Read Masana 1 SAMUEL 8 Bible Online

1 SAMUEL 8 - Masana bible

1 SAMUEL 8

¹Hay li ma Samuel muɗ maari, nam tun gurona valam kay ka kitata vi sa Israyella.

²Goora valam ma vuɗi jewna yum Jowel, ma ma'na yum Abiya; nisi ay si sa ka kitata hay Beer-Seba.

³Gurona vi Samuel min sli kuɗ busiɗi; nisi daram mi slena vi sumuna, yaw vulda, min gun kitata kaw.

⁴Sa maariyana vi Israyel tok tuwsi kafe, nisi ma kat Samuel hay Rama.

⁵Nisi di tam Samuel: Humaŋu, naŋ muɗi maari, may gurona vaŋ min sli kuɗaŋɗi. Wulin kayn naŋ ma tun mul kuma kepe kay ka kitata vuma'a, ki jaf-sum segen kaf nala kaw.

⁶Dita ta nisi di tam Samuel ala: Vulma mulu kay ka kitat kuma'a kayni may cuk kuɗ hayamɗi, nala Samuel siɗaw Ma-Vatɗina.

⁷Ma-Vatɗin di tam Samuel: Slen ma sumun daŋga kafna naŋ ma li kuɗumu; kay nisi ganti goy kayn mi nanu, may mi naŋɗi, kay nisi min ala nan ma ti mul kisiɗi.

⁸Nisi ka li taŋ kayni ki nisi ka li tan nan nala, hay li ma nan kalsiyay goy hay nagat Egipte pa ta-ta vayɗi; nisi noyan goyo kay sun lawayn mara'a.

⁹Humaŋ kuɗsi maŋu; may naŋ ma disi goy kirsi haraŋi, naŋ ma ɗeksi kay lop ma nisi ma lum tam mul ma tun kisin ɗawni.

¹⁰Samuel mar dita vi Lawn tam sumun kaf kuɗ mul ma nisi ka jobomna.

¹¹Nam di'e: Kayni mi va ma mul ma nigi tunum kigina ma lum tigin ɗawni: Nam ma yaw gurona vigi sa jufayna, nam ma laksi kulo kay keke-ma-duura valamu, jar sa ɓe kay kulumayna valamu, kay nisi ma jaŋ vok keke-ma-duura valamu;

¹²nam ma yaw segena kay tunsi ŋol kay vok ma birimna hiɗi vok ma dok-vaslna, nam ma laksi hay sinena valam kay zumumu, kay feɗ wana valamu, kay kotom sle-ma-duura, kay kotom sle ma tam keke-ma-duura valamna kaw.

¹³Nam ma yaw guro-boyna vigiya kaw, kay nisi ma kotom urdi ma hisna, kay nisi ma kotom sle ma tina kaw.

¹⁴Gal sinena vigi ma ŋaana nam ma yawamu, gulda-guldana vigiya hiɗi gun-olive nam ma yawamu, ma vulum mi sa sunda valamu.

¹⁵Gal-ma-doogona vi jafna vigiya hiɗi gulda-guldana nam ma yawamu, ma vulum mi sa sunda valamu.

¹⁶Nam ma yaw sa sunda vigiya, luwayna vigi ma ŋaana hiɗi kurona vigiya kaw, ma li lopna valam hiɗi nisiya.

¹⁷Nam ma yaw gal-ma-doogona vi farayna vigiya, nigi kay tuwgi kaw ma muɗ si gorvona valamu.

¹⁸Nala nigi ma muɗ tiya kay mulla vigi namna ma nigi vilekemna, may Ma-Vatɗin ma hum siɗawta vigi noŋɗi.

¹⁹Sumun min hum dita vi Samuel noŋɗi. Nisi di'e: A'a, numa min ala mul ma tun kuma'a,

²⁰a numa kaw ma li ki jaf-sum segen kaf nala; mulla vuma ma ka kitata vuma'a, nam ma tun vokma'a, tun vokma hay duura kaw.

²¹Hay li ma Samuel hum dita vi sumun kaf humna, nam tuɗ da' mi Ma-Vatɗina.

²²Bugol kayni Ma-Vatɗina di tam Samuel: Humaŋ kuɗsiya, tunaŋ mul kisiya. Bugol kayni Samuel di tam sum sa Israyella: Mergi hay hoyok-ziyna vigiya vigiya kafe.