Read Masana 1 SAMUEL 7 Bible Online

1 SAMUEL 7 - Masana bible

1 SAMUEL 7

¹Sum sa hay Kiryat-Yeyarim co'o, nisi kal hiɗi timgilla vi Ma-Vatɗina; nisi tuɗum hay ziyna vi Abinadab, kulo kay hiɗiyta. Nisi gi goora valam Eliyazar ɗifini kay nam ma ŋom timgilla vi Ma-Vatɗina.

²Hay buur ma nisi jok timgilla hay Kiryat-Yeyarim jokŋa, liyn mus noŋ ta-ta bugol kayni. Busat kali dok-ma' noŋo. Ki kayn nala sum sa hay ziyna vi Israyel noŋ kaf tun caw tiy tuwsi tam Ma-Vatɗina.

³Samuel di tam sum sa hay ziyna vi Israyel kaf ala: La nigi min hotay tam Ma-Vatɗin kayn hiɗi dikgi kafe ni, lawayn ma pulla hiɗi Astarte ma ka jargin kaf nigi ma yawam goyo, muɗgi dikgi tam Ma-Vatɗina, nigi ma sunumti mi nam kepe, nala nam ma butgi goy hay ɓam sa Filistina.

⁴Nala gurona vi Israyel yaw Baal* hiɗi Astarte* ma ka jarsin goyo, nisi sunum mi Ma-Vatɗin kepe.

⁵Samuel di'e: Tokgi sum sa Israyel kaf hay Mispa, nala nan ma siɗaw Ma-Vatɗin kigiya.

⁶Nisi tok tuwsi hay Mispa. Nisi go niyna, yamam goy vok ir Ma-Vatɗina, hay buur namna nisi li laata, nisi di'e: Numa li suluku kat Ma-Vatɗina. Samuel ka kitata vi sum sa Israyella hay Mispa.

⁷Sum sa Filistina hum labara ala gurona vi Israyel tok tuwsiyawa hay Mispa, sa yerimana vi sa Filistina kaliya kay dur sa Israyella. Hay li ma sa Israyella hum labara namna, tuwsi li nar ŋolo kay sa Filistina,

⁸nala nisi di tam Samuel: Naŋ ma mus kiliŋɗi, may siɗawaŋ Ma-Vatɗin Lawn dok-dok kuma'a, kay nam ma suɗma goyo hay ɓam sa Filistina.

⁹Samuel vi goor ɦu-dimi ma ka ci miir tuwan kepe, nam ŋalam goy ɗifin tam Ma-Vatɗina. Nam siɗaw Ma-Vatɗin kay sa Israyella, Ma-Vatɗin hum siɗawta valamu may.

¹⁰Hay li ma Samuel ka li ɗifin ma ŋal-goyna, sum sa Filistin co'o kay mok sa Israyella, Ma-Vatɗin hin niy ma sina biw ŋolo gaa kay sa Filistina, nam viysi hagat goy kirsiya. Sum sa Israyella cisi ŋolo.

¹¹Sum sa Israyella kali goy hay Mispa pa, nisi jaŋ kuɗ sa Filistina, nisi cisiya, ta-ta gaa kuɗ Bet-Kar.

¹²Samuel sli hiɗiyn kepe, nam burum jar Mispa hiɗi Sen, nam tunum selem ala Eben-Ezer, min di ala ta-ta vaydi Ma-Vatɗin gutayawa.

¹³Ki kayn nala nisi hot yam sa Filistin gaa kuɗsiya, sum sa Filistin may hotay hay nagata vi Israyel loɗi. Hay buur ma Samuel ka iri tuwan kaf kayni, Ma-Vatɗin ɗek donota valam goy tam sum sa Filistina.

¹⁴Hoyok-ziy ma sum sa Filistin yawam hay ɓam sa Israyella kaf hot hay ɓam sa Israyella, tun caway hay Ekron pa ta-ta hay Gat, hiɗi naga ma kuɗumna kaf; sum sa Israyella yawam hay ɓam sa Filistina. Toyta li jar sa Israyella hiɗi sa Amoriyana.

¹⁵Samuel ka kitata vi sa Israyella hay buur ma irita valamna noŋ kafe.

¹⁶Busata kafe nam ka tuɗa kay ŋuy Betel, Gilgal hiɗi Mispa, nam ka ka kitata vi sa Israyella hay liyn kafe kaw.

¹⁷Bugol kayni, nam hotay vo hay Rama, liyn ma ziyna valam ka hayna; hay Rama nam ka ka kitata vi sa Israyella, nam in giwin-ma-ɗifinna kepe tam Ma-Vatɗina hay liy namna.