Read Masana 1 SAMUEL 5 Bible Online

1 SAMUEL 5 - Masana bible

1 SAMUEL 5

¹Sum sa Filistin sli timgilla vi Lawna, nisi ziyimis hay Eben-Ezer pa kalam hay Asdod.

²Hay li ma sa Filistin sli timgilla vi Lawn slina, nisi kalam hay ziyna vi Dagon*, colom kulo kat Dagon goboyo.

³Hay buurta ka'ta, sum sa hay Asdodna yaw kulo graw culum culum, nisi fi Dagon puki gaa'a, vokom ka dabi gaa kay nagata vok timgilla vi Ma-Vatɗina. Nisi sli Dagon, colom kulo hay liyamna.

⁴Hay buurta ka'ta lo, hay li ma nisi yaw kulo graw culum culum, nisi fi Dagon puki gaa'a lo, vokom ka dabi gaa kay nagata vok timgilla vi Ma-Vatɗina; yam Dagon hiɗi ɓalamu ka yakay goy hay vun-ziyda, hini mi hoyokom tuta.

⁵Kuɗ na'ta kayni, ta-ta vaydi, muliyan-sa-ɗifinna vi Dagon, hiɗi nisi kaf, sa ka cuk kalaf hay ziyna vi Dagon hay Asdod may jik hay vun-ziynɗi.

⁶Ma-Vatɗin ɗek donota valam goy lo tam sum sa Asdodna, nam mar ɓulakka jarsiya, nam watsi hiɗi moy ma gulut lo'ot san goyna, sum sa hay Asdod hiɗi naga ma kuɗa'na.

⁷hay li ma sum sa hay Asdod wi ala slen ka li ki kayn nala, nisi di'e: Timgilla vi Lawna vi Israyel ma mus gal vay tanɗi, kay Lawn ka ɗek donota valam goy taya, tam Dagon lawna vay kaw.

⁸Nisi gar sum sa ŋulona vi Filistin kaf, toksi katsiya, ka disiya: Nay ma li mige hiɗi timgilla vi Lawna vi sa Israyella? Sa ŋulona vi sa Filistina hot dit ala: Timgilla vi Lawna vi sa Israyella nay ma kalam hay Gat. Nala timgilla vi Lawna vi sa Israyella nisi kalam ɗawni.

⁹May hay li ma nisi kal timgilla goy kalla, Ma-Vatɗin ɗek donota valam goy tam sum sa hay hoyok-ziyna, ɦuyumda ŋolda kal jarsiya; sum sa hay hoyok-ziyna nam cisiya; tun caw tam sa gurayn pa ta-ta tam sa ŋulona, moy ma gulut dir sumun goyn visiya.

¹⁰Nala nisi jok timgilla vi Lawn hay Ekron. Hay li ma timgilla vi Lawn kal kulo hay Ekron, sum sa hay Ekronna pat ciriyna nisi di'e: Timgilla vi Lawna vi sa Israyella nisi maramawa hay nagata vaya, kay a nay hiɗi sumuna vay kaf ma vat goyo!

¹¹Nisi tuɗ gar sum sa ŋulona vi Filistina, nisi toksiya, nisi ka di'e: Timgilla vi Lawna vi Israyel damni nigi ma hotom hay liyna valamu, kay a nay hiɗi sumuna vay kaf nam ma vatay goyɗi. Kay sum sa hay hoyok-ziyn kaf narta vi mitta ay hay diksi ŋolo; Lawn ka ɗek donota valam tisi ŋolo.

¹²Sum sa fi mittaɗina moy ma gulut dir san goyn visiya, ciriyna vi hoyok-ziyna ka tuɗ ta-ta kulo wuralawna.