Read Masana 1 SAMUEL 4 Bible Online

1 SAMUEL 4 - Masana bible

1 SAMUEL 4

¹Yoboyna vi Samuel nam ka dum mi sa Israyella kafe. Sa Israyella kali goyo kay ŋaf hiɗi sa Filistina, kay li duura. Nisi tun kaŋŋa visi goboy hiɗi Eben-Ezer, sa Filistina kaŋŋa visi ka viy hay Afek.

²Sum sa Filistina zlar goyo kay dur sa Israyella, duur li dono ŋolo. Sum sa Filistina ci sa Israyella. Vun duur namna nisi ci sa Israyella ir sumun birim fiɗi. Sa Filistin sli timgilla.[2]

³Sumun hot gaa hay vokŋa, nala sum sa maariyana vi Israyel di'e: Vaydi Ma-Vatɗin hin sum sa Filistin kol kaya kayn kay mige? Tuɗay hay Silo garay timgilla vi bonota vi Ma-Vatɗina; hin timgilla co jaraya, kay nam ma butay goy hay ɓam sa gawt kayna.

⁴Nisi cuk sumun hay Silo, ɗawni nisi mar timgilla vi bonota vi Ma-Vatɗina vi vok-ma-duura, ma ka musi jar kerubena*. Gurona vi Eli sa ma'na Hofni hiɗi Fineyas ay hay na'ta kat timgilla vi bonota vi Lawna.

⁵Hay li ma timgilla vi bonota vi Ma-Vatɗina kal jarsi hay liy ma vokŋa, sum sa Israyel kaf pat ciriyn ŋol digi-digi' kay firiya, nagat geɗa.

⁶Suwana vi winekŋa visi co tam sum sa Filistina, nala sa Filistin di'e: Ciri ma ŋol ki kayn nala jar sa Hebrena min ɗek mige? Labara co tisi ala timgilla vi Ma-Vatɗin coy hay liy ma vokŋa.

⁷Nala sum sa Filistin tuwsi cuk nari, kay nisi var ala Lawn coowa hay liy ma vokŋa. Nisi di'e: Joot kaya, kay va ma ki kayn nala bay li jaraya ta-ta wulini.

⁸Joot kaya, laway nisin sa donon lakŋi sa ma butay goy hay ɓisin ɗawn mi gige? Laway nisin kayni si sa wat sum sa Egipten hiɗi bakmaran kuɗ jafam kafe hay fulda ɗisu?

⁹Nigi sa Filistina, laygi tuway dono ki sum jufayn nala, kay nay ma li gorvo hay ɓam sum sa Hebrena, ki nisi ka gorvo hay ɓay nay nalaɗi. Ligi manjufu, durgiya.

¹⁰Sum sa Filistin fok duura, nisi kol kay sa Israyella. Gigekaw pir jaŋ hay guɗukŋa valamu valamu. Cita li ŋol suw asa, sumun kuɗ sa Israyella sa wi duura birim dok-ɦidi mit hay na'ta.

¹¹Sa Filistina sli timgilla vi bonota, gurona vi Eli sa ma'na, Hofni hiɗi Fineyas kaw fi mitta.

¹²Sa mara hay jafna vi Benyamin, nam fokay jaŋ hay liyn ma duura pa, nam co hay Silo hay buur na'ta, sligar ma talamna jetay goyo, butuwn ka koy kalamu kaw.

¹³Hay li ma nam co kayni, Eli ka cub labar dam', nam ka musi kay kuroŋgolla, goboy hiɗi hagata kay dikam ka yora kay timgilla vi Lawna. Hay li ma san kayni kal hay hoyok-ziyna, nam vul labara, sum sa hay hoyok-ziyn kaf tun caw ciriya.

¹⁴Hay li ma Eli hum ciriyn ki kayn nala, nam di'e: Winekŋ ka ŋol ki kayn nala kay mige? Wulin wulini san kayni mar labara mi Eli.

¹⁵May Eli busata valam coy dok-zleeŋe yam glafandi, iram hi'iliya, as ɗuw noŋɗi.

¹⁶San kayni di tam Eli: Nan may goy vun liyn ma duur pa, nan piray vayd kayni vun liyn ma duur pa. Eli dumu: Va ma lina mi mige goora vanu?

¹⁷Sa ma mar labara ka hot dit ala: Sum sa Israyella mun jaŋi vok sa Filistina sumun fi cita-goyta ŋolo; gurona vaŋ sa ma'na, Hofni hiɗi Fineyas kaw nisi fi cita-goyta, timgilla vi Lawn kaw sum sa Filistin slumawa.

¹⁸Hay li ma nam yi sem timgilla vi Lawn kayni, Eli poŋ goy kay kuroŋgolla, nam nig goy danani kat vun-ziyna; jakam mun goyo, kay nam muɗi maari, muɗi nek ɗew-ɗew'. Nam mi sa ma ka kitata vi sum sa Israyella ir busat dok-fiɗi.

¹⁹Kunomta cata vi Fineyas ka haya, goboy a puka, hay li ma na' hum labara kay slita vi timgilla, hiɗi mitta vi kuno'na hiɗi jufa'a kaw, pukka va'a, na' guɗof gaa kayni, cap puk de'.

²⁰Hay li ma na' ka vun mitta, boyn sa ka tokay kata'na di ta'a: Lag narɗi! Kay nak vuɗ goor ma jufawa, may na' min hot ditɗi, min tun ŋalda va' kay kaynɗi.

²¹Na' tun sem goor ala I-Kabod, min di ala: Gajijit tay jar sa Israyel loɗi! Kayn kuɗ timgilla vi Lawn ma nisi slumna, kuɗ kuno'na hiɗi jufa'a kaw.

²²Na' di ala gajijit tay jar sum sa Israyel loɗi kayni kay timgilla vi Lawn sliya.