuel fok kulo'o, kali tam Eli, ka dum ala: Nan zawni, kay naŋ yanu. Nala Eli wi ala yi goor kayni mi Lawna,

⁹nala nam di tam Samuel: Tuɗaŋ buraŋ gaa'a; la naŋ hum yitawa mara lo, naŋ ma hot dit ala: Ma-Vatɗina, daŋiya, kay sa ma sunda vaŋ ka huma. Samuel hota, nam bur gaa hay liyna valamu.

¹⁰Ma-Vatɗin co'o, nam vul tuwamu, nam yi'e ki nam ka yi jew nala: Samuel, Samuel! Samuel hot dit ala: Daŋiya, kay sa ma sunda vaŋ ka jak humamu.

¹¹Nala Ma-Vatɗin di tam Samuel: Humaŋu: Nan min li va mara jar sa Israyella, kay gigekaw ma hum va namna, humam ma ŋel goyo.

¹²Hay buur namna, sle ma nan dum tam ziyna vi Eli kafna nan ma hobom vunamu; nan ma tun caw hiɗi namu, ta-ta nan vatam goyo.

¹³Nan dum ala nan min ka kitat kay ziyna valamu kay dok-doko, kay gurona valam muɗ tuwsi liwisi hiɗi jiw-zlata, nam kay tuwamu wi lawt kayni hiɗi iramu, may nam min ka kitat kisiɗi.

¹⁴Kuɗ kayni nan yi va kanu ala jiw-zlata vi ziyna vi Eli as por noŋɗi, la lum mi ɗifini, la la' ti vulda kaw.

¹⁵Samuel hot bur gaa'a ta-ta goy grawta, bugol kayni nam mal vun-ziyna vi Ma-Vatɗin goyo. Tuwam nari kay vi labara kay sle ma vul tuwam kiramna tam Eli.

¹⁶May Eli yi Samuel, dum ala: Samuel goora vanu! Samuel hot dit ala: Nanis zawni!

¹⁷Eli dumu: Ma-Vatɗin daŋgi mi law mige? Naŋ ma ŋayan noŋɗi. La sle ma Lawn daŋgi kafna naŋ ŋay mara kanu, Lawn ma laŋ joo ŋolo.

¹⁸Samuel vum labar kafe, min ŋay mara kuɗum kep noŋɗi. Nala Eli di'e: Nam mi Ma-Vatɗina, hinim li va ma kiram ŋaan yo ɗisu.

¹⁹Samuel ka wula. Ma-Vatɗin ay hiɗi namu, yoboyna vi Lawna nam min hin mara nig gaa kuɗum kep noŋɗi.

²⁰Sum sa Israyel kaf, vunsi fokay hay Dan pa ta-ta hay Bar-Seba, nisi wi ala Ma-Vatɗin tun Samuelawa sa ma jobta valamu.

²¹Ma-Vatɗin ka vul tuwam kiram dok-dok hay Silo, hiɗi yoboyna valamu.